Albert Einstein
De Biquipedia
|
||||||||||||
Albert Einstein (14 de marzo de 1879 - 18 d'abril de 1955) Naxiu d'Alemaña, pero nazionalizau nordamericano. Estió un fesico teorico, y ye considerau como uno dos más grans zientificos d'o pasau sieglo XX. Ye conoxiu por aber proposau a Tioría d'a Relatibidá, y por as suyas contrebuzions relebans á o desembolique d'a mecanica cuantica, a mecanica estatistica y a cosmolochía. Otenió en 1921 o Premio Nobel de Fesica por a suya esplicazión de l'efeuto fotoeletrico y por os suyos "serbizios á la Fesica Teorica".
Dimpués de formular a suya tioría cheneral d'a relatibidá, Einstein esdebino conoxiu mundialmén, o que ye estranio ta un zientifico. En os suyos zaguers años, a suya fama mesmo blinco a d'atros zientificos d'a istoria, y en a cultura popular, Einstein ye un sinonimo de belún con muita intelichenzia, un chenio. A suya cara tamién ye un reconoxida arredol d'o mundo. En 1999 Einstein fue nombrau o "Personache d'o Sieglo" por a rebista Time.
En a suya onor se nombrón una unidá emplegada en fotoquimica, o einstein, y un elemento quimico, o einsteinio.
Contenius |
[editar] Biografía
[editar] Primeras añadas
[editar] Chubentú y estudeos
Einstein naxió en 1879 en Ulm, Württemberg, Alemania, bels 100 km á l'este de Stuttgart. Os suyos pais estión Hermann Einstein, un bendedor de leitos que lebó dimpués una taller eletroquemico, y a suya muller, Pauline Einstein (de naximiento, Koch). Anque pertenexeba á una familia chodiga no prauticán, Albert fue ta una escuela catolica elemental, y por ensistenzia d'a suya mai, recullió lezions de bigulín en a suya chobentú. Cuan teneba 5 años, o suyo tío li amostró una bruxola de pocha, y él paró cuenta que "bella cosa" en o "buedo" autuaba sobre l'agulla. Construyó modelos y trastes mecanicos por dibersión, pero estió considerau un escolano pando de nino, probablemén dislecsico u simplamén por timidez. Prenzipió á aprender matematicas con bellas doze añadas. Diz que suspendió matematicas en as añadas posteriors, pero ixa remor no ye berdadera; se debe á un cambeo en a traza d'asinnar as notas, que lebó ta ista confusión bellas añadas dimpués. Dos tíos d'él faborexioron os suyos intreses inteleutuals en a suya nineza y adoleszenzia, socherindo-le y conseguindo-le libros sobre zenzia y matematicas.
Dimpués d'a fallita d'o negozio eletroquimico de su pai, en 1894 os Einstein emigrón dende Munich ta Pabía, Italia (amán de Milán). Albert remanió en Munich ta rematar a escuela. Completó o trimestre y biachó ta Pavia ta estar con a suya familia. En 1895, Einstein fizo o desamen d'ingreso t'a Eidgenössische Technische Hochschule (Unibersidá Politeunica Federal Suiza, en Zurich), pero suspendió a parte d'artes liberals. Fue nimbiau por a suya familia enta Aarau, Suiza ta rematar a escuela secundaria. En 1896, Einstein recullió o suyo diploma d'educazión secundaria.
Contino se matriculó en a Eidgenössische Technische Hochschule. En ixa mesma añada, Einstein renunzió á la suya zidadanía alemana, combertindo-se en un "sin-d'estau". En 1898, Albert conoxió á Mileva Maric, una compañera de clase Serbia (que tamién yera amiga de Nikola Tesla), y s'inamoró d'ella. En 1900, le'n conzedión á Einstein un diploma d'amostranza en a Eidgenössische Technische Hochschule. Fue azeutau como zidadano Suizo en 1901. En iste tiempo Einstein discutió os suyos intereses zientificos con una colla d'amigos, an que tamién i yera Mileva. Os dos tenión una filla borde, Liserl, naxida en chinero de 1902.
