Storia de la Mauritania
Da Wikipedia, ła ençiclopedia libara.
I primi abitanti serti de la Mauritania i xe stà i bafour, na popolazsion sudanica che la vivea qi fin dal neolitico. I bafour i xe stà parà via da le migrazsioni berbere tra el III e VII secolo de la nostra era. En tel 1076, i berberi i controlava tuto el teritorio a nord del fiume Senegal.
Indice |
[modifica] Lota per la dominazsion
Co la fin de la conquista berbera, la se sa verto na lota tra i novi paroni de la Mauritania e i arabi dorigine yemenita – i maqil – che i volea controlar tuto el Maghreb osidentale. La lota, prima culturale e politega e poi anca violenta, la xe terminà co la Guera de i Trentani (1644 – 1674). I arabi i gha vu la mejo e i gha influenzsà la stratificazsion de la società. I guerieri arabi – hassane - i xe diventà el grupo pi inportante de la società mauritana. Lori i gavea el dirito de farse pagar le tase da le tribù pi deboli. I berberi i gha dovù sistemarse en te le caste secondarie, ma i gha tegnù la dominazsion spirituale visto che i marabuti – santoni musulmani – i xera quasi tuti berberi. Le tribù bebrbere che no gavea la posibiltà de fornir guerieri o omeni de cultura, i xe diventà i znaga, la clase pi basa. I sciavi neri – caturà da le etnie a sud del fiume Senegal – i xe diventàa poco a poco i haratin, o mauritani neri. I haratin i xe ancò na etnia che vive servendo i mauritani bianchi considerà nobili. La società mauritana la xe senpre stà na società nomade, tribale e regolà da le lote interne. A lo steso tenpo, la cultura islamica e la produzsion de opere scrite – famoxa la racolta de manoscriti de l’oasi de Cinquetti – la gha dato na strutura legale e non arbitrariamente ligà a le regole del pi forte.
[modifica] Colonia
L’arivo de i francexi a l’inizsio del XX secolo el gha portà dei canbiamenti sociali forti. I francexi i gha proibio la sciavitù, che la xera parte de le regole sociali de la Mauritania. I gha ancà tentà de fermar l’influenza de i hassane, dandoge pi inportanzsa a i zawia e i znaga, che xera i grupi pi basi de la società. I francexi i gha meso fine a le lote tribali, che le ghe permetea a i hassane de controlar la vita tribale. I francexi i no ghe riusì a spacar el grovilio de contati tra diversi grupi e i gha dovesto senpre tentar aleanzse tenporanee co i vari grupi. I mauritani i xe rimasti nomadi, favorendo la formazsion de una elite de neri originari del Senegal.
[modifica] Indipendenzsa
El 28 novenbre 1960, la Mauritania la xe diventà indinpendente. La majoria de la popolazsion la xera nomade e la cavedal Nouakchott la xera stà costruia en tuta freta rente al vilagio de Ksar. La majoria de i abitanti co residenzsa fisa i xera neri de origine senegalexe che i gavea preso en man l’aministrazsion del potere. I altri mauritani i gha risposto a sta situazsion forzsando l’arabizsazion del paexe. El primo presidente, Moktar Ould Daddah, el gha subito proclamà el mononpartitismo e el xe stà rieleto en tel 1966, 1971, 1976. Daddah el gha spinto par el rinovo economico e el se sa scontrà co la volontà popolar par el sfrutamento de le risorse naxionali, en man a i francexi. Par risolvar la question, el presidente el gha naxionalizsà le companie minerarie en tel 1974.
[modifica] Guera Sahariana
En tel 1975, Daddah el gavea da frontegiar l’opozsizsion en casa, e l’espansionismo marochin a l’estaro. La Mauritania la gha invaso el teritorio del Sahara Spagnolo, ancò Repubblica Araba Saharawi Democratica, e el gha anexo el sud del teritorio. I guerilieri del Fronte Polisario i gha scominzsià na guera de liberazsion contro i mauritani. Par tri ani, i saharawi i gha atacà le postazsioni minerarie mauritane e persino bonbardà la cavedal. Daddah el gha mandà le trupe nere al fronte, ma queste le se sa ribelà parché i no volea conbatar na guera che i giudicava esar na guera araba. Daddah nol gha volù ritirarse e el gha preso decizsioni senpre pi totalitarie. El 10 lulio 1978, el colonel Mustafa Ould Salek el gha fato on colpo de stato. El Polixario el gha proclamà on cesate el fogo. Ould Salek nol xe stà bon de mediare la situazsione e el gha esasperà i neri del sud. A i inizsi del 1979, Mohamed Khouna Ould Haidallah el gha fato n’altro colpo de stato. Dopo na serie de atachi del Polixario, i mauritani i gha asetà de ritirarse da i teritori del Sahara Osidentale e riconosar el Fronte Polisario. El Maroco, che ocupava i teritori a nord, el gha reagì violentemente e el gha tentà de far on colpo de stato a Nouakchott. I do paexi i gha roto le relazsioni diplomatiche par qualche ano. Haidallah el gha provà a canbiar le relazsioni tra i vari grupi de la società mauritana. El gha proclamà la fine de la sciavitù, decizsion che la vien fata da ogni governo mauritano, e el gha provà a darghe pi spazsi a la minranzsa nera. De fato, el gha dovù canbiar continuamente le aleanzse, ricopiando en tel governo le vecie struture de aleanzsa tribale che le gha senpre governà la mauritania, le stese struture che el volea canbiar.
[modifica] Ould Taya
El 12 dicenbre 1984, Maaouya Ould Sid'Ahmed Taya el gha deposto Haidallah e el se sa proclamà capo del governo. Dopo verghe promeso el ritorno a la democrazsia, el se sa dismentegà de le promese. Taya nol xe stà bon de svilupar el dialogo co le minoranze. La tension la xe salià fin a la guera de confin co el Senegal del 1989. Da alora la tension la xe diminuida, ma la diferenzsa tra mauritani de origine araba e de origine nera la resta presente en te la società. Soto la presion interna e internazsionale, Taya el gha parmeso la aprovazsione de na nova Costitutzsion che la gha previsto anca el multipartitismo en tel 1991. Taya el xe rimasto al potere ma el gha subì vari tentativi de colpi de stato.
[modifica] Democrazsia
El 3 agosto 2005, co el presidente Taya el xera en Arabia Saudita a i funerali del re Fahd, i militzri i gha ocupà la cavedal. Dopo qualche ora de incertezse, i militari i gha fato saver a la naxion che i volea metar fine al governo de Taya. I militari i gha formà na giunta par prepar la strada verso la democrazsia. El colonel Ely Ould Mohamed Vall, capo de i ribeli, el gha direto el governo a la scritura de na nova Costitutzsion, aprovà en tel giunio 2006. El 11 marzso 2007, i mauritani i gha votà Sidi Ould Cheikh Abdallahi novo presidente del paexe.
Portałe Africa: varda łe altre voxe de Wikipedia che łe parla de Africa
