Storia de la Tunixia
Da Wikipedia, ła ençiclopedia libara.
La Storia de la Tunixia la xe la storia del Maghreb. Solo ultimamente el teritorio de la Tunixia el ga preso na forma naxional e el xe diventà ono stato indipendente e na republica.
Indice |
[modifica] Preistoria
I ricatamenti umani pi veci i risale al paleolitico (20.000 ani fa). A El Guettar, rente de Gafsa, se cata i resti de na costruzsion preistorica, forse on tenpieto dedicà a na fonte d’acqua. Da el nome antico de Gafsa vien el nome de la cultura che la se sa svilupà la, la cultura capsiana. Co el neolitico (4.500 – 2.500 a.C.) el movimento de i popoli de la region el xe stà influenzsà da la progresiva desertificazsion del Sahara. El xe en sto periodo che i berberi i entra en te la region del Maghreb. L’origine de i berberi na la xe ciara. El pasagio da la preistoria a la storia el riva co i fenici che i ga costruio varie sità longo la costa. De inportanzsa storica la xe Cartàxene, so le cui rovine la xe nata la cavedal moderna Túnixi.
[modifica] Cartàxene
La sità de Cartàxene la xe st fondà en tel 814 a.C. da de i coloni fenici de Tiro. El mito el dixe che laregina Elisa (Didone), sorela de Pigmalione, re de Tiro, la ga fondà la sità. Ancò se pensa che la data la sia sbajà, co i ricatamenti archeologici i atesta na data posteriore. La sità la xe cresuda e dal VI secolo a.C. la ga fato sentir el so potere comerciale e militare en tuto el Mediteraneo. Co na aleanzsa co i etruschi, Cartàxene la vinse contro la sità de Masilia (Marseja) el control de la Corsica. Le colonie so la costa spagnola le ricalca quele vece de i fenici. En tel sud de l’Italia, Cartàxene la controla vari porti e tien a bada i greci, senzsa esar bona de tor la supremazsia. Co la cresita de Roma, Cartàxene la se scontra co la nova potenzsa del Mediteraneo. Co tre guere ( 264-241 a.C.; 218-202; e 149-146) Roma la piega e distruge Cartàxene. La prima Guera Punica la xe stà on conflito navale e terestre en Sicilia e en Tunixia. La guera la xe sciopà par i diriti de sfrutamento de l’ixola. Dopovari alti e basi, i romani i ga vinto la bataja navale de Motié e caturà el control de tuta l’ixola. La prima Guera Punica la segna la fine de Cartàxene come potenzsa marinara.
La seconda Guera Punica vede Anibale traversar le Alpi co i elefanti. Anibale el conquista quasi tuta l’Italia, ma el nol se move contro la sità de Roma. I romani alora i ga vù el tenpo par riorganizsar l’esercito, fermar le nove trupe cartaginexi pra che le se podese unire a Anibale. Anibale el no ga perso na bataja, ma el xe stà meso en on canton en tel sud de l’Italia senzsa poder atacar el groso de l’esercito romano. Co la bataja de Zama, Scipione vinzse contro Anibale, a la so prima sconfita militare. Da alora Scipione el xe ciamà l’Africano. La fine de la seconda Guera Punica vol dir che Cartàxene la perde la Spagna, la ga da afondar la so flota, la ga da da pagare na multa a Roma. La terzsa Guera Punica la xe stà volua da Roma par far fora conpletamente Cartàxene e el so potere economico. Dopo n’asedio de tri ani, Cartàxene la vien distruta conpletamente en tel 146 a.C.
[modifica] Provinzsia Romana
Co la distruzsion de Cartàxene, Roma la fonda la provinzsia de l’Africa co cavedal a Utica. Pi tardi la cavedal la verà spostada de novo en tel posto do Cartàxene la xera costruia. La region la diventa on granro par l’inpero che fornise grano e olio de oliva. La nova sità de Cartàxene la diventa presto on sentro comerciale inportante. I resti de i monumenti romani i mostra la richezsa de la sità e el so livel culturale. Cartàxene la diventa la seconda sità de l’inpero. Co l’arivo del cristianeximo, Cartàxene la diventa on sentro inportante de evangelizazsion e de cultura. Soto l’azsion de San Agostino de Ipona le zone urbane e i grandi propietari teririeri i se fa catoleghi. Altri grandi esponenti de la Cexa i xe stà Tertuliano, Cipriano de Cartàxene e Aurelio.
