Kosovo
From Wikipedia
|
Ch't' articl'ye fut c'menchie en Jèrriais
 |
Kosovo ou Kosova est un tèrritouaithe des Balkans en Ûrope du Su'êt', jouaingnant l'Nièrmont par l'Vouêt, l'Albannie par l'Seur-vouêt, la Macédouaine par l'Sud et la Sèrbie par l'Nord et par l'Êst.
[amendaer] Histouaithe
En 1455 lé tèrritouaithe fut contchéthi par l's Ottomans. Jusqu'en 1912 lé tèrritouaithe restit dans l'Empithe des Ottomans, ouaithe qu'en 1878 s'lon l'accord d'paix entre les Ottomans et la Prîncipaûté d'Sèrbie, un betchet du tèrritouaithe fûsse gouvèrné par les Sèrbes (et chenna auve la pus grande ville, Prichtchinne).
En 1912 duthant les dgèrres des Balkans, les rouoyaumes dé Sèrbie et d'Nièrmont gaffîtent lé tèrritouaithe. À la fîn d'la Preunmié Dgèrre Mondiale, la fondâtion du Rouoyaume des Sèrbes, Croates et Slovéniens (1yi d'Dézembre 1918) rassemblyit les parties d'Kosovo dans l'êtat c'meun.
Quand la Yugoslavie fut transformée en eune fédéthâtion socialiste auprès la S'gonde Dgèrre Mondiale, Kosovo d'vînt eune région autonome d'la Sèrbie en 1946 épis eune provînche autonome en 1963. En 1974 la provînche èrchut un statut d'gouvèrnément dé sé et un siège dans la présidenche collective d'la Républyique Socialiste Fédéthale dé Yugoslavie.
En 1989 la Sèrbie souos la présidenche dé Slobodan Milošević èrtréchit l'autonomie d'Kosovo. Du hèrtchîn fut êmoûtchi entre les Albanniens et Sèrbes en Kosovo. Eune armée dgèrrilleuse des Albanniens tchi lus freûlaient pouor l'îndépendence et les forches armées Sèrbes et Yugoslaves fîtent la dgèrre et hardi d'la populâtion fûtent tués ou carrés hors.
À la fîn d'la dgèrre en 1999 les Nâtions Unnies griyîtent eune adminnistrâtion întèrnâtionnale et des prîncipes constitutionnelles pouor l'tèrritouaithe souos la protection d'eune forche m'née par l'OTAN. Eune assembliée législative, un président et un gouvèrnément dé sé fûtent êlus en 2001 s'lon les prîncipes constitutionnelles.
L'assembliée législative dêcliathit l'îndépendence d'la Républyique dé Kosovo l'17 dé Févri 2008. Y'a des pays tch'ont r'connu l'îndépendence dé Kosovo et d'aut' tch'ont r'nonchi d'itelle èrconnaîssance.
|
Chute sectioun est merqùie en Cotentinais
 |
Pouor l'heure, no peut enco dyire qu'ôle est eune partie de Serbie, pîqué s'n endépendaunche n'est brin recounûn coume i fâot.
