Sicilia
Di Wikipedia, la nciclupidìa lìbbira.
Sicilia |
|||||||||||||||||||||||||||||||||||||
|
|||||||||||||||||||||||||||||||||||||
|
|||||||||||||||||||||||||||||||||||||
|
|||||||||||||||||||||||||||||||||||||
 |
«Tali furono, o Siciliani, le gesta dei vostri padri nel secolo decimoterzo! Ripigliarono così la indipendenza di nazione, la dignità di uomini, e ne dettero esempio alla Scozia, alla Fiandra, alla Svizzera, che scuotevano a un dipresso a quel tempo, la dominazione straniera.»
|
|
«Visitari l'Italia senza aviri vistu la Sicilia voli diri nun aviri vistu nenti di nenti. Ccà nnâ Sicilia cc'è la chiavi di tuttu.»
|
|
(Goethe)
|
|
«Sicilia è na terra bedda e disgrazziata.»
|
|
« La Sicilia ntera è na diminsioni fantàstica. Comu si fa a vìviricci senza Mmagginazzioni?»
|
La Sicilia è n'ìsula taliana ntô Mari Miditirràniu. Si stenni pi 25,708 km² di supirfici e cci nni càmpanu 5.098.034 abbitanti (1998). È la cchiù granni riggiuni d'Italia e rapprisenta un dudicèsimu di lu tirritoriu talianu.
Lu nùmmuru d'abbitanti è lu terzu cchiù àutu di tutti li riggiuna di l'Italia. Havi na dinzitati di pupulazzioni di 198 abbitanti p'ogni km².
Palermu è la capitali cu na pupulazzioni di quasi 700.000 abbitanti. La Sicilia si cumponi di 9 pruvincî e havi un tutali di 390 cumuna di li quali 199, lu 51%, hannu menu di 5.000 abbitanti. La pupulazzioni risidenti nta sti cumuna cu menu di 5.000 abbitanti rapprisenta lu 10% di tutta la pupulazzioni dâ riggiuni.
È una dî centri turìstichi cchiù mpurtanti d'Italia e ntô sèculu XVIII era l'ùrtima tappa dû viaggiu chi li picciotti aristucràtici ngrisi facèvanu 'n Europa pi struìrisi.
Ìndici |
Giografìa
La Sicilia è l'ìsula principali d'Italia e di tuttu lu Mari Miditirràniu. Nclusi ntrâ riggiuni dâ Sicilia sunnu sti diversi ìsuli minuri: lu gruppu di l'Ìsuli Eolî (Lipari), Ìsuli Egadi, Ìsuli Pilaggî, e l'ìsuli di Pantiddarìa, Lampidusa e di Ùstica. L'ìsula è muntagnusa assai e menu dû 14% dû sò tirritoriu è cumpostu di chianuri. La chianura cchiù granni è la Chiana di Catania. Lu Salsu è lu ciumi cchiù longu: 144 km.
L'ìsula veni siparata dû cuntinenti pi menzu dû Strittu di Missina (circa 3km). La Sicilia havi lu cchiù granni vurcanu d'Europa, l'Etna (vurcanu), chi è ancura attivìssimu. Tutta la riggiuni veni assuggittata a n'attivitati giològgica, e dui ìsuli vennu chiamati doppu àutri vurcani attivi, zoè Stròmbuli e Vurcanu.
L'ìsula di Sicilia pigghiau lu nomu di li Sìculi, un pòpulu c'accumenza la sò storia nta tèmpura luntani. Pi la sô furma trianculari, la Sicilia, prima d'èssiri chiamata accussì, fu chiamata di li Greci "Trinacria", chi veni a diri Terra a tri Punti, pirchì la Sicilia effittivamenti è la terra di li tri prumuntorî: Capu Faru, o Piloru, a Est, pressu Missina; Capu Boeo, o Lilibbeu, a Ovest, pressu Marsala; e Capu di l'Ìsula di li Currenti, a Sud, pressu Capu Passaru.