[modifica] Vandali
En tel 429, le trupe de Genserico, re vandalo, le pasa el streto de Gibiltera. En diexe ani i riva a Ipona, en Tunixia. Co i entra a Cartàxene i mete in piè on regno chel durarà on secolo. Le relazsioni co al popolazsion locale le xe stà subito negative. I vandali i xera ariani, e quindi eretici par i catoleghi de la Tunixia, e in pi i xera barbari, considerà inferiori culturalmente. I re vandali i ga opreso i catoleghi e fato copar vari che i se openeva a l’arianeximo. Atacà da i berberi da pi parti, i vandali i ga perso el control de la region apoco a poco. Dal tel 530, l’inperator Giustiniano de Bizanzsio el conquista quasi tuto el nord Africa par ricostruir el inpero romano. I bizantini i ga conquistà Cartàxene en tel 533 co le trupe del general Belisario. I vandali i xe stà fati sciavi e portadi en oriente, e l’aministrazsion romana rimesa in piè.
[modifica] L’era arabo-musulmana
Le trupe arabe che volea conquistar el Maghreb le xe rivà en Tunixia en tel 647 e le bate l’exarca bizantino Gregorio a Sbeitla. Na seconda spedizsion la xe rivà en tel 661 e la ermina co la conquista de Bizerte. En tel 670 Oqba Ibn Nafaa el ga guidà le so trupe a la conquista de Kairouan, che la diventa el sentro de le spedizsioni verso el resto del Maghreb. I tunixini i ga resistio l’espansion araba e i ga persino reconquistà Kairouan en tel 693. Le armate arabe del general Hassan ibn Noôman le ga meso fine a la resistenzsa en tel 6968co la conquista de Cartàxene. I arabi i ga alora scominzsià el laoro de islamizazsion de la cultura berbera, che la xe restà refrataria a la conquesta. Ancora ancò i berberi i ga conservà de le tradizsioni che dimostra la presenzsa de animismo e cristianeximo en tel so pasà.
[modifica] Dinastie islamiche
En tel 800, el califo Haroun ar-Rachid el ga delegà el controlo de la Tuixia a l’emiro Ibrahim ibn Al-Aghlab che el ga dato vita a la dinastia Aglabide che la regnerà so la Tunixia par on secolo. Soto i Aglabidi, la Tunixia la ritorna a esar on sentro cultural e comerciale inportante.
En tel 909, Abu Abd Allah al-Husayn al-Shi'I – che dixea de esar on disendente de Fatima, la fiola de Maometo – e sostegnù da iberberi che no volea i Aglabidi, el se ga proclamà imam de la Tunixia e el ga fondà la dinastia de i Fatimidi. I Fatimidi i ga moso la so cavedal en Sicilia (948) e dopo en Egito (972). La dinastia de i Ziridi la ga preso el potere en Tunisia a poco a poco, fin che en tel 1048 la se sa proclamà indipendente. I Ziridi i xera de origine berbera e i ga laorà par la ricostruzsion de la società e cultura berbere.
Co la nasita de la dinastia Almoaide del Maroco, anca la Tunixia la finise soto el control de re marochin (1159). En sto periodo, i normani de la Sicilia i ga atacà speso le sità de la costa fin a ocupar Djerba, Sousse e Sfax de tanto en tanto. Soto i Almoaidi la Tunixia la torna a verghe n’inportanzsa comercial en el Mediteraneo o raporti regolari co Venexia, Pixa e Marseja. Anca a livel cultural la Tunixia la xera inportante. El pare de la sociologia moderna, ibn Khaldoun, el xera tunixino e el ga scrito anca tratati storici.
