Marco Polo
Un article de Wikipèdia, l'enciclopèdia liura.
Marco Polo (a l'entorn de 1254-1324) nasquèt a Venècia, e foguèt lo mai famós dels viatjaires de la Rota de la Seda.
Lo paire de Marco Polo e son oncle avián ja realizat de viatges en Asia abans sa naissença. Marco Polo aviá sièis ans quand son paire e son oncle partiguèron tornarmai cap a l'èst dins son primièr viatge cap a China. Quand tornèron a Venécia, Marco Polo ja aviá 15 ans e sa maire èra mòrta.
Cap a la fin de l'an 1271, recebèron de presents de granda valor del novèl Papa Gregòri X amb la mission de los portar al Grand Khan de China. Aital, quand Marco Polo aviá 17 ans, de Venécia se n'anèt amb son paire e son oncle cap a l'èst. Armènia, Pèrsia e Afganistan traversèron fins qu'arribèron en China, en recórrer tota la Rota de la Seda. La tornada se faguèt per la mar de China fins a Ormoz, ont contunhèt son viatge per la tèrra fins a Venécia.
Quand arribèt foguèt empresonat per las autoritats genovesas, e mentre qu'èra en preson, dictèt a un escrivan professional sas aventuras. Un bèl nombre de sas observacions son precisas e verificablas e gràcias a el, Occident s'assabentèt d'aquelas tèrras alunhadas.
Aital, son òbra Los viatges de Marco Polo foguèt, pendent de temps lo sol referent e encoratgèt los viatges e los ligams entre de pòbles plan alunhats gràcias al comèrç per la Rota de la Seda. Cristòl Colomb foguèt un legeire apassionat d'aqueste libre.
D'unes estudis scientifics recents afortisson que los viatges e las istòrias documentadas dins lo libre Los viatges de Marco Polo son falses. Aqueles estudis sostenon que benlèu Marco Polo arribèt en China -e mai pro improbablament- mas qu'es completament fals lo fach que se foguèsse entrevistat amb los monarcas d'aqueles païses. Una de las pròvas nombrosas se fondamenta sus la descripcion de la vestimenta de la nauta societat chinesa pencha coma una barreja entre los vestits genoveses e turcs, païses ont segur estèt un brave temps, que la familha Polo aviá una fabrica de telas dins aquel darrièr país.