La Sicilia è vagnata di l'acqui tèbbiti di tri mari: Mari Tirrenu, a Nord, Mari Miditirràniu, a Sud, e Mari Joniu, a Est. Tutti e tri sti mari, nni la giografìa munniali, hannu un nomu sulu: Mari Miditirràniu, chi signìfica « mari 'n menzu li terri ». La Sicilia havi, nta lu Miditirràniu, na bunìssima pusizzioni stratèggica, cu lu Strittu di Gibbilterra a Ovest, lu canali di Suez a Sud-Est e lu Strittu di Missina a Nord-Est. Lu puntu cchiù vicinu a l'Italia, nni lu strittu di Missina, è di tri chilòmitri e menzu. Lu puntu cchiù vicinu â Tunisia, ntô Canali di Sicilia, è di centucinquanta chilòmitri. È nta la Sicilia chi avemu l'Etna, lu vurcanu cchiù granni d'Europa, cu n'autizza di 3.263 metri, o quasi dùdici mila pedi. La basi di lu vurcanu è di 200 chilòmitri. A stu vurcanu, duranti la duminazzioni àrabba, ci fu datu, di l'Àrabbi, lu nomu di Gebel Utlamat chi voli diri muntagna di focu.
Giofisicamenti l'arcipèlacu maltisi, e la pinìsula rausana (Sarausa, Rausa) sunnu ntâ chiattafurma cuntinintali africana: n'àutri paroli sti dui riggiuni, nzèmmula a l'ìsuli Pilaggî, sunnu parti dû cuntinenti africanu.
Malta fici puliticamenti parti dâ Sicilia nzinu a lu 1798.
Clima
| Nomu | autizza m | timpiratura | temp med st °C | temp med mm | pricipitazzioni | jorna ca chiovi |
| Enna | 964 | 15,6 | 23,3 | 4 | 695 | 69 |
|---|---|---|---|---|---|---|
| Missina | 54 | 21,8 | 26,5 | 11,5 | 893 | 109 |
| Tràpani-Birgi | 14 | 18,9 | 23,9 | 9,7 | 452 | 88 |
| Nomu = nomu dâ stazzioni mitiurulòggica; autizza m = autizza supra lu liveddu dû mari pi metri; timpiratura = timpiratura media annuali pi °C; temp med st °C = timpiratura media statali pi °C; temp med mm = timpiratura media mmirnali pi °C; pricipitazzioni = pricipitazzzioni annuali pi millimetri; jorna ca chiovi = nùmmuru dî jorna ca chiovi ogni annu. | ||||||
Nnâ tabbella ccasutta vennu ripurtati li valura medi chi si rìggistranu nnâ citati di Palermu.
| Misi | Jin | Fri | Mar | Apr | Maj | Ggn | Gtu | Aus | Sit | Utt | Nuv | Dic | Anno |
|---|---|---|---|---|---|---|---|---|---|---|---|---|---|
| Timpiratura màssima media (°C) | 12 | 14 | 17 | 20 | 22 | 27 | 30 | 33 | 29 | 26 | 18 | 13 | 21,8 |
| Timpiratura mìnima media (°C) | 9 | 10 | 12 | 13 | 15 | 18 | 20 | 23 | 21 | 18 | 14 | 10 | 15,2 |
| Acqua chiuvuta (mm) | 87 | 75 | 62 | 48 | 35 | 29 | 16 | 27 | 34 | 49 | 70 | 84 | 616 |
Storia
Câ sò pusizzioni giogràfica, la timpiratura piacenti, la campagna abbunata e lu tirrenu vurcànicu abbicinu a Etna assai riccu e pruduttivu, la sò propia storia è una dî guerri e dî rivurturi.