[editar] Treballo y dotorau
Dimpués d'a suya graduazión, Einstein no podió trobar un puesto de profesor, entre atras cosas, por que o suyo descaro como alunno eba enritau á muitos d'os suyos profesors. O pai d'un compañero de clase li aduyó a trobar treballo como desaminador tecnico aduyán en a Usina Suiza de Patens en 1902. Astí, Einstein chuzgaba a balura d'as solizituz de patens d'os imbentors ta os trastes que amenistaban conoximientos de fesica ta entender-los. Tamién aprendió a esferenziar a esenzia d'as aplicazions mesmo á partir de malas descripzions, y o direutor li amostró á "esprisar-se correutamén". De cabo cuan, Einstein reutificaba as errors de diseño, entre que abaloraba a utilidá d'os imbentos.
Einstein se casó con Mileva, que yera matematica, o 6 de Chinero de 1903. Iste matrimonio estió una "soziedá" tanto presonal como inteleutual. Einstein se referiba con cariño á Mileva como "una creatura que que ye o mío igual y que ye tan fuerte y independién como yo". Abram Joffe, en a suya biografía d'Einstein, diz Mileva aduyó asabelo á Einstein. Isto contradiz de raso á Ronald W. Clark qui, en a suya biografía, diz que Einstein pendía en a distanzia que entre él y Mileva esistía ta trobar a soledá nezesaria ta fer o suyo treballo.
O 14 de mayo de 1904, naxió o suyo fillo, Hans Albert Einstein. En 1904, o suyo puesto en a Usina Suiza de Patens pasó á estar perenne. Otenió o suyo dotorau dimpués de presentar a suya tesis "On a new determination of molecular dimensions" (Sobre una nueba determinazión d'as dimensions moleculars) en 1905.
Ixa mesma añada, sin tener guaire contauto con atros zientificos ta discutir as suyas tiorías, Einstein escribió cuatro articlos que estableixen os alazez d'a fesica moderna. A gran parte d'os fesicos son d'alcuerdo en que tres d'ixos articlos (os que describen o mobimiento Browniano, l'efeuto foteoelectrico, y a relatibidá espezial) merexeban premios Nobel. Sólo en otenió uno por l'efeuto fotoelectrico. Isto ye una ironía, ya que Einstein ye muitismo más conoxiu por a relatibidá. O que fa importans ixos articlos ye que en cada uno d'ellos, Einstein pilló una ideya d'a fesica teorica, la lebó dica a suyas consecuenzias lochicas, y consiguió esplicar resultaus esperimentals qu'eban produziu mal de cabeza a os zientificos por muitas decadas.
Einstein presentó ixos articlos á os "Annalen der Physik", y os cuatro son conoxius como os "Articlos de l'Annus Mirabilis" (d'o Latín: Añada estraordinaria). A Unión Internazional d'a Fesica Pura y Aplicada (International Union of Pure and Applied Physics) ( IUPAP ) zelebrará o 100eno cabodaño d'a publicazión d'istos articlos 1905 como l'Añada mundial d'a Fesica 2005'.
[editar] Brownian motion
En o primer articlo de 1905, tetulau "On the Motion—Required by the Molecular Kinetic Theory of Heat—of Small Particles Suspended in a Stationary Liquid" (Sobre o mobimiento —Requiesto por a Tioría Zinetica Molecular d'a Calor— de particlas chiquetas suspendidas en un liquido estazionario), publicó o suyo estudeo d'o mobimiento browniano. Emplegando a tioría zinetica de fluidos establió que o fenomeno — que no teneba encara una esplicazión satisfautoria, á penar d'aber estau oserbau por bellas decadas—proporzionó una ebidenzia empirica d'a esistenzia reyal d'os atomos. Tamién dio credibilidá a la mecanica estatistica, que yera alabez obcheto de controbersia.
Antis d'iste articlo, os atomos no yeran so que un conzeuto útil, pero bi eba un debate entre os fesicos y quimicos sobre a suya esistenzia reyal. Iste treballo proporzionó un metodo ta contar atomos sólo que güellando por un microscopio ordinario. Wilhelm Ostwald, uno d'os mainates d'a escuela "anti-atomo", dizió posteriormén que se yera tornau en un creyén en os atomos á radiz d'a esplicazión d'Einstein d'o mobimiento browniano.
