Bremervöör

Bremervöör is en Oort un Eenheitsgemeen in’n Landkreis Rodenborg (Wümm) in Neddersassen. De Eenheitsgemeen hett ruchweg 19.200 Inwahners, wovun ruchweg 11.500 op den Hööftoort Bremervöör fallt.

Inholtsverteken

1 Geografie
2 Geologie
3 Historie
4 Politik
5 Verkehr
- 5.1 Iesenbahn
- 5.2 Straat
6 Kultur
7 Beropen Lüüd ut Bremervöör
8 Weblenken

[ännern] Geografie

Bremervöör liggt in de Mitt vun’t Elv-Werser-Dreeeck twüschen Hamborg un Bremerhoben. As Utgangs- oder Endsteed vun de Düütsche Fährstraat hett dat Water un de Schipperee Bedüden för de Gemeen. Se liggt an Vörer See un sünners ok an de Oost, de vör allen in verleden Tieten veel nüüt worrn is. Bremervöör hett dorüm ok en Haven.

[ännern] Geologie

En Översicht över de Geologie un Entstahn vun dat Rebeet vun’n helen Landkreis is in den Artikel Landkreis Rodenborg (Wümm) beschreven un kann dor naleest waarn.

[ännern] Historie

Koppersteek vun Bremervöör vun Mattäus Merian üm 1653

To Anfang vun’t 12. Johrhunnert hett de sass’sch Hertog Lothar vun Supplingenborg, den lateren Kaiser Lothar III. an en strategisch bedüdsome Fort över de Oost, de Waterborg Vöör boen laten, de „castrum vorde“ nöömt weer. Se weer düchtig groot un harr dorüm en bestimmende Bedüden in de Lannen twüschen Elv un Werser. Dorüm weer se in de folgenden Johrhunnerten aver ok faken Teel vun düchtige kriegerische Uteneensetten.

De Fasten güng in’n Striet üm dat Arv vun de Stoder Grafen 1144 eerstmol in de Besitt vun’n Hertog Hinnerk de Lööw un sien Söhnen, vördem se 1219 an de Bremer Arzbischöp fallen is. As de Borg in’n Middelpunkt vun’t geistliche Förstsendom leeg, is se gau to de Hööftborg vun’t Arzbisdom worrn. In’t latere Middelöller weer dor ok de Sitt vun de Zentralverwalten vun’t Arzstift, as ok de öörtlich Verwalten vun de Vaagtee oder vun’t Amt Bremervöör. Mehrere Bremer Arzbischöp hebbt as weltlich oder geistlich Kop vun’t Arzstift vun Bremervöör ut regeert. Vun wegen de velen Uteneensetten un Strietereen mit den Raat vun de Stadt Bremen un de ansässigen Kooplüüd weern se nich faken in Bremen.

Bescheten vun Bremervöör dör de Dänen, Koppersteek vun 1657

In’n Verloop vun den Dörtigjohrigen Krieg is Bremervöör merhmols vun de Kaiserlichen, Dänen un Sweden belagert worrn, so as 1627 un 1646. De Stadt is dorbi to’n gröttsten Deel tonicht maakt worrn, dorüm hebbt de Sweden jemehrn Sitt vun de Regeeren vun’t nee inrichte Förstendom Brmen-Veern na Stood verleggt. En wietere Belagern keem 1657 över de Stadt wiel den Eersten Nordischen Krieg oder Däänsch-Sweedschen Krieg. 1682 is de Borg Vöör opletzt kumplett tonicht maakt woorn un de Hüüs vun’t Slott weern afbroken. Blots de ehmolige Kanzlei vun de Arzbischöp vunBremen un Veern ut de Tiet üm 1608 is stahn bleven. Dat is vundaag dat Oole Kreishuus. Dat wunnen Bomaterial is ünenr annern to’n Opbo vun’n Swedenspieker in Stood bruukt worrn.

De Haven vun Bremervöör weer in’t 19. Johrhunnert un Anfang vun’t 20. Johrhunnert as Endsteed vun de schippbore Oost en wichtigen Oort to’n Ümslahn vun Törf ut dat Düvelsmoor as ok för Stackbusch, de mit Ewers wietertransporteert weern. Mit dat Verbetern vun de Landweeg in’t 20. Johrhunnert hett de Stroomschipperee aver ehr Bedüden kumplett verloren.

[ännern] Politik

Bit to’n Oplösen vun’n Ooltkreis Bremervöör 1977 weer de Stadt Sitt vun de Kreisverwalten. Dorna is dat Rebeet Deel vun den hüütigen Landkreis Rodenborg (Wümm) worrn un de Verwalten güng na Rodenborg över.

Bremervöör ünnerholt twee Städerpartnerschoppen, to’n een mit Barth in Mekelnborg-Vörpommern un to’n annern mit Falmouth, in Cornwall, Grootbritannien.

