Storia de lo Swaziland
Da Wikipedia, ła ençiclopedia libara.
Come tuti i paexi de l’Africa Australe, la region che la costituise el regno de lo Swaziland la xera abità da grupi de caciatori-racoglitori za 200.000 ani fa. Sti grupi i ga dato vita a i Khoisan che vive ancora en tuto el Sudafrica e paexi confinanti. Verso el IV-V secolo d.C., altri grupi i xe imigrà dal nord e i ga portà la tecnologia del fero. Verso el XI secolo, grupi bantu i xe riva en te la region. I swazi – el grupo che ancò el xe majoritario – i xe on grupo bantu che el xe rivà dal Mozanbico en tel XVIII secolo. I swazi i se cata ancò en Mozanbico, Sudafrica (do vive la majoria de la etnia) e en Swaziland. El clan de i Dlamini el xe stà bon de controlare i vari capi en te la region de el Swaziland e, col re Sobhuza I, formar on regno unico. El re Mswati II (regno 1840-1865) el ga espanso el teritorio e stabilizà el confin co i zulu del Natal (ancò Kwa Zulu-Natal).
[modifica] Colonia
El re Mswati el ga domandà a i inglexi de jutarlo contro le invasioni de i zulu. El re Mswati el ga anca tratà co i boeri del Transvaal so i confini e l’uso de le risorse. Co i boeri i ga roto i pati, i inglexi i xe intervegnudi, dandoge protezsion al regno del Swaziland da el 1894 al 1899. E tel 1902 i inglexi i xe ritornà e i ga inposto el governo coloniale. El governatore inglexe el ga governà acordandose co el governatore del Sudafrica, i bianchi ch ei vivea en Swaziland e scoltando anca la casa reale. En tel 1921, Sobhuza II el xe rivà al trono. I inglexi i volea portar el Swaziland rentro al Sudafrica, ma la casa reale la ga protestà. En tel 1960 el re e i so colaboratori i ga formà el Movimento Nazsionale Imbokodwo che el ga vinto le prime elezsioni del 1964. Na olta al governo, ma ancora soto el control coloniale, el re el ga fato varie richieste e praticamente inposto la creazsion de on comitato par la preparazsion dela Costituzsion. El Swaziland el xe diventà indipendente el 6 setenbre 1968 come na monarchia costituzsionale.
[modifica] Swaziland moderno
En tel aprile 1973, el re Sobhuza el ga abolì la Costituzsion. En tel 1979 on novo parlamento el xe stà verto co rapresentanti eleti dal re. Sobhuza II el xe morto en tel 1982 e la regina Dzeliwe la xe diventà regent par on ano. En tel 1984 la regenzsa la xe pasà a la regina Ntombi. El fiol de Ntombi, principe Makhosetiwe, el xe diventà re co el nome de Mswati III el 25 aprile 1986. El so primo ato regale el xe stà de abolire el Liqoqo, el consilio speciale del re. El re Mswati III el xe al sentro de varie polemiche: che el nol vol democratizar el paexe e continua a governar come on sovrano asoluto che nol se interesa al ben de i citadini e chel vive na vita da sior co la majoria de la popolazsion la vive soto el livel de la povertà che continuando la celebrazsion de la danzsa de le cane e seliendo nove mojere ogni altro ano el xe on cativo esenpio a I swazi de ancò che nol fa niente par fermar l’infezsion de AIDS che la colpise on gran numaro de suditi.
Portałe Africa: varda łe altre voxe de Wikipedia che łe parla de Africa
