Marco Polo
Da Wikipedia, ła ençiclopedia libara.
Marco Polo (Venezsia, 15 de setenbre 1254 - Venezsia, 29 de genaro 1324) el xe stà un marcante e esplorador venezsian, che insieme con so pare Nicolò e so zio Maffeo el xe stà uno dei primi oçidentałi a rivar fin in Cina (che lu el ciamava Catai) longo ła via de ła séda. Ła cronaca del so viajo ła xe contà 'ntel libro Deuisament dou monde, mejo conosùo come el Miłion. El xe ritegnùo uno dei pi grandi esploradori de tuti i tenpi.
[modifica] El viajo
Nicolò e Matteo Polo i xera do fradei venezsiani che i traficava spéso con l'Oriente, e nel 1252 i xera nà star a Costantinopołi, da dove i xe partìi nel 1259 direti verso Est, rivando infine nel 1266 a Khanbaliq, el vecio nome de Pechino, dove i xe stà ricevùi dal Gran Khan dei Mongołi. Tornà na prima olta a Venezsia, i do fradei i xe ripartìi nel 1271 insieme col fiol de Nicolò, Marco, che'l gavea 'pena dixisete ani, rivando quatro ani dopo a Khanbaliq. I Polo i xe restà in Cina par altri 17 ani, e Marco el xe deentà un streto cołaborador e amigo del Khan, che el lo mandava in misioni diplomatiche in giro par el so inpero, e el se faxea descrìvar da lu łe tere che'l gavea visto nei so viaji e łe storie che'l gavea sentìo.
Dopo el so ritorno a Venezsia nel 1295, Marco Polo el xe stà ciapà dei Xenovexi durante un scontro naval, e el xe stà tegnù prigioniero par calche mexe, durante i quałi el gà detà ła storia del so viajo a fra' Rustichello da Pixa, che'l la gà scrita nel Miłion.