Animal
De Biquipedia
Animals | ||||
---|---|---|---|---|
Mollusca, Cnidaria, Chordata e Arthropoda son animals. |
||||
Clasificazión zentifica | ||||
|
||||
Phyla | ||||
Subreino Parazoa |
Es animals ó metazoos (Animalia ó metazoa) son organismos bibos quimioorganoheterotrofos plurizelulars, per lo menos en a suya forma adulta, con respirazión aerobia -son toz dependienz de l'oxicheno- e reproduzión sexual -con formazión de gametos haploides e zigotos diploides (zirclo bital haplo-diploide)-, que son diferenziables d'altros sers bibos heterotrofos per a suya sensibilidat e capazidat de mobimiento boluntario.
Encara que no ye de raso una carauteristica que agrupe á toz es animals, s'ha de tener en cuenta que mutos d'es organismos aintro d'ista colla son es que han desembolicato més e millor a capazidat suya ta ro mobimiento. Bi ha, pero, animals estaticos como es poriferos (esponchas) que tienen nomás mobimiento ziliar aintro d'es suyos conductos zentrals meyante zelulas que desplazan l'augua, sines que l'animal plen pueda fer garra mobimiento propiament dito.
Con bien pocas exzeizions, as més entaltables d'entre es mesmos porifera, es animals tienen cuerpos prou bien diferenziatos con texitos deseparatos. Ixes encluyen, asinas, es musclos que contraien-se ta controlar o mobimiento, e un sistema nerbioso que nimbía e prozesa siñals. También gosan á tener una cambra dichestiba interna, con una ó dos ubriduras ta l'exterior. Ye ra presenzia d'istas tres carauteristicas l'una que fa que es animals que las tienen sían cuaternatos como á metazoos u eumetazoos, estando ixe segundo termín lo més endicato á mientres que lo primer no sería si que una espresión á sobent trafulcada ta desinnar á toz es animals de manera cheneral.
Toz es animals tienen zelulas eucariotas embolicadas d'una matriz extrazelular carauteristica compuesta de colacheno e glicoproteínas elasticas. Ixa matriz puet manifestar-se á dibersas formas, como per exemplo cuan ye calzificada en es ruexos ó closcas d'es moluscos.
Á mientres d'o suyo desarrollo embrionario, forman de regular una carcasa relatibament flexible aintro d'a cuala ras zelulas pueden mober-se de forma relatibament liure y reorganizar-se, fendo posibles altras estruturas posteriors més complexas. Tot ixo contrasta con altros organismos multizelulars como plantas e fongos, á on as zelulas han o suyo puesto dend'es prenzipios meyante ra formazión de parez zelulars que experimentan una crexenzia progresiba.