Storia de la Republica Zsentrafricana

Da Wikipedia, ła ençiclopedia libara.

Mapa del Zsentrafica

La Storia del Zsentrafica la pol esar scrita baxandose so de le testimonianze indirete fin a l’arivo de i eoropei. I primi abitanti de la Republica Zsentrafricana i xe stà i pigmei babinga. Vari grupi bantu i xe pasà de qi durante le grandi migrazsioni de i secoli VI e XI d.C. El teritorio ancò cuerto da la Republica Zsentraficana el xe stà de tenpo en tenpo controlà da i regni del Kanem-Bornu, del Ouaddai, e del Baguirmi. Anca i regni de i fur i ga a olte interesà el nord del paexe. En te i secoli XVIII e XIX, popolazsioni zande, banda e baya-mandjia le xe rivà en tel Zsentrafica da el Congo e dal Sudan. Verso la fine del XIX secolo, el nord de el paexe el xera controla dal sultan sudanexe Rabih az-Zubeir.

[modifica] Colonia

El teritorio del Zsentrafrica el xera stà adocià da la Franzsa che la gavea espreso el desiderio te metarlo ne la so zsona de influenzsa a la Conferenzsa de Berlin. I francexi i xe rivà en te la zona en tel 1887 co i gha firmà n’acordo co el Stato Libaro del Congo par verghe el control del la destra Oubangui, el fiume che limita el paexe a sud. En tel 1889, i francexi i ga costruio el forte de Bangui e en tel 1894 el teritorio de Oubangui-Chari el xe diventà on teritorio francexe. El xe solo en tel 1903, dopo che i gha vinto la batalia de Kousseri contro el sultan az-Zubeir, che i francexi i ga stabilì n’aministrazsion unitaria. Co Ciad, Congo e Gabon la gha formà la Federazsion de l’Africa Equatoriale Francexe en tel 1910. Par tren’ani i francexi i ga dovù afrontar le rivolte de i zsentrafricani che no volea saverghene de la colonia.

[modifica] Indipendenzsa

I zsentroafricani i ga combatù en te la seconda guera mondiale e en tel 1946, co tute le alte colonie francexi, i ga otegnù la citadinanzsa e la posibilità de formar governi locali. L’Asenblea locale en Zsentrafica la xera guidà da Barthélemy Boganda, on prete catolego che volea l’indipendenzsa de tute le colonie africane. Boganda el xe diventà el capo de governo co el Zsentrafrica el ga formà el primo governo autonomo, ma el xe morto en on incidente aereo en tel 1959. So cuzsin, David Dacko, el ga preso el control del paexe, controlà el pasagio a l’indipendenzsa el 13 agosto 1965 e mandà vanti el governo fin al 31 dicenbre 1965. El 1 genaro 1966, el colonel Jean Bédel Bokassa el ga fato on colpo de stato e el xe diventà presidente. Bokassa el ga subito abolì la Costituzsion e ciapà tuto el poter legislativo e executivo ne le so mane. El 4 dicembre 1976, Bokassa el ga trasformà la republica en na monarchia co la proclamazsion de l’Inpero del Zsentro Africa. El presidente el xe diventà el inperator Bokassa I.

Bokassa I el xe stà colpevole de vari crimini contro l’umanità. Dopo la strage de 200 buteleti de na scola, David Dacko el ga fato on colpo de stato el 20 setenbre 1979 e proclamà la republica. Dacko nol xe stà bon de canbiar la situazsion de crisi e el ga subio on colpo de stato organizsà da el general André Kolingba en tel 1981. En tel 1985, Kolingba el ga disolto el governo militare e ciamà ministri sivili e parmeso la formazsion de partiti politeghi en tel 1986. Dopo verghe fato aprovar la Costituzsion co on referendum, Kolingba el xe diventà presidente de la republica el 29 novembre 1986, en tel lulio 1987 52 parlamentari i verzsea el parlamento.

En tel 1991, al tenpo de la primavera democratica africana, Kolingba el ga fato riscrivar la Costituzsiona na Comision Nazsionale par rivar al multipartitismo. Le prime elezsioni del 1992 le xe stà anulà parché i brogli i xera masa. A le elezsioni del 1993, Ange-Félix Patassé el xe stà eleto presidente. El xe stà rieleto en tel 1999, ma la situazsion en tel paexe la xera senpre pi grave. I operai i no vegnea pagà par mexi, i soldadi i fazsea de i amutinamenti, el sistema scolastico el xe ndà en balin. I francexi i ga sostegnù el governo de Patassé e i ga mandà le so trupe par controlar la cavedal fin al marzso 2000. El resto del paexe el xera en man a ribeli che i ga atacà i vilagi e copà la popolazsion senzsa motivo. El 15 marzso 2003, i ribeli i ga ocupà la cavedal e meso el loro comandante, François Bozizé, a la presidenzsa. Bozizé el xe poi stà eleto da la popolazsion co on voto considerà valido da i oservatori internazsionali. La Republica del Zsentrafrica la ga presentà na denuncia contro Patassé e el gueriliero congolexe Jean Pierre Bemba par crimini contro l’umanità. Ancò el paexe el xe ancora fora control, co el governo che pol asicurar la sicurezsa a la popolazsion solo che en te le sità principali. Le Nazsioni Unie le ga na presenzsa militare co on contingente de pace a Bangui.