Clasificazión zentifica
De Biquipedia
Ra clasificazión zentifica referixe-se tá forma á que ros biologos meten á collas e categorizan ras espezies bibas ó estinxitas de sers bibos. Ra moderna clasificazión yé probinénd d'o sistema que proposare Carlos Linneo tá clasificar cherarquicamén ras espezies seguntes ras suyas carauteristicas fesicas compartidas, e normalizar ra suya denominazión. Linneo proposare l'emprego d'una formula consisténd á asiñar uno nome tá cadaguna espezie, composau de dos parablas (Nomenclatura binomial), ra primera yé ro nome d'o chenero (Genera) e ra combinazión d'ambas desiña l'espezie concreta.
Ros taxons (collas de clasificazión) están binclaus tá una permanend rebisión ta amillorar ra consistenzia d'a cherarquia clasificatoria d'alcuerdo con ro prenzipio d'a deszendenzia común, ro cuo dende Charles Darwin yé ra basi d'ista categorizazión. Ra sistematica molecular, que emprega l'analisis d'o ADN chenomico, eba plegau á ras zagueras añadas ta belas modificazions e yé tá prebeyer que continúe fend-lo. Uno exemplo d'ista renobazión cladistica yé á ro ran más alazetal; clasicamén, beniba-se azetánd l'existenzia de cinco reinos, uno procariotico (reino d'os moneras), e cuatro d'eucarioticos (Protista, Fungi, Animalia e Plantae). Agora, como á cambeo, destinguixen-se tres dominios, dos procarioticos (Bacteria -ó Eubacteria- y Archaea) e nomás uno d'eucariotico (Eukarya), trestallau iste á ros cuatro reinos á l'alto enumbraus.
Ra clasificazión zentifica ye una d'as fainas d'a biolochía sistematica e, más concretamén, d'a taxonomía.