Påpe Djihan-På II
Èn årtike di Wikipedia.
Karol Józef Wojtyła (
prononçaedje) a skepyî li 18 di may 1920 a Wadowice, dilé Cracoveye, el Pologne et mori li 2 d' avri 2005 e Vatican.
Il aveut stî lomé påpe li 16 d' octôbe 1978, dizo l' no di Djihan-På II (on dit eto Djan-Pål II).
Djihan På II fourit li pus grand voyaedjeu des påpes di l' istwere. I fjha dipus d' 100 voyaedjes a l'etrindjir. Il a stî vnou deus côps el Walonreye.
Il a fwait ene foice po raprotchî les crustins inte di zels, mins n' a måy adiercî s' côp di s' fé priyî a Moscou. Les rapoirts avou les Ortodosses dimorént foirt froeds.
Årvierdimint, il esteut bén veyou des Djwifs et des Muzulmans. Il a stî å Meur des Dislamintaedjes et il a stî rçû på rwè do Marok Hassan II, et eto på prezidint Palestinî Yasser Arafat.
Coraedjeuzmint, i pretcha siconte des gueres, inte did zeles li cene d' Irak, tot soucant dins les idêyes do prezidint amerikin G.W. Bush, ki shuveut portant li minme voye ki lu, årgår del moråle (lûte siconte di l' avortumint, evnd.)
Il a sti li prumî påpe k' a comprin li grand role ki les medias plént djouwer po fé li rclame do crustinnisse. On voeyeut bén k 'il aveut lu-minme djouwé teyåte di s' djonne tins.
On lyi a rprotchî si wårdiveusté dins tot çou ki rwaite li sessouwalité, et avou ça, li lûte siconte do sida. Il a pretchî siconte del pilure et des capotes, porshuvant les idêyes do Påpe På IV. Sapinse a lu, li seul moyén acceptåve esteut di s' rastrinde !
I n' a nén bodjî d' ene faflote sol dossire do mariaedje des priyesses et di l' ordinåcion des femes.
S' il a lûté siconte do comunisse et do nazisse, i n' a waire aidî les evekes d' Amerike latene siconte des gros capitalisses ki sont la les vraiys innmis des crustins.
Portant uminnmint, li pus bele des djesses da Djhan På II, ça a stî di pardoner å djonne Trouk k' aveut sayî del touwer. Et eto di s' escuzer po les crimes passés fwaits å no di l' Eglijhe catolike.