[editar] Efeuto Fotoeleutrico
O segundo treballo, tetulau "On a Heuristic Viewpoint Concerning the Production and Transformation of Light", (Un punto de bista euristico sobre a produzión y transformazión d'a luz) proposó a ideya d'os cuantos de luz (agora conoxius como fotons) y mostró cómo podeban estar emplegaus ta esplicar fenomenos como l'efeuto fotoeleutrico. A ideya d'os cuantos de luz fue motibada por a deribazión d'a lai d'a radiazion d'un cuerpo negro por Max Planck, suposando que a enerchía luminosa solo podeba seyer emesa u absorbida en cantidaz discretas, ditas cuantos. Einstein contrimostró que, suposando que a luz consisitiba de berdá en paquez discretos, podeba esplanicar o misterioso efeuto fotoeleutrico.
A ideya d'os cuantos de luz contradeziba a tioría ondulatoria d'a luz, que se seguiba d'as ecuazions de Maxwell de l'eleutromannetismo, y d'a suposizión d'a dibisibilidá sinfinita d'a enerchía en sistemas fesicos. Mesmo dimpués, anque bels esperimentos contrimostrón que as ecuazions d'Einstein ta l'efeuto fotoeleutrico yeran prezisas, a suya esplicazión no fue azeutada unibersalmén. Manimenos, por as embueltas de 1921, cuan li fue conzediu o premio Nobel, a más gran parte d'os fesicos yeran combenzius que a ecuazión (hf = ø + Ek) yera correuta y que os cuantos de luz yeran posibles.
A tioría d'os cuantos de luz fue una clau importán d'a dualidá onda-particla, a ideya de que os sistemas fesicos pueden tener propiedaz de tipo ondulatorio y de tipo corpuscular, y fue un prenzipio fundamental en a creyazión d'a mecanica cuantica. No se otenió un debuxo completo de l'efeuto fotoeleutrico dica a madurez d'a mecanica cuantica.
[editar] Relatibidá espezial
O terzer articlo d'Einstein fue tetulau "On the Electrodynamics of Moving Bodies" (Sobre a eleutrodinamica d'os cuerpos en mobimiento). Iste articlo introduzió a tioría espezial d'a relatibidá, una tioría sobre o tiempo, a distanzia, a masa y a enerchía (coderén con l'eletromannetismo, pero ometió a fuerza d'a grabedá). A relatibidá espezial resolbió o problema que yera aparén dende l'esperimento de Michelson-Morley, que contrimostró que as ondas de luz no biachaban a trabiés de garra meyo, como atras ondas biachan a trabiés de l'augua u de l'aire. A belozidá d'a luz yera pues absoluta, y no relatiba á lo mobimiento de l'obserbador. Ixo yera imposible baxo a mecanica clasica Newtoniana.
George Fitzgerald ya eba concheturau en 1894 que o resultau de Michelson-Morley podeba deber-se á que os cuerpos en mobimiento s'alcorzasen en a endrezera d'o suyo mobimiento. Y belunas d'as ecuazions prenzipals de l'articlo —as transformazions de Lorentz—ya eban estau introduzidas en 1903 por o fesico olandés Hendrik Lorentz, refirmando matematicamén a conchetura de Fitzgerald. Pero Einstein esplicó as razons sozchazens ta ista rareza cheometrica. A esplicazión s'alazeta en dos acsiomas: uno estió a biella ideya de Galileo de que as lais d'a natura abrían d'estar as mesmas ta toz os obserbadors que se mueban con belozidá constán relatiba; y l'atro estió l'acsioma de que a belozidá d'a luz ye a mesma ta toz os obserbadors. a relatibidá espezial teneba bellas consecuenzias chocantes, dau que os conzeutos absolutos d'espazio y tiempo yeran refusaus de raso. A tioría se dizió a posteriori d'a relatibidá espezial ta esferenziar-la d'a suya posterior tioría d'a relatibidá cheneral, que encluye tamién á os obserbadors con mobimiento azelerau.
A tioría ye plena de aparens paradoxas, que parixen no tener sentiu; pero Einstein resolbió ixas escontradizions.
[editar] Equibalenzia d'a Enerchía
O cuatreno articlo, tetulau "Does the Inertia of a Body Depend Upon Its Energy Content?" (Pende a inerzia d'un cuerpo en o suyo conteniu enerchetico?), publicau á fins de 1905 mostró una deduzión más d'os acsiomas d'a relatibidá, a relazión enerchía-masa, escrita orichinalmén por Einstein como m = E/c². Ista deduzión, rescrita, ye a famosa ecuazión de que a enerchía en reposo (E) ye igual á la masa (m) por a belozidá d'a luz (c) elebada á lo cuadrau:
Einstein consideró que ista ecuazión yera d'importanzia fundamental, porque mostraba que a materia y a enerchía no yeran que formas diferens d'a mesma sustanzia. Sin d'embargo, muitos zientificos se mirón á ecuazión (y a relatibidá espezial) cómo á bella cosa embelecadora, pero insenificán dica as añadas 1930s.