[ännern] Oortsdelen

De Tallen geevt de Inwahnertallen an, (Stand vun’n 1. März 2005):

Bevern (1.269)
Bremervöör (11.544)
Öölm (1.525)
Heesdörp (1.979)
Hönau-Lindörp (515)
Iselersheim (403)
Meehdörp (240)
Minst (308)
Nedder Ochtenhusen (864)
Oostendörp (188)
Plönjeshusen (227)
Spreekens (291)

[ännern] Gemeenraat

De Bremervörer Gemeenraat sett sik siet de letzten Wahl an’n 10. September 2006 as folgt tohopen:

Partei	2006
CDU	17
SPD	9
FDP	1
WG Pro BRV	3
Bündnis 90/De Grönen	1
NPD	1

[ännern] Wapen

Dat Wapen vun de Stadt Bremervöör wiest op roden Grund en sülvern Afbild vun den hilligen Liborius mit Hilligenschien, de in de rechten Hand en sülvernen Slötel un in de linken en apen Book hollt.

[ännern] Verkehr

[ännern] Iesenbahn

In Bremervöör draapt sik de Bahnlienen vun Bremerhoben na Hamborg (Bahnlien Bremerhoben-Buxtuud) un de vun Bremen na Stood („Moorexpress“). De letzte warrt aver man blots noch in’n Touristenverkehr an Wekenennen bedreven un föhtr dör de Landschap vun’t Düvelsmoor. De anliggend Gemenen un eenige Fohrgast- un Ümweltverbännen sett sik al siet lange Tiet dorför in, dorut wedder en regelmatig föhrende Vebinnen to maken. Beide Strecken warrt vun de Iesenbohn- un Verkehrsbedrief Elv-Werser GmbH (EVB) bedeent, de ehr Bedrievszentral in Bremervöör hett. Ok de to Tiet blots in’n Gödertransport nütt Bahnlien över Zeven na Rodenborg (Wümm) (ehmolig de Bahnlien Bremervöör-Walsrood) twiegt hier af.

[ännern] Straat

De Gemeen Bremervöör warrt vun de B 71 un de B 74 dörlopen. In de Stadt Bremervöör vereent sik de beiden Bundsstraten. Na Oosten splitt sik beide op. De B 71 twiegt na Süüden af un geiht över Bevern wieter na Zeven, wiel de B 74 na Noordoosten vörbi an Nedder Ochtenhusen na Stood föhrt. Na Westen lopt de beiden Bundstraten noch en Tiet tosamen bit Basdaal. De B 74 löpt vörbi an Gnarrenborg na Oosterholt-Scharmbeck un wieter na Bremen, wiel de B 71 över Beverstedt na [Bremerhoben]] föhrt. In’n Westen vun Bremervöör twiegt vun de B 71/74 ok noch de B 495 na Noorden af. De föhrt över Loomst un Hemmoor bi an de Elv na Wischhoben un slutt dor an de Elvfähr Glückstadt–Wischhoben an.

Opstunns is Bremervöör wiet af vun’t Autobahnnett. Man, de plante A 22 schall noordwestlich an de Stadt vörbiföhren.

[ännern] Kultur

De Liborius-Skulptur bi de St. Liborius-Kark vun den Bildhauer Carsten Eggers

In Bremervöör gifft dat en ganze Reeg vun Museen un annere Saken, de man sik ankieken kann. In’t Oole Kreishuus, wat dat öllste överduernde Huus in de Stadt Bremervöör is, is vundaag dat Bachmann-Museum ünnerbrocht. Na den Neebo vun’t Kreishuus op dat Land vun de ehmolige Borg Vöör is dat Rebeet toeerst as Kreismuseum nütt worrn un bit 1991 ok as Kreisarchiv. Vundaag bargt dat Museum Utstellensstücken to de Geologie, Archäologie un Historie vun de Region. Bito finnt Wannerutstellen, Föhren un Vördrääg statt. Blots wenige Minuten to Foot dorvun liggt an’t Över vun’n Ausee en rekonstrueert Hüttendörp ut de Middelsteentiet.

Middelöllerlich maakt Hüttendörp an’n Ausee

In anner’t Museum lieggt in de Vörwarkstraat. Dat befaat sik mit den ehmolgen Landkreis Stuhm in Westpreußen. Man ok in de lütteren Oortdelen gifft dat eenige historsche Hüüs un Anlagen to bekieken oder ok de Bultengräver, de in de Neeg vun Hönau-Lindörp to sehn sünd.

De feine Landschap an de Oost un de Vörer See laadt ok vele Touristen in de Gemeen in. Bremervöör is ok en Utgangssteed- un Endsteed vun de Düütsche Fährstraat. So kann man in’n Sommer Baden oder Bootsfohrten maken. För de Radfohrers gifft dat en Reeg vun utschillert Radwannerweeg, de man bruken kann, üm de Region uttokundschaften un de Natur to geneten.