Navigator web

De Wikipedia, le encyclopedia libere

Un navigator web es un programma computatorial pro visualisar e navigar in paginas in le World Wide Web, le systema de information de longe le plus diffundite in Internet.

[modificar] Historia

Multe differente navigatores web esseva disveloppate al longo del annos. Le plus usate esseva al initio Mosaic del NCSA. Le gruppo de disveloppamento de Mosaic posteriormente disveloppava in 1994 le prime navigator web commercial appellate Netscape, plus tarde renominate Netscape Navigator e Netscape Communicator, e finalmente reappellate Netscape. Le navigator Netscape remaneva le plus usate usque circa 1999, essente superate postea per Internet Explorer de Microsoft que habeva le avantage de esser includite in le systema de operation Windows. Un version de Netscape con codice libere esseva alora disveloppate con le nomine de Mozilla (que esseva le nomine-codice del ancian navigator Netscape), e publicate in 2002. Mozilla ha postea ganiate un bon parte del mercato, particularmente in platteformas non-Windows, debite a su fundation in le movimento de software libere.

[modificar] Lista chronologic del navigatores le plus importante

WorldWideWeb. Tim Berners-Lee scribeva le prime navigator in un computator NeXT, appellate WorldWideWeb, terminante le prime version in le 25 de decembre 1990. Ille divideva le programma con alcun personas al CERN in martio 1991.
Mosaic. Marc Andreessen e Eric Bina del NCSA publicava le prime version de Mosaic pro X Window in computatores Unix in februario 1993. Un version pro Macintosh esseva disveloppate per Aleks Totic e publicate alcun menses plus tarde. Mosaic introduceva le supporto a sono, video clips, supporto a formularios, lista de sitos favorite, e historia del navigation, e rapidemente illo deveni le plus popular navigator non-commercial.
Mozilla (1). In octobre 1994, Netscape publicava in Internet le prime version beta de su navigator, Mozilla 0.96b. In 15 de decembre esseva publicate le version final renominate Netscape 1.0, deveniente assi le prime navigator commercial pro le web.
Netscape Navigator. Le navigator responsabile pro popularisar le WWW e ducer lo al massas. Le quasi-monopolista ante Internet Explorer. Post le decimation de su parte del mercato per Microsoft, America Online ha comprate le disveloppator Netscape Communications Corporation e lassate lo descender a in irrelevantia, finalmente dimittente quasi tote su equipa de disveloppamento in 2003. Ben que Netscape ora es moribunde, su descendente libere Mozilla vive.
Mozilla (2). Le version libere de Netscape publicate in 2002 esseva equalmente appellate Mozilla. Iste navigator postea se ha disveloppate a un producto toto independente de Netscape e multo superior. Le programma ha i.a. facilitates pro scriber paginas web e un integrate lector de e-mail e de gruppos de novas. Illo es popular specialmente in systemas operative libere como Linux.
Konqueror. Un altere navigator libere, parte del systema graphic KDE pro systemas de operation de typo Unix, como Linux. Funge anque como gestor de files.
Lynx. Le Universitate de Kansas ha scribite un navigator hypertextual independente del web, appellate Lynx, usate pro distribuer information in le campo universitari. Un studente de nomine Lou Montulli addeva a illo un interfacie al Internet, e ille publicava le navigator web Lynx 2.0 in martio 1993. Lynx rapidemente deveniva le navigator preferite pro le systemas non-graphic e lo remane usque hodie.
Opera. In 1994, le navigator Opera esseva disveloppate per un gruppo de recercatores al compania de telecommunication Telenor in Oslo, Norvegia. Le anno sequente, duo membros del gruppo — Jon Stephenson von Tetzchner e Geir Ivarsøy — quitava Telenor e creava le compania Opera Software pro disveloppar e commercialisar le navigator. Opera 2.1 esseva alora publicate in Internet in le estate del 1996.
Internet Explorer. Le 23 de augusto 1995, Microsoft publicava su systema de operation Windows 95 includente un navigator appellate Internet Explorer. Verso le autumno de 1996, Explorer esseva al tertie placia in le mercato e illo ultrapassava Netscape deveniente le plus diffundite in absoluto in 1999.
Safari. Le navigator web de Apple pro su systema de operation Mac OS X, con un mechanismo de visualusation basate super le navigator libere Konqueror, e un interfacie de usator graphic proprietari. Safari es note de esser multo rapide.