A ecuazión s'asozia con as armas nucleyars y esplica cómo pueden produzir tals cantidaz d'enerchía. A conisión esauta entre a ecuazión y as armas ye manimenos menos conoxida. Medindo a masa d'os nucleus d'uranio y as masas d'os produtos d'a fisión nucleyar, se puede comprebar que esiste una perda de masa, que, seguntes a ecuazión debandita, se torna en una cantidá inmensa d'enerchía, que se libra en a fisión. Isto lebó á os fesicos en as 1930s a prenzipiar a considerar a posibilida d'as armas nucleyars.
[editar] Os años intermeyos
En 1906, Einstein fue aszendiu á desaminador tecnico de segunda clase. En 1908, Einstein fue contratau en Berna, Suiza, como dozén (Privatdozent), sin partizipazión en o gubierno d'a unibersidá. O suyo segundo fillo naxió o 28 de Chulio de 1910. En 1912, Einstein prenzipia á parlar d'o tiempo como a cuatrena dimensión.
Einstein s'esburzió de Mileva o 14 de Frebero de 1919 y se casó decamín con a suya prima Elsa Loewenthal (apelliu de soltera, Einstein, ya que Loewenthal yera o d'os suyo primer ombre, Max), o 2 de Chunio de 1919. Elsa yera prima chermana d'Albert (por parti de mai) y segunda por parti de su pai. Teneba tres añadas más que Albert. No naxión fillos d'iste matrimonio
En 1914, chusto antis d'o prenzipio d'a Segunda guerra mundial, Einstein s'asentó en Berlín como profesor en a Unibersidá local y fue nombrau miembro de l'Academia prusiana de Zenzias. O suyo pazifismo y oríchens chodigos irritoron á os nazionalistas alemans, que enzetón una campaña ta desacreditar a suyas tiorías.
Dende 1914 á 1933 fue o direutor de l'Instituto de Fesica Kaiser Wilhelm en Berlín, y en iste tiempo recullió o suyo Premio Nobel, y fazió os escubrimientos más sonaus.
[editar] Relatibidá cheneral
En Nobiembre de 1915, Einstein presentó, en una serie de charradas debán d'a Academia prusiana de zenzias, a Teoría cheneral d'a relatibidá. A charrada final tenió a suya fuga con a introduzión de una ecuazión que sustituyiba a lai d'a grabedá de Newton. Ista tioría consideraba que toz os obserbadors yeran equibalens, no sólo os que se mueben con belozidá uniforme. En a relatibidá cheneral, a grabedá ya no que un fuerza (como en a lai d'a grabedá Newton), ye una consecuenzia d'a curbatura de l'espazio-tiempo. A tioría proporzionó os alazez ta l'estudeo d'a cosmolochía y as ainas t'acatar muitas carauteristicas de l'uniberso que no estión escubiertas dica muito dimpués d'a muerte d'Einstein.
A tioría esió desembolicada partindo d'o razonamiento matematico y l'analís razional, no dende a esperimentazión y l'obserbazión, o que faborezió l'esqueptizismo de muitos zientificos. Pero a suya ecuazión premitió fer pronosticos y diseñar prebas ta abalorar-la, y cuan istas prebas se fizon, (p.ex. cuan se midió a curbatura d'as rayadas solars mientres un aclise solar, se contrimostró que os pronosticos d'a tioría yeran correutos. O 7 de nobiembre de 1919, The Times informó d'a confirmazión y dende alabez, a tioría enampló a fama d'Einstein, reboluzionó a fesica, y pasó muitas atras prebas (y dica agora s'ha contrimostrau correuta, á diferenzia d'atras tiorías zientificas).
A relazión d'Einstein con a fesica cuantica ye de destacar. Fue o primer, mesmo antis que Max Planck, o escubridor d'o cuanto, en dezir que yera una tioría reboluzionaria. O suya ideya d'os cuantos de luz fue una fita ta crebar a traza clasica d'acatar a fesica.
