Papa Yohane Paulo II
Kutoka Wikipedia
Papa Yohane Paulo II (kwa Kiingereza: John Paul II; kwa Kipolandi: Jan Paweł II) aliishi 18 Mei, 1920 – 2 Aprili, 2005.
Jina lake la kuzaliwa lilikuwa Karol Józef Wojtyła.
Alikuwa papa wa 264 kuanzia 16 Oktoba, 1978 hadi kifo chake akidumu katika huduma hiyo kirefu kuliko mapapa wengine wote, isipokuwa Mtume Petro na Papa Pius IX.
Alimfuata Papa Yohane Paulo I akiwa papa wa kwanza asiye Mwitalia tangu miaka 455 iliyopita, wakati wa Mholanzi Papa Adriano VI (1522 - 1523), tena papa wa kwanza kutoka Polandi na makabila yote ya Kislavi katika historia yote ya Kanisa.
Tangu mwanzo wa upapa wake alipambana na Ukomunisti uliotesa nchi yake asili na nyinginezo, akachangia kwa kiasi kikubwa kikomo chake na kusambaratika kwa Urusi.
Vilevile alilaumu ubepari wa nchi za magharibi na kudai haki katika jamii zote, akitetea hasa uhai wa binadamu na uhuru wa dini.
Ziara zake zaidi ya 100 ulimwenguni kote, zilizokusanya mara nyingi umati mkubwa (hadi milioni 4 huko Manila), zilimfanya asafiri kuliko jumla ya mapapa wote waliomtangulia.
Papa Wojtyła alitangaza watakatifu zaidi ya 500, ili kuwapa Wakristo wa leo vielelezo mbalimbali.