En tel 1228, el governator Abû Zakariyâ' Yahyâ el fonda la dinastia Hafside che la controlarà la Tunixia par tri secoli. I xe i secoli de la crisi del Maghreb, co le bande de corsari arabi i ga preso el control de i mari e de vari porti de la costa. La Spagna e l’inpero otomano i se ga speso becà longo ste coste par el control del trafico comerciale. En tel 1534, el famoxo corsaro Khayr ad-Din Barbarosa el ga conbatu contro i spagnoli par el control de Tunixi. I turchi i ga capio che senzsa na flota i no podea batar i corsari e oporse a l’avanzsata spagnola. En tel 1560 i otomani i conquista Djerba e en tel 1595 Tunixi.
[modifica] Periodo Otomano
I turchi i no xe mai stà boni de ofrir na bona aministrazsion a i posedimenti en tel Maghreb. La Tunixia la conosù on momento de rinasita solo en tel XIX secolo, co la ga vù pi autonomia da Instanbul. En tel 1861 i tunixini i sa dato na Costituzsion, la prima del mondo arabo e i xe diventà na republica indipendente de fato, anca se i xera ancora ligà a l’inpero otomano. I governatori de la Tunixia, i bey, i no xe stà tanto boni aministratori e en tel 1869 el paexe el xera a la bancarota. Italia, Franzsa e Regno Unio i ga avanzsà el desiderio de verghe el protetorato de la region. La Tunixa, che la ga tentà de divantar indipendente, la xe invese cascà soto el controlo francexe.
[modifica] El protetorato
Co on pretesto, le trupe francexi le xe entrà en Tunixia da l’Algeria e le xe rivà a Tunixi senzsa conbatar. El 12 magio 1881 Sadok Bey el ga firmà el tratato de Bardo. La Franzsa la ga subito scominzsià a tratar la Tunizia come na colonia e meso da parte el bey a favor de on so governator. A i inizsi del XX secolo, Bèchir Sfar, Ali Bach Hamba e Abdeljeli Zaouche i fonda el grupo Zoeni Tunixini, on grupo de resistenzsa pasiva contro i francexi. Da sto grupo nasarà en tel 1920 el Destour, n’altro grupo che vlea la indipendenzsa. En tel 1932, Bourgiba e altri giornalisti i ga fondà el giornal L’Azsion Tunixina che domanda l’indipendenzsa e la laicità de la nazsion. Pochi ani pi tardi Bourgiba el vien enprisonà en Franzsa come atentatore a la nazsion. Durante la seconda guera mondiale, el governo de Vichy el se mostra disponibile a darghe la Tunixia a l’Italia. Da la prizson, Bourgiba el ga domandà a i so concitadini de oporse al fasismo e sostegnar i aleati. En tel 1944, co el goevrno de De Gaulle el tol el poter en Franzsa, Bourgiba el vien libarà par el so sostegno. I tnixini i ga discuso co i francexi la question de l’indipendenzsa. I francexi i ga rispoisto co on novo aresto de Bourgiba en tel 1952. La mosa la ga provocà de le somose e la rivolta armata. Dopo l’indurimento de le posizsioni, la convenzsion franco-tunixina la xe stà firmà el 3 giunio 1955. L’indipendenzsa la xe stà proclamà el 20 marzso 1956, e Bourgiba el xe stà eleto primo ministro soto el re, disendente de i bey.
[modifica] Tunixia moderna
El 25 lulio 1957 la monarchia la xe sta abolia e la Tunixia la xe diventà na republica, co Bourgiba presidente (8 novenbre 1959). Bourgiba el ga governà el paexe ma el ga anca parmeso la cresita de la coruzsion. A l’inizsio d ei ani otanta, el paexe el xe cascà en te na crisi sociale e politega, el ga anca dovù far i conti co l’islamismo militante. Vista l’incapasità de Bourgiba de afrontar la situazsion, el primo ministro Ben Ali el ga deposto el presidente el 7 novenbre 1987. Ali el se sa presentà a le elezsioni el 2 aprile 1989 e el xe stà eleto co el 99,27% de i voti. Ali el xe riusì a modernizar l’economia ma el ga perso en tel canpo de i diriti sociali. Ben Ali el xe sta rieleto en tel 1994, 1999 e 2004. Dopo la so quarta elezsion, Ben Ali el ga scominzsià la represion politega se i opositori e fato aprovar na lege che ge da l’imunità al presidente par quel che ga fato durante el so mandato.
Portałe Africa: varda łe altre voxe de Wikipedia che łe parla de Africa