[editar] A mecanica cuantica y a entrepetazión de Copenague
Á meyaus d'os 1920s, cuan a tioría cuantica orichinal eboluzionó enta una nueba mecanica cuantica, Einstein refusó a Entrepetazión de Copenague d'as nuebas ecuazions porque proposaba un modelo prebabilistico, no bisualizable d'os fenomenos fesicos. Einstein i yera d'alcuerdo en que a tioría yera a millor que en disposaban, pero Eistein miraba una esplicazión que estase más "completa", ye dezir, deterministica. A suya creyenzia que a fesica describiba as lais que gubiernan as "cosas reyals" l'eba lebau o os suyos esitos con os atomos, fotons y a grabedá, y no quereba albandonar ixa fe.
A suya frase, "A mecanica cuantica que en beras imposán. Pero una boz interior me diz que no ye encara a reyal. A tioría diz asabelo, pero no nos amana á os secreto d'O Biello Dios. Yo soi de raso combenziu que Él no arrulla os daus" aparixe en una carta de 1926 ta Max Born. No yera pas un refús d'as tiorías probabilisticas per se. Él tamién eba emplegau l'analís estatistico en os suyos treballos sobre o mobimiento Browniano y a fotoeletrizidá. In articlos publicaus antis de l'añada miraglosa 1905, mesmo eba escubierto os ensembles de Gibbs por sí mesmo. Per no creyeba que, en o fundo, a reyalidá fesica se portase aleatoriamén.
[editar] Estatistica de Bose Einstein
En 1924, Einstein recullió una comunicazión curta d'un choben fesico indio, dito Satyendra Nath Bose, que describiba a luz como un gas de fotons, pedindo l'aduya d'Einstein en a suya publicazión. Einstein paró cuenta que as mesmas estatisticas podeban aplicar-sen á os atomos, y publicó un articlo en alemán (alabez, a lingua franca d'a fesica) describindo o modelo de Bose y as suyas implicazions. A Estatistica de Bose Einstein describe agora cualsiquier colla d'as particlas conoxidas como bosons. Einstein tamién aduyó á Erwin Schrödinger en o desembolique d'a destribuzión cuantica de Boltzman, un modelo ta os gases, mestura entre a mecanica cuantica y a clasica, anque no querió que o suyo nombre fuese encluyiu en l'articlo.
[editar] Zagueras añadas
Einstein, chunto con o suyo antigo estudian Leó Szilárd co-imbentón un tipo de refricherador (dito o refricherador d'Einstein) en 1926. [1] [2] l'11 de nobiembre de 1930. Lis ne fue dau o numero de patén US1781541, y cubriba un ziclo termodinamico de refricherazión que proporzionaba fredo sin partis móbils, con una presión constán, y sólo calor como dentrada. Emplegaba amonio, butano y augua.
Dende que Adolf Hitler plegó á o poder en 1933, a esprisión de l'odio nazionalista enta Einstein plegó á nuebos nibels. Estió acusau por o rechimen Nazional Sozialista de creyar una "fesica chodiga" en contraste con a Deutsche Physik -- u "fesica Aria". Os fesicos Nazis (encluyendo-bi os premios Nobel Johannes Stark y Philip Lenard) continoron prebando de desacreditar as suyas tiorías y de meter en listas negras á os fesicos alemans que las amostraban (como Werner Heisenberg). Einstein ya ebe fuyiu ta os Estaus Unius, an fixó a suya residenzia perenne. Azeutó una plaza en o rezién debantau Institute for Advanced Study en Princeton, New Jersey. Pasó á estar zidadano americano en 1940 (encara que continó tenendo a suya zidadanía suiza).
Einstein pasó as zagueras cuaranta añadas d'a suya bida prebando d'unificar a grabedá y l'eleutromannetismo, mirando una tioría que aunise a grabedá y l'eletromannetismo.
[editar] Princeton
O suyo treballo en Princeton se zentró en a unificazión d'as fuerzas alazetals, que él s'en referiba como a tioría d'o campo unificau. Se miró de construyir un modelo, baxo as condizions adecuadas, que describise todas as fuerzas como diferens manifestazions d'una fuerza unica. A suya prebatina yera difízil ya que as fuerzas nucleyars feble y fuerte no fueron acatadas independienmen dica alredol de 1970, 15 añadas dimpués d'a muerte d'Einstein. L'ochetibo d'Einstein perbibe en as prebatinas autuals enta l'unificazión d'as fuerzas, particularmén por meyo d'a tioría d'as bagueras.
