Suriname

Van Wikipedia

Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.

---

Suriname
Officieel taol	Nederlands
Hoofstad	Paramaribo
Staotsvörm	Rippebliek (democratisch)
Staotshoof	Ronald Venetiaan (sins 2000)
Groondgebeed % water	163.820 km² 1,1%
Inwuners	ca. 450.000
Munt	Surinaamsen dollar (SR$)
Tiedzaone	UTC -3
Nationale fiesdaag	25 november
Volkshymne	God zij met ons Suriname
Landcode	SUR
TLD	.sr
Tillefoon	+597

Suriname is e land aon de noordkös vaan Zuud-Amerika, grènzend aon Guyana in 't weste, 't Braziel in 't zuie en Frans Guyana in 't ooste. De bevolking is gering in aontal. Hoofstad en groetste stad is Paramaribo, ander stei vaan beteikenis zien Nieuw Nickerie, Nieuw Amsterdam en Brokopondo. 't Land waor bis 1975 'n kolonie vaan Nederland, boemèt 't land nog ummer sterke diplomatieke ban heet.

[bewirk] Bestuurleke indeiling

Suriname is ingedeild in tien distrikte, die al in de kolonialen tied zien vasgelag.

• Paramaribo
• Nickerie
• Coronie
• Saramacca
• Wanica
• Commewijne
• Marowijne
• Brokopondo
• Para
• Sipaliwini

[bewirk] Taole

Umtot in Suriname hiel väöl aofzunderleke etnische grope bestoon heet me de koloniaal taol, 't Nederlands, es eineg officieel taol aongehawwe. Nederlands zouw ouch de twiede volkstaol (nao aontal sprekers gemete dus) zien. De groetste taol is de creooltaol Sranantongo, die door ederein in 't noorde verstoon weurt. De taol vaan de hindoes is Sarnami Hindi, die vaan de Javane Javaans. De Indiane spreke taole wie 't Arowaks en 't Kalina.

[bewirk] Historie

Suriname woort in de zeventiende iew door Ingeland es kolonie bezat, en in d'n Twieden Ingelsen Oorlog door de Nederlanders vereuverd. In de Vrei vaan Breda woort vasgelag tot Nederland 't gebeed moch behawwe, in ruil veur 't stedsje Nui Amsterdam, 't later New York, wat toch al umringk waor door Ingels gebeed.

In de Napoleontischen tied bezatte de Ingelse de kolonie veur te veurkoume tot de Franse 't zouwe goon exploitere. Bij 't Congres vaan Wene in 1815 mós Nederland wel 't westelek deil vaan de kolonie aofstoon aon Groet-Brittannië; dit woort Brits Guyana.

In de volgenden tied vestegde ziech väöl Nederlandse boere in Suriname en veurde 't land ouch, naotot de slaovehandel gestop waor en de slavernij per tractaat aofgesjaf, gojekoupe arbeiders in: vaan 't euverbevolk Java, en oet Brits Indië. Zoe woort 't land vaan 'n oongewoen etnische diversiteit. In 1954 woort 't Statuut vaan 't Keuninkriek opgestèld, boebinne Suriname gein kolonie mier, meh 'nen otonome staot binne 't keuninkriek waor. Op 25 november 1975 woort 't land oonaofhenkelek. Vaan 1980 tot 1988 waor 't land 'n militair dictatuur oonder Desi Bouterse. Sinsdeen is 't land democratisch, meh nog ummertouw beröch um zien ermooj en hoeg criminaliteit. In de jaore neugeteg verbeterde de relatie mèt Nederland get.

Len in Zuud-Amerika
Argentinië | Bolivia | Braziel | Chili | Colombia | Equador | Guyana | Paraguay | Suriname | Uruguay | Venezuela
Aafhenkelike gebejer: Falkland-Eilen | Frans Guyana