Osama bin Laden

Wikipedia(e)tik

Usāmah bin Muhammad bin Awad bin Lādin (arabieraz: أسامة بن محمد بن عود بن لادن), hedatukienik Osama ben Laden (أسامة بن لادن) izenaz ezaguna, Al-Kaida organizazio terrorista islamdarraren burua. 1957.eko martxoaren 10ean edo uztailaren 30an Riaden, Saudi Arabiako hiriburuan jaioa.

Bin Osama Saudi Arabiako sendiarik aberatsenetako semea da. Sobiet Batasunak 1979an Afganistan inbaditu bezain laster, berak, munduko beste milaka musulmanekin batera, Afganistango erresistentziarekin bat egin zuen, musulman ororen beharra inbaditzaileak uxatzea zelakoan.

Sobiet Batasunak 1989an atzera egindakoan, heroi gisa itzuli zen etxera. Baina berehala, Saudi gobernuaren zein bere familiaren ustelkeriak nahigabetu zuten. Lehenengo Golkoko Gerrak Osamak herrialdeko agintariekin zeukan leizea areagotu zuen. 1993rako, Al-Qaeda (arabieraz Oinarria) izeneko gerrilarien sarea antolatu zuen Afganistango gudari ohien bidez hein handi batean. Bin Laden eta Al-Kaida mundu osan zeharko hainbat eraso terroristaren erantzuletzat jotzen dira, haien artean 2001eko irailaren 11ko New Yorkeko World Trade Centerren zein Pentagonoren kontrakoa. Horretaz gain, 1998ko Dar es Salaamen nahiz Nairobin AEBen enbaxaden kontrako atentatuak, 2002ko Baliko bonbak, 2004ko martxoaren 11ko Madrilgo trenetako atentatua, eta 2005eko Ammango bonbak haiei ere lotu zaizkie.

1994an, Saudi gobernuak, subertsioa leporatuta, pasaportea kendu zion Osama bin Ladeni. Baina hark Sudanera ihes egin zuen, borroka kanpalekuak eratzera. Hortik, 1996an kanporatuta, Afganistanera itzuli zen, Taliban gobernuaren babespean.

Osama bin Ladenek 1996 eta 1998 bitartean, fatwa (arabieraz iritzi erlijiosoa) batzuk plazaratu zituen, non AEBen kontrako gerra santua deitu zuen. AEBei, besteak beste, mundu musulmaneko baliabide naturalak arpilatzeko eta Islamgo etsaiei (Israeli alegia) laguntzeko eta sustatzeko leporatzu zizken. Antza, bin Ladenen asmoa AEBak musulmanen aurka maila handiko gerrara erakartzea, Mendebaldeak babestutako gobernu musulmanak eroaraztea eta Kalifaldia, hau da, estatu islamiko bakarra, berrezartzea.