[editar] Tioría cheneralizada d'a grabitazion
Einstein prenzipió a construyir una Tioría cheneralizada d'a grabitazion con a lai unbersal d'a grabitazión y d'a fuerza eleutromannetica en a suya primera prebatina ta prebar a unificazión y simplificazión d'as fuerzas alazetals. En 1950, describio o suyo treballo en un articlo d'a Scientific American. Einstein fue guiau por a creyenzia de una unica mida estatistica d'a barianza ta tot o conchunto de lais fesicas y imbestigó as propiedaz semilars de l'eleutromannetismo y a grabeda, pues as dos son d'alcanze sinfinito y siguen una lai cuadratica imbersa.
A tioría cheneralizada d'a grabitazión d'Einstein ye un enfoque matematico unibersal d'a tioría de campos. Rechiró a traza de reduzir lochicamén os diferens fenomenos á bella cosa ya conoxida u ebidén. Einstein prebó d'unificar a grabedá y l'eleutromannetismo d'una traza que tamién lebó á un entendimiento sutil d'a mecanica cuantica.
Einstein esmaxinó un continuum espazio-temporal con una estrutura cuatridimensional, espresau en acsiomas representaus por beutors de zinco composans. As particlas aparixeban en como rechions amugadas en o espazio, an que a fuerza d'o campo u a densidá d'enerchía son particularmen altas. Einstein trató as particlas subatomicas en ista rechira como ochetos embebius en o campo unificau. Tamién imbestigó una cheneralizazión natural de os campos tensorials simetricos.
En ixas embueltas, Einstein yera cada bez más isolau en a suya rechira sobre a Tioría Cheneralizada d'a Grabitazión (estando carauterizau como un zientifico barrenau), y no tenió esito en as suyas prebatinas d'unificar a Relatibidá cheneral y a mecanica cuantica.
[editar] Zagueras añadas
En 1948, Einstein pertenexio á o comité orichinal que resultó en a fundazion d'a Brandeis University. En 1952, o gubierno israelí li proposó azeutar o puesto de segundo presidén, pero Einstein refusó a oferta. O 30 de Marzo de 1953, Einstein libró una tioría de campos unificada rebisada.
Morió en Princeton en 1955 o April 18 1955, dexando sin resolber a Tioría Cheneralizada d'a Grabitazión. Fue cremau o mesmo día en Trenton, New Jersey. As suyas zenisas estión esparzidas en bel puesto que no se fizo publico. O suyo zelebro fue preserbau por Dr. Thomas Stoltz Harvey, qui fazió l'autopsia d'Einstein.
[editar] Bisión relichiosa
Se considera cheneralmén que a bisión relichiosa d'Einstein yera deista: creyeba en un "Dios que se rebela en armonía con tot o que esiste, no en un Dios que s'embreca con o destino y as aizions d'os ombres". Einstein querió "saber cómo creyó Dios o mundo": Él resumiba as suyas creyenzias relichiosas asinas: "A mía relichión consiste en una umil almirazión d'o esprito inamugable superior que se rebela en os chiquez detalles que podemos perzebir con a nuestra feble mente". O punto de bista d'Einstein sobre Dios y a relichión se beye reflexato en as siguiens frases d'él:
- Dios no chuga á os daus con l'uniberso..
- Dios ye sutil, pero no malizioso.
- O que reyalmén m'intresa ye saber si Dios tenió bella opzión en a creyazión de l'uniberso.
- Yo quiero saber os pensamientos de Dios; o demás son detalles.
- Á Dios no le percuten as dificultaz matematicas. Él fa as integrals empiricamén.
- A zenzia sin a relichión ye coxa. A relichión sin a zenzia ye ziega.
- Creigo que o sentimiento relichioso cosmico ye a más fuerte y noble motibazión ta un imbestigador zientifico.
[editar] Bisión Politica
Einstein se consideraba pazifista y umanitario. L'FBI americano teneba un fichero de 1427 planas sobre as suyas autibidaz y recomendó que li se refusase a dentrada en os Estaus Unius como inmigrán, alegando que Einstein "creye, aconsella, aboga y amuestra una dotrina que podría permitir que l'anarquía s'implantase y resultase un 'gubierno sólo de nombre',".
Einstein s'oposaba á las trazas de gubierno tiranicas, y por ista razón (y as suyas radizes chodigas) s'oposó á o rechimen nazi, y en fuyó salindo d'Alemania poco dimpués d'a suya instituzión. En primeras, yera á fabor d'a construzión d'a bomba atomica, ta asegurar que Hitler no lo fese primero, y mesmo nimbió una carta á Roosevelt (o 2 d'agosto de 1939) antis d'a Segunda Guerra Mundial consellando-le que enzetase un programa ta creyar una arma nucleyar. Roosevelt respondió creyando un comité ta l'imbestigazión de l'emplego de l'uranio como una bomba, que en bellas añadas fue suzediu por o Procheuto Manhattan. Dimpués d'a guerra, manimenos, Einstein abogó por o desarme nucleyar. Albert Einstein, chunto con Albert Schweitzer y Bertrand Russell luitón contra as prebatinas y bombas nucleyars. Él y Bertrand Russell presentón o manifiesto de Russell-Einstein y organizón barias conferenzias.
Albert Einstein refirmó o Sionismo, pero con reserbas. Refirmaba l'asentamiento Chodigo en a tierra orichen d'o chudaismo y partizipó autibamén en a creyazión d'a Unibersidá Ebrea de Cherusalén á qui legó os suyos papers. Sin d'embargo, s'oposaba á o nazionalismo y esprisó o suyo esqueptizismo sobre si una nazión-estau chodiga yera a millor soluzión. Quizau prexinaba a chodigos y arabes bibindo en paz en a mesma tierra. En as suyas zagueras añadas refusó una oferta ta estar o segundo presidente d'o rezién creyau Estau d'Israel.
[editar] Presonalidá
Albert Einstein estió mui repeutau por o suyo caráuter amable y amistoso, enradigau en o suyo pazifismo. Yera modesto en parlar d'as suyas abilidaz; tamien tenió autituz y manieras carauteristicas, y un gran sentiu d'a umor, como fa beyer a fotografía de baxo. Antimás, Einstein tocaba o bigulín.
[editar] Libros d'Albert Einstein
- Ideas & Opinions ISBN 0517003937
- World As I See It ISBN 080650711X
[editar] Biografías d'Einstein
- Ronald W. Clark|Clark, Ronald W. (1971). Einstein: The Life and Times. ISBN 0-380-44123-3
- Abraham Pais|Pais, Abraham (1982). Subtle is the Lord. The Science and the Life of Albert Einstein. ISBN 0-19-520438-7
[editar] Binclos esternos
- S. Morgan Friedman, "Albert Einstein Online" -- Comprehensive listing of online resources about Einstein.
- MacTutor Einstein History
- The Nobel Prize in Physics 1921 - Albert Einstein
- Theory of relativity in 4-letter words or shorter.
- NOVA Einstein
- Juergen Schmidhuber's Einstein biographical highlights
- Albert Einstein Directory
[editar] Archibos
- Official Einstein Archives Online -- 3000 documents
- Einstein Papers Project
- Max Planck Institute's Living Einstein
- American Institute of Physics's Einstein
- American Museum of Natural History's Einstein
- Albert Einstein Archive
[editar] Testos y fotografías
- Einstein, Albert, "On the Electrodynamics of Moving Bodies" Annalen der Physik. June 30, 1905
- Einstein, Albert, "Does the Inertia of a Body Depend Upon Its Energy Content?". Annalen der Physik. September 27, 1905.
- Einstein, Albert, "Inaugural Lecture to the Prussian Academy of Sciences". 1914. [PDF]
- Relativity - The Special And General Theory [Project Gutenberg E-text]
- Einstein, Albert, "The Foundation of the General Theory of Relativity". Annalen der Physik, 49. 1916.
- Einstein, Albert, "On the Generalized Theory of Gravitation". April, 1950.
- Einstein family pictures
- PBS's Einstein's wife : Mileva Maric
- Albert Einstein images via Google
- Albert Einstein Biography from "German-American corner: History and Heritage"
[editar] Gubierno
- Einstein's letter to Roosevelt
- FBI files -- investigation regarding affiliation with the Communist Party
[editar] Zitas
- Albert Einstein Quotations (Wikiquote)
- Albert Einstein's Famous Quotes
- Albert Einstein: Famous Quotes
