Nationalhymne

Us der alemannische Wikipedia, der freie Dialäkt-Enzyklopedy

Dialäkt: Züridütsch (See)

E Nationalhymne isch es Lied oder Musigschtuck, wo de Schtaat und d Nationalität vomene Land uusdrucke söll. Meischtens wird si zu fiirliche Aaläss gschpilt, wie biischpiilswiis bi Schtaatsempfäng, aber au bi Länderschpiil bim Fuessball oder Siegerehrige im Schport, wi biischpiilswiis bi de Olympische Schpiil.

Inhaltsverzeichnis 1 Allgemeins 2 Inoffizielli Nationalhymne 3 Ergänzig dur Parteihymne 4 Lueg au 5 Weblinks

[ändere] Allgemeins

Di meischte Länder händ sit em Aafang vom 19. Jahrhundert Nationalhymne entwicklet. Di ältischti vo dr Welt isch di japanischi „Kimi Ga Yo“, wo dr Text scho im 12. Jahrhundert gschribe worde isch (als Revision vomene Jahrhunderti ältere Text) und wo somit über 800 Jahr alt isch. Allerdings hät das Lied zum erschte Mal 1876 d Funktion vonere Nationalhymne überchoo und isch nach em Zweite Weltchrieg erscht 1999 wider offiziell zur Nationalhymne bschtimmt worde.

Überwiigend händ Nationalhymne sowohl Melodie als au Text, einigi werded ohni Text gschpilt, u. a. in Schpanie (Marcha Real). Hützutags chönnd d Nationalhymne vo verschiedene Länder i dr Regel a ihrer Melodie underschide werde. Das isch i dr Vergangeheit nöd immer dr Fall gsii. D Melodie vo dr englische Nationalhymne isch biischpiilswiis bsunders beliebt gsii und isch vo viilne andere Länder mit abwiichende Texte verwendet worde, so öppe vo dr preussische Hymne „Heil dir im Siegerkranz“ oder i dr Schwiiz bis 1945.

Bimene Wechsel vom Gsellschaftssyschtem wird oft au d Nationalhymne gänderet oder dur e Parteihymne ergänzt.

Bim Ertöne vo dr Nationalhymne gits underschiidlichi Gepflogeheite. I einige Länder schtönd d Mensche uuf. Bi geignete Aaläss wird d Nationalhymne mitgsunge.

[ändere] Inoffizielli Nationalhymne

Einigi Schtaate verfüege au über mehreri nationali Hymne, vo dene zwar nur eini offiziell Nationalhymne isch, di andere aber i dr Öffentlichkeit die gliich schtarchi Symbolchraft bsitzed und teilwiise ebefalls bi offizielle Aaläss gschpilt werded. Biischpiil defür isch Grossbritannie, wo sich nebed dr Nationalhymne „God Save the Queen“ au d Hymne „Rule Britannia“ und „Land of Hope and Glory“ etabliert händ; oder d USA, wo nebed dr Nationalhymne "Stars and Stripes" immer öfter „God Bless America“ gsunge wird. Im Iran isch di inoffizielli Nationalhymne Ey Iran bekannter als di offizielli. Sie wird vo Dissidente und Patriote gschpilt.

[ändere] Ergänzig dur Parteihymne

Bsunders i faschistische Diktature sowie im öschterriichische Schtändestaat und Franco-Schpanie isch es gebrüüchlich gsii, dass de jewiilige Nationalhymne unmittelbar di jewiiligi Parteihymne gfolgt isch, wo dur das en ähnliche Schtatus wie d Nationalhymne selber beaaschprucht hät. So isch zum Biischpiil

• in Italie em Königsmarsch (Marcia Reale) di faschistischi Parteihymne Giovinezza,
• im nationalsozialistische Düütschland em Düütschlandlied s Horst-Wessel-Lied,
• im franquistische Schpanie em Königsmarsch (Marcha Real) d Hymne vo dr carlistische Bewegig (Marcha de Oriamendi) und dr (ursprünglich faschistische, schpäter vom Franco gliichgschaltete) Falange Española (Cara al Sol),
• im austrofaschistische Schtändestaat (Öschterriich) dr Nationalhymne Sei gesegnet ohne Ende s Lied vo dr Jugend,
• im État français dr Marseillaise es Lied zu Ehre vom Pétain (Maréchal, nous voilà).

gfolgt.

In Taiwan isch d Nationalhymne San Min Chu-i zugliich Parteihymne vo dr Kuomintang, warum denäbed no s Nationale Flaggelied als inoffizielli Hymne gebrüüchlich isch.

[ändere] Lueg au

• Schwiizerpsalm

[ändere] Weblinks

• Chostelosi Datebanke mit Hymne (und Flagge) us aller Welt
• Inschtrumental- und Vokalversione vo viile Nationalhymne
• Nationalhymne gschpilt vo dr US Navy Band