Finlandia

Finlandia (Suomi in finlandese, le lingua official le plus grande de Finlandia), es un pais in Scandinavia. Illo es bastante nove, proque le stato esseva un "principato autonome" de Russia de 1808 a 1917; ante alora, illo esseva regite per Svedia de 1154 a 1808.

Le prime habitantes arrivava al pais 10 900 annos retro. In le epocha medieval Svedia conquireva le parte occidental del pais, e le stato de Novgorod (Russia) le parte oriental.

In 1809 Finlandia deveniva un parte del imperio de Russia secundo le pacto de Tilsit inter Napoleon e tsar Alexander I de Russia. Ma le nove principato del tsar reteneva un autonomia distincte, e con un proprie codice de leges, derivate ab Svedia, e con un proprie administration civil, que travaliava in svedese e finnese.

Le independentia esseva attingite in decembre 1917 a causa del chaos in Russia post le colpo de stato de Lenin e su bolshevikos un mense antea. Post un breve guerra civil in 1918 inter le "blancs" (le bloc conservative) e le "rubeos" (le sinistre revolutionari) que concludeva in un defaite "rubee", Finlandia deveniva un membro del familia del paises democratic scandinave.

Depost, inter 1939 e 1944, Finlandia participava in le secunde guerra mundial, in que illo perdeva un grande parte de su territorio. Post le guerra Finlandia ageva como un pais neutral durante le guerra frigide. Le pais esseva dirigite alora per le presidente Urho Kekkonen, qui governava de 1956 a 1981.

Hodie, Finlandia es cognoscite in le mundo pro un alte nivello de technologia. Illac on produce per exemplo telephonos cellular de Nokia. Post le disintegration del Union Sovietic le pais se jungeva al Union Europee. Comocunque, nunc le cambio demographic causa un grande defia pro le disveloppement del pais.

Le capital del pais es Helsinki. Altere citates importante es Espoo, Vantaa, Turku, Tampere, Oulu, Kuopio, Joensuu, Rovaniemi e Jyväskylä.