Religio Christiana

E Vicipaedia

Nativitas Iesu Christi

Religio Christiana, sive Christianismus, ex religione Iudaica orta, a Iesu Christo exordium habet. A prophetis praedicatus, per Gabrielem archangelum annuntiatus, ex Maria natus, Iesus Christus proclamavit se esse Deum de Deo et expectatum salvatorem Israel. Eum credunt Christiani doctrina, miraculis, praesertim resurrectione a mortuis, Divinitatis suae praebuisse indicium. Omnibus denominationibus sectisque consideratis, Christianismus maximum numerum asseclarum omnium orbis religionum praebet.

Christi Religio monotheistica est. Deus creditur aeternus, omnipotens, creator rerum omnium. Christiani tenent Deum esse Patrem, Filium, et Spiritum Sanctum: tres personas et unam substantiam. Quapropter Deus nominatur trinitas. Deus est Pater ut revelatur Abrahae, Isaac, et Moysi. Deus est ab aeternitate Filius, a Patre natus ante omnia saecula, sed in novissimis diebus incarnatus ex Maria Virgine, Iesus Christus. Et Deus Spiritus Sanctus est. Spiritus Sanctus Deus est cum Patre et Filio, locutus est per prophetas, et adest paraclitus (id est advocatus) Ecclesiae et cordibus hominum credentium. Secundum sanctum Paulum confessio mortis et resurrectionis Iesu Christi est articulum stantis aut cadentis fidei Christianae:

Si autem Christus non suscitatus est, inanis est ergo praedicatio nostra, inanis est et fides vestra (Epistula I ad Corinthios 15, 14)

[recensere] Fontes

Omnes Christiani agnoscunt verba et gesta Iesu Christi revelationem esse per excellentiam, sed etiam acta quae fecit Deus ante Incarnationem simili modo creduntur. Pro regula generali, Christiani profitentur revelationem publicam terminasse cum morte novissimi apostoli.

Omnes Christiani accipiunt Scripturas Sacras tamquam revelationem Dei, sed variationes sunt in modo interpretandarum scripturarum, et in canone veteris testamenti.

Variis in gradibus, Christiani agnoscunt auctoritatem Sacrae Traditionis, id est, quod semper, ubique, in omni loco et ab omnibus est creditum. Symbola Christiana, praesertim Symbolum Nicaenum coluntur ut expressiones orthodoxae fidei.

Plerique Christiani recipiunt etiam auctoritatem Sacri Magisterii, quod ex Dei voluntate et institutione in Ecclesia esse profitentur. Catholici christifideles credere tenentur "omnia et singula quae circa doctrinam de fide vel de moribus ab Ecclesiae magisterio definitive proponuntur, scilicet quae ad idem fidei depositum sancte custodiendum et fideliter exponendum requiruntur".^[1]

[recensere] Divisiones

Quamvis Christus orans ad Patrem pro discipulis suis dixerit "Rogo pro eis qui credituri sunt per verbum eorum in me, ut omnes unum sint, sicut tu Pater in me, et ego in te, ut et ipsi in nobis unum sint; ut credat mundus quia tu me misisti" (Ioannes 17,21), hodie Christiani sunt divisi varias in partes. Ecclesia Catholica et Ecclesiae Orthodoxae dicunt se a primissimis diebus idem esse ad doctrinam, et unitae fuerunt per totum primum millennium, una ecclesia Christianorum quasi omnibus nota. Hae ecclesiae aiunt se esse apostolicas, et volunt monstrare continuitatem cum apostolis tam in doctrina quam in munere episcopali. Ideo, Ecclesia Catholica apostolum Petrum confitetur esse primum papam, a Christo pastorem totius gregis constitutum.

Iam in primis quidem saeculis, variae adstabant sectae quae dissentiebant quoad doctrinam, sicut Gnostici et Ariani. Quae hereses Sanctorum et Ecclesiae doctorum opera compressae sunt.

Anno 1054, distinctiones quae iampridem inter ecclesiam occidentalem et orientalem exsistebant mutuam excommunicationem inter Romanum Pontificem et Patriarcham Constantinopolitanum moverunt. Ideo ecclesiae orientales, "orthodoxae' vocatae, separatae sunt ab Ecclesia Catholica et manent ad hoc usque tempus sicut disiunctae nationales ecclesiae. Catholica vero Ecclesia orientales seiunctos censet schismaticos et gravi ecclesiali vitio laborantes.

In occidente vero, saeculo XVI ineunte, Martinus Lutherus, monachus Augustinorum, ad reformationem Ecclesiae se vocari sensit, quum opinatus esset veram Christi doctrinam ab Ecclesia Catholica esse derelictam. A Leone X Pontifice Maximo excommunicatus, novam condidit religionem, dein Lutheranam apellatam. Ex qua autem rebellione orta est non solum communitas Lutherana, sed, post eam, plurimae alterae communitates, nunc varia decem milia, quae communiter "Protestantes" vocantur.

Hodie nonnulli Christiani quaerunt novam unitatem per viam "oecumenismi", sed divisiones adhuc manent.