ആര്ക്കിമിഡീസ്
വിക്കിപീഡിയ, ഒരു സ്വതന്ത്ര വിജ്ഞാനകോശം.
പുരാതന ഗ്രീക്ക് ഗണിതശാസ്ത്രജ്ഞനും, ഭൗതികശാസ്ത്രജ്ഞനും, എഞ്ചിനീയറുമായിരുന്നു ആര്ക്കിമിഡീസ് (ഇംഗ്ലീഷ്: Archimedes, ഗ്രീക്ക്: Άρχιμήδης) (ബി.സി.ഇ. 287 – 212). ഇദ്ദേഹത്തിന്റെ ജീവിതത്തെക്കുറിച്ച് കാര്യമായ വിവരങ്ങള് ലഭ്യമല്ലെങ്കിലും പുരാതനകാലത്തെ പ്രധാനപ്പെട്ട ശാസ്ത്രകാരന്മാരില് ഒരാളായി ആര്ക്കിമിഡീസ് കണക്കാക്കപ്പെടുന്നു. ഗണിതത്തിലേയും ജ്യാമിതിയിലേയും കണ്ടെത്തലുകള് കൂടാതെ അക്കാലത്തെ നൂതനമായ യന്ത്രങ്ങളുടെ നിര്മ്മിതിയും ആര്ക്കിമിഡീസിനെ പ്രശസ്തനാക്കുന്നു. ഹൈഡ്രോസ്റ്റാറ്റിക്സ് എന്ന ശാസ്ത്രശാഖക്ക് അടിത്തറയിട്ട ആര്ക്കിമീഡീസ് യന്ത്രങ്ങളുടെ അടിസ്ഥാനമായ ഉത്തോലകങ്ങളുടെ തത്വങ്ങള് വിശദീകരിക്കുന്നതിലും വിജയിച്ചു.
[തിരുത്തുക] ആര്ക്കിമിഡീസ് തത്വം
സിസിലി ദ്വീപിലെ സിറക്യൂസില് ബി.സി. 287-ലാണ് ആര്ക്കിമിഡീസ് ജനിച്ചത്. സിറക്യൂസ് രാജാവ് ഒരു സ്വര്ണ്ണകിരീടം ഉണ്ടാക്കിയപ്പോള് അതില് മായം ചെര്ന്നിട്ടുണ്ടോ എന്ന് നോക്കാന് ആര്ക്കിമിഡീസിനെ ചുമതലപ്പെടുത്തി. അദ്ദേഹം ഇതിനെക്കുറിച്ച് ചിന്തിക്കാന് തുടങ്ങി. ഈ ചിന്തയുമായി കുളിക്കാനിറങ്ങിയ ആര്ക്കിമിഡീസ് ആ കുളിത്തൊട്ടിയിലെ വെള്ളം കവിഞ്ഞൊഴുകുന്നത് ശ്രദ്ധിച്ചു. കിരീടത്തിലെ മായം കണ്ടുപിടിക്കുന്നതിനുള്ള മാര്ഗം അദ്ദേഹത്തിന്റെ ബുദ്ധിയിലുദിച്ചു."യുറീക്കാ..യുറീക്കാ" എന്ന് വിളിച്ച് കൂവികൊണ്ട് ആര്ക്കിമിഡീസ് കൊട്ടാരംവരെ ഓടി. "കണ്ടെത്തി" എന്നാണ് "യുറീക്കാ"എന്നവാക്കിനര്ഥം.
ദ്രാവകത്തില് ഒരു വസ്തുവിന്റെ ഭാരനഷ്ടവും അത് ആദേശം ചെയ്യുന്ന ദ്രാവകത്തിന്റെ ഭാരവും തുല്യമാണ്. |
പ്രശസ്തമായ ആര്ക്കിമിഡീസ് തത്വം ഇതാണ്.
[തിരുത്തുക] മരണം
ക്രി.മു. 212-ല് രണ്ടാം പ്യൂണിക് യുദ്ധത്തിന്റെ നാളുകളിലാണ് ആര്ക്കിമിഡീസ് കൊല്ലപ്പെട്ടത്. പുരാതന ഗ്രീക്ക് ചരിത്രകാരനായ പ്ലൂട്ടാര്ക്ക് ആര്ക്കിമിഡീസിന്റെ മരണത്തെപ്പറ്റി രണ്ടു ഭാഷ്യങ്ങള് നല്കുന്നുണ്ട്. പ്യൂണിക് യുദ്ധത്തകാലത്ത് ജനറല് മാര്ക്കസ് ക്ലൌഡിയസ് മാര്ഴ്സെലസിന്റെ നേതൃത്വത്തിലുള്ള റോമന് സൈന്യം രണ്ടു വര്ഷത്തെ ഉപരോധത്തിനുശേഷം സിറക്യൂസ് നഗരം കീഴടക്കി. ഈ സമയത്ത് ആര്ക്കിമിഡീസ് ഒരു ഗണിതശാസ്ത്ര പ്രശ്നം പരിഹരിക്കാനുള്ള കടുത്ത ആലോചനയിലായിരുന്നു. തന്നോടൊപ്പം വന്ന് ജനറല് മാഴ്സലസിനെ മുഖം കാണിക്കാന് ഒരു റോമന് സൈനികന് ആര്ക്കിമിഡീസിനോടാജ്ഞാപിച്ചു. എന്നാല് തന്റെ ഗണിതപ്രശ്നം പരിഹരിക്കാതെ എങ്ങോട്ടുമില്ലെന്ന വാശിയിലായിരുന്നു ആര്ക്കിമിഡീസ്. ഇതില് ക്ഷുഭിതനായ സൈനികന് വാളെടുത്ത് അദ്ദേഹത്തെ വധിച്ചു. ആര്ക്കിമിഡീസിന്റെ മരണത്തെപ്പറ്റി ഏറ്റവും പ്രചാരമുള്ള ഭാഷ്യം ഇതാണ്. അത്ര കേട്ടുകേള്വിയില്ലാത്ത മറ്റൊരു കഥകൂടി പ്ലൂട്ടാര്ക്ക് വിശദീകരിക്കുന്നുണ്ട്. റോമന് സൈന്യത്തിനുമുന്നില് കീഴടങ്ങാന് ശ്രമിക്കുന്നതിനിടെ ആര്ക്കിമിഡീസ് അബദ്ധത്തില് കൊല്ലപ്പെടുകയായിരുന്നുവെന്നാണ് ഇതു സൂചിപ്പിക്കുന്നത്. ഈ കഥയനുസരിച