Abbitata dî Sìculi, dî Sicani e di l'Elimi, già dû terzu millenniu a.C., ntô VIII sèculu a.C. foru li finici chi si nstallaru ntâ parti uccidintali. Ntô sèttimu sèculu li greci funnaru diversi culònî nta parti a urienti, 'n particulari Naxos, Camarina, Missina. Sarausa funnata ntô 734 a.C. fu la citati cchiù mpurtanti. Ntô 212 a.C., 'n siquiutu â scunfitta di parti dî rumani, la Sicilia addiventa na pruvincia, sfruttata dî rumani pû frummentu, lu vinu e li tassi chi li cuvirnatura di l'èbbica mpunìanu â pupulazzioni. Cèlibbri fu a stu prupòsitu lu malu cuvernu di Verri. Ntô 464, la Sicilia è mmasa dî Vànnali a cui ntô 491 si sustitueru l'Ostrogoti di Tiuduricu chi ci dèttiru nu certu sviluppu ecunòmicu e suciali. Ntô 535 lu ginirali bizzantinu Bilisariu lìbbira la Sicilia dî bàrbari. La Sicilia fa parti dû mpiru bizzantinu. Dû 663 ô 668, lu mpiraturi Custanti II eliggi comu capitali Sarausa, pi megghiu addifènniri la Sicilia dî bàrbari e dî primi ncursioni musurmani. Ntâ secùnna mitati du IX sèculu, l'àrabbi sbàrcanu a Mazzara, cunquìstanu Palermu c'addiventa la nova capitali, e quarchi annu doppu, cu la cunquista di Sarausa ntô 878, la Sicilia è ntiramenti ntâ manu di l'àrabbi. Addiventa allura n'emiratu fatimita, pròspiru e tulliranti.
Tra lu 1060 e lu 1091 la Sicilia è arricunquistata dî nurmanni, e nnô cursu dû sèculu XII addiventa nu regnu putenti c'agghica a l'àpici sutta lu putiri di Fidiricu II di Hohenstaufen chi mori ntô 1250. Ntô 1266 la Sicilia passa ntê manu francisi, ma li vespru sicilianu dû 1282 marca la fini dû putiri di l'Angiò. La Sicilia passa pirciò sutta lu putiri araunisi e ma pi cchiù d'un sèculu cuntinuava na guerra cu Nàpuli addimentri ca la Sicilia arristava nnipinnenti cû nomu: Regnu di Trinacria. A partiri dû sèculu XV, li cruni d'Arauna e Spagna si junceru e di ddu mumentu nzinu ê Burbuna, la Sicilia veni cuvirnata dâ Spagna.
Ntô 1713 passa ê Savoia 'n scanciu dâ Sardigna. Ntô 1734 lu regnu dî dui Sicilî è arricustituiutu sutta Carlu di Burbuni. Tra 1812 e 1848 cc'èranu armenu quattru rivuluzzioni ntrâ Sicilia contra li Burbuna. Chidda ùrtima, la rivuluzzioni nnipinnintista siciliana dû 1848, avìa lu risurtatu di nu cuvernu nnipinnenti dî Burbuna, cu la sò custituzzioni assai avanzata, chi durau pi 16 misi.
Li cammisi russi di Garibbardi sbarcaru a Marsala ntô 1860 e cu nu plibbiscitu quarchi misi doppu la Sicilia vinni unificata cu lu regnu d'Italia. Doppu la secunna guerra munniali, e la riprissioni di nu muvumentu nnipinnintista, la Sicilia uttinni na certa autunumìa amministrativa, cu parramentu e liggi propî.
Amministrazzioni/Pulìtica
Dû 1946 la Sicilia godi di na certa autunumìa amministrativa. L'Assemblea Siciliana è lu parlamentu sicilianu chi havi la sedi a Palazzu dî Nurmanni, a Palermu. Lu parlamentu sicilianu è unu di li cchiù antichi dû munnu. Novi pruvinci fannu parti dâ Sicilia: Palermu, Catania, Missina, Sarausa, Rausa, Girgenti, Trapani, Caltanissetta e Enna.
Li cumuna:
- Cumuna dâ pruvincia di Caltanissetta (22)
- Cumuna dâ pruvincia di Catania (58)
- Cumuna dâ pruvincia di Enna (20)
- Cumuna dâ pruvincia di Girgenti (43)
- Cumuna dâ pruvincia di Missina (108)
- Cumuna dâ pruvincia di Palermu (82)
- Cumuna dâ pruvincia di Rausa (12)
- Cumuna dâ pruvincia di Sarausa (21)
- Cumuna dâ pruvincia di Trapani (24)
Cultura
La Sicilia, ntê sèculi, hà datu a lu munnu tantìssimi cuntribbuti pusitivi, nta tutti li campi: ntô campu artìsticu e culturali, nta filosufìa, ntô campu di la storia, nta chiddu scientìficu e ticnològgicu, nta chiddu di l’aditoria, ntô campu pulìticu e suciali, ntâ riliggiuni e, nfini, ntô campu ricriativu e sportivu.
Ora videmu, brivimenti, li principali cuntributi dati di la Scilla, nta tutti sti campi:
Campu artìsticu e culturali. - Lu pitturi Antonello da Messina ntô '400, auturi di l’Annunziata, chi è cunzidiratu di tutti comu lu ritrattu cchiù fimminiu dô munnu;
e, nta l’èbbichi cchiù ricenti, li pittura Giuseppe Scimi di Zafferana Etnea, Francesco Lojacono di Palermu e Renato Guttuso di Bagarìa; li musicisti Alessandro Scarlatti di Palermu, Vincenzo Bellini di Catania (ca Wagner giudicò auturi "di la cchiù pura milodìa ca mai sgurgò dô cori di l’omu") e Enrico Petrella di Palermu;
- li sculturi Binidittu Civiletli, Mariu Rutelli, Giàcumu Serpotta, Gnaziu Marabitti, li Gagini, Etturi Ximenes; e nta èbbichi cchiù ricenti Jenzu Assenza dô Puzzallu (Rausa). Emiliu Greco di Catania e Francesco Messina di [(Linguarossa]]] (Catania);
- l’architetti Feace di Girgenti nta l’èbbica cràssica; Matteu Carnilivari di Notu ntô Quattrucentu; Fulippu Juvarra di Missina ntô Setticentu, e Ernestu Basili di Palermu ntê nostri tempi;
- li drammaturghi Epicarmu di Sarausa, ca spirimintò la cummedia prima di Aristòfani; e Luiggi Pirannellu di Girgenti, ca rinnovò lu tiatru mudernu, e ca ci fu datu lu Premiu Nobel ntô 1934;
- li riggisti dô cìnima Ninu Martoglio, ca havi sprimintatu lu “neorialismu” già ntô 1914; Frank Capra, quattru voti Oscar; e ntê nostri jorna Giuseppi Tornatore;
- l’atturi Giuvanni Grasso e Jàngelu Musco di Catania; e li attrici Virginia Balistrieri di Tràpani, Tina Di Lorenzo di Notu, Mimi Aguglia di Palermu, e Rosina Anselmi e Marinella Bragaglia di Catania;
- li pueti comu Cielo d'Alcamo, Jacopo di Lentini, Antonio Veneziano di Monreale, chiamatu "lu sìculu Petrarca"; Giovanni Meli di Palermu; Ninu Martogliu di Catania; e Salvatore Quasimodo di Mòdica Premiu Nobel 1959;
- li scritturi Giuvanni Verga, fattu sinaturi ntô 1920; Luigi Capuana, mastru di lu verismu nta l’Italia; Federico De Roberto, auturi di "I viceré", e Giuseppi Tomasi di Lampedusa, auturi di "Il gattopardo";
- lu crìticu littirariu Luigi Russo di Dèlia (Caltanissetta) e lu crìticu d’arti Stefano Bòttari di Fiumedinisi (Messina).
Campu filusòficu. - Empédocle di Akragas (ora Girgenti), ca ntô V sèculu a.C. parrò pi la prima vota di lu “cuncettu ntillittuali di Diu”;
- Gorgia di Lentini, ca spirimintò la dialèttica, e fù lu patri di la sufìstica, cu la sò grannìssima arti di la palora;
- Michelàngilu Fardella di Trapani, ca fici canùsciri Cartesio nta l’ Italia, e ispirò a Leibnitz lu “cuncettu di mònade", affirmannu la basi mmatiriali di la materia;
- Giuvanni Gentile di Castelvetranu (1875-1944) rifurmò la dialèttica hegeliana, e criò l'attualismu, ca afferma l'auto aducazzioni di l'omu, nè tri stadi di arti, riliggiuni e filusufìa;
- Simuni Corleo di Salemi (1823-1891), prufissuri di Filusufìa a l'Università di Palermu, ntô 1889 criò lu primu labburatoriu di Psicoluggìa spirimentali nta l’Italia;
Jàngelu Sacheli di Canicattì (1890-1946), prufissuri nta l’Università di Missina, fu lu funnaturi di la "pedaguggìa metafìsica", e ntô 1939 fu primiatu di l'Accademia dei Lincei. Ntô campu stòricu. - Timeo dI Taormina, dô IV-III sèculu a. C, fu lu primu a ancurari lu cuntu stòricu a lu computu cronulòggicu di l’Olimpìadi;
- Diodoru Sìculu di Àggira, ntô I sèculu a. C, fu lu primu stòricu a pruvari a fari na Storia universali, cu 40 libra di la sò Biblioteca stòrica;
- Rocco Pirri di Noto (1577-1651) cu la sò òpira Sicilia sacra, pubbricata a Palermu ntô 1630, fu avanti prima di trìdici anni a li sludi di storia ecclisiàstica nta l’Italia di Ferdinando Ughelli, ca è pi sbagghiu cunzidiratu lu funnaturi di sti studi nta l’Italia;
Rosariu (ìregorio di Palermo (1753-1809) dimostrò, già ntô 1798, ca lu cuntu stòricu s’havi basari supra fatti documintati, e no supra la pirsunali ntrippitazzioni di lu stòricu;
- Michele Amari pi lu Mediuevu sicilianu;
- Gaetanu Columba, Biagiu Pace e Santu Mazzarinu pi la storia antica, e Rosariu Romeo pi chidda risurgimintali, rèsuru ricustruzzioni pirfetti di li pirìudi stòrici trattati;
di la storia di Sicilia comu "Storia del popolo siciliano" si nni occupau Santi Correnti di Ripostu (Catania), ca la sò òpira fu apprizzata di stòrici comu a Franco Cardini, Massino Ganci, Giovanni Spadolini e Giuseppe Tricoli pi li soi cuntribbuti a la storiugrafìa cuntimpurània, cu li cuncetti di Bievo, di Guerra dei Novant'anni, Storia inter-regionale d'Italia, e cu la Legge di univucità dû fatto stòricu.
Ntô campu scentìficu Archimede di Sirausa (287-212), geniu matimàticu pi ccillenza, criò lu principiu idrostàticu ca porta lu sò nomu, e ca pirmetti a li navi di navigari e a l’aèrii di avvulari; mmintau straurdinari strumenti di guerra, comu li specchi ustori; appricò ginialmenti lu principiu di la leva, arriniscennu a varari iddu sulu na navi;
- Giuvanni Alfonso Borelli di Messina (1608-1679) arrivuluzziunau l'astronumìa, spiegannu pi primu ca la trajettoria di li cumeti, nun è circulari, ma ellìttica; e nzignò matimàtica nta l'Università di Pisa, nti la càttidra ca era stata di Galileo;
- Francescu Maurolico di Messina (1494-1574) fu geniu polièdricu: ntrodussi lu principiu di nduzzioni nta matimàtica, scuprìu la stidda Nova di la custillazzioni di Cassiopea, ntô 1571 tracciò la rotta pi li navi cristiani ca di Missina partìanu pi Lépanto, e scrìviu na funnamintali òpira stòrica supra la Sicilia, lu Sicanicarum rerum compendium;
- Giuvanbattista Hodierna di Ragusa (1597-1660) fu astrònumu, mitiuròlugu e naturalista (studiò pi primu l'occhiu cumpòsitu di la musca e lu denti di la vìpira; e pubbricò pi primu l'òpira di Galileo supra la vilanza idrostàtica;
- li dui matimàtici siciliani Giuseppi Moleti di Messina (1531-1588) e Giuseppi Scala di Notu (1556-1585) fìciru parti di la cummissioni dî cincu dotti, ca ntô 1582, pi vuliri di papa Gregorio XIII, rifurmaru lu calennariu oggi viggenti;
- lu biòlugu Fulippu Arena di Piazza Armerina (1708-1789) studiò pi primu nta l’Europa la sessuoluggìa di li chianti, rilivannu 'n particulari la mpullinazzioni fatti di li nzetti; e studiò prima di Mendel l'ibridismo, e di Carlo Darwin l'evoluzziunismu;
- Liunardu Ximenes di Tràpani (1716-1786) nzignò Idràulica e Astronumìa nta l'Università di Firenze, e dda funnau l'Ossirvatoriu scientìficu ca ancora oggi porta lu sò nomi;
- lu butànicu Pietru Cùppari di Itala (Missina), 1816-1870, dal 1844 nzignau Agraria a l'Università di Pisa, funnannu la muderna agronumìa nta Italia;
- Stanislao Cannizzaro di Palermu (1826-1910) ca nzignò Chìmica nta l’Università di Gènuva, di Palermu e di Roma, e nnaugurò la tiurìa atomìstica, arrivuluzziunannu la chìmica muderna;
- Fulippu Re Capriata di Licata (1867-1908), prufissuri di Fìsica nta l'Università di Missina, fu unu dê primi a studiari supra la televisioni, cû sò saggiu scientìficu pubbricatu nta Francia ntô 1903;
- Ettore Majorana, natu a Catania ntô 1906, e mistiriusamenti scumparsu ntô 1938, prufissuri di Fìsica "pi chiara fama" nta l'Università di Nàpuli, e auturi di la liggi Heisenberg-Majorana, supra la fissioni di l'àtumu, hà statu unu dê pricursuri di la bumma atòmica, appoi custruita dô sò amicu e culleca Enrico Fermi pi li USA duranti la II Guerra munniali; nun èni asclusu ca la mistiriusa scumparsa di Etturi Majorana è duvuta a la pricisa ntuizzioni di l'usu micidiali ca l’òmini avìssuru fattu di la fissioni di l'àtumu;
Ntô campu tecnulòggicu Dui di li quattru piluni ca di lu 1973 funnu misi a riggini lu "Ponti supra lu Bòsfuru", ca a Istanbul junci l'Europa cu l’Asia Minuri, hannu statu custruiti nta la Sicilia, a Carini nta pruvinza di Palermu, di l’officini AERSIMM.
Ntô campu adituriali. - Lu primu dizziunariu talianu fu fattu di un sicilianu, ca è lu "Vallilium" di lu studiusu Niccolo Valla di Girgenti, ca lu pubbricò a Firenze nto 1500, pirciò dui anni prima di chiddu di lu famusu "Calepino" dô frati bergamascu Ambrogio da Calepio, ca fu pubbricatu ntô 1502;
- dô 1757 finu ô 1760 vèninu pubbricati nta Sicilia li tri volumi di lu Lexicon Topvgraphicum Skulum di lu stòricu catanisi Vito Maria Amico (1697-1762), prufissuri di Storia nta l'Università di Catania, ca sunnu lu primu esempiu nta Italia di dizziunariu stòricu-giogràficu;
- lu littiratu Vicenzu Linares di Licata (1804-1847) pùbbrica a Palermu ntô 1840 li soi Racconti Popolari, ca è lu primu esempiu di "novella popolare" nta Italia, anticipannu lu verismu di Verga e di Capuana;
- cu la sò cullana ntitulata "I Sempreverdi", nta la fini dô sèculu scorsu, l'edituri catanisi Niccolo Giannotta (1846-1914) fu lu primu nta l’Italia a pubbricari "edizioni tascabili"; di lu 1929 finu a lu 1935 veni pubbricata la monumintali Nciclopedia taliana (è chissu lu sò veru nomu: ma tutti la chiàmanu "Treccani" di lu nomu dô sò finanziaturi, lu conti Giovanni Treccani degli Alfieri, nnustriali tèssili briscianu) ca la pòninu ntra l’avanguardia di àutri stissi nizziativi di l’Europa. Chista pristiggiusa nciclopidia è duvuta a tri siciliani: a Giovanni Gentile di Castelvetrano (1875-1944) pi la direzzioni scientìfica, a Calogero Tumminelli di Caltanissetta (1886-1945) pi la direzzioni editoriale e tipogràfica, e a Antonino Pagliaro di Mistretta (1898-1973), prufissuri di Crìtica semàntica nta l'Università di Roma, pi la direzzioni ridazziunali.
La tradizzioni edituriali siciliana, ca cunta nomi pristiggiusi nta la Sicilia dô primu Novicentu cu li Andò e li Sandron a Palermu, Muglia e Principato a Missina, e Battiato a Catania, cuntìnua ancora oggi a Palermu cu Flaccovio, Guida, Palumbo e Sellerio, a Catania cu Boemi e cu Greco, a Missina cu Armando Siciliano, a Siracusa cu Ediprint e Romeo, e a San Cataldu cu li Edizzioni Nocera.
Fora dâ Sicilia, la tradizzioni edituriali siciliana cuntìnua a Milanu cu li Giuffrè e cu li Mursia, e a Firenze cu li D'Anna.
Ntô campu pulìticu e suciali. - Lu primu Parlamentu di lu munnu è chiddu sicilianu dô 1129; mentri chiddu ngrisi è dô 1264;
- la prima granni rivoluzzioni pi la libertà di nu pòpulu, è chidda siciliana dû Vespru, accuminzata lu 30 marzu 1282;
- lu suciòlugu Argisto Giuffredi di Palermu (1535-1593) anticipau di quasi dui sèculi lu pinzeri umanitariu di Cesare Beccaria, prupunennu dû 1580 l'abbulizzioni di la pena di morti;
- la custituzzioni siciliana dô 1848-49 fu la cchiù libbirali e la cchiù dimucràtica ca si putissi aviri nta ddi tempi: cu l'art. 33 lu Re nun avìa la facultà né di srògghiri né di suspènniri lu Parlamentu; mentri cu l'art. 2 lu Parlamentu putìa dichiarari dicadutu lu Re (e lu fici lu 13 aprili 1848, chiamannu supra lu tronu di Sicilia lu prìncipi Alberto Amedeo di Savoia);
- dui òrgani mpurtanti di lu Regnu d'Italia hannu statu istituiti di n’omu pulìticu sicilianu, Filippu Còrduva di Aidone (1811-1868): si tratta di la "Corte dei Conti" e di lu "Consiglio di Stato".
Scrittura siciliani
- Giuseppi Tomasi di Lampedusa
- Liunardu Sciascia
- Gesualdo Bufalino
- Giuvanni Verga
- Luciu Pìcculu
- Luiggi Pirandellu
- Eliu Vittorini
- Vitalianu Brancati
- Andrea Camilleri
- Salvaturi Quasimodo
Cucina e Gastronumìa
- Alici crudi a lumìa
- Nvultini di pisci spata
- Capunata
- Parmiggiana Siciliana
- Pasta chî sardi
- Maccu di favi
- Macchiruna â Siciliana
- Paneddi di cìciri
- Purpetti di nannatu
- Salmurigghiu
- Arancini
- Piscistoccu â Missinisi
- Pizza fritta â Siciliana
- Mustazzuli Siciliani
- Cannoli
- Pasta riali
- Zèppuli di risu
- Granita
- Cassata
- Frutta Marturana
- Sfinciuna di risu
- Torta di mènnuli
- Torta di pistacchiu
- Pignuccata
- cuscus â trapanisi
Taliati macari
- Li munarchi di Sicilia
- L'àutri riggiuni d'Italia.
- Vulcanuluggìa
- Lu trisceli
- Lu Folklori sicilianu
- La Mùsica siciliana
- Targa Florio
 |
Nta Commons s'attròvanu àutri mmàggini rilativi a Sicilia. |
Lijami di fora
- Guida di Sicilia
- Sicilia In, intra la Sicilia cori dô Miditirràniu
- Sicilia vista di l'àutu cu Wikimapia
- Sta pàggina hà statu taliata ntô misi di aprili di 1127 cristiani, a marzu la taliaru 1019 e a frivaru 1025.
 |
Pruvincî dâ Sicilia | |
|---|---|---|
| Caltanissetta | Catania | Enna | Girgenti | Missina | Palermu | Rausa | Sarausa | Tràpani | ||
 |
Riggiuni d'Italia | |
|---|---|---|
| Abbruzzu | Basilicata | Calabbria | Campania | Emilia Rumagna | Friuli Venezzia Giulia | Lazziu | Liguria | Lummardìa | Marchi | Mulisi | Piemunti | Pugghia | Sardigna | Sicilia | Tuscana | Trentinu-Àutu Àdici/Sutta Tirolu | Umbria | Vaddi d'Aosta | Vènitu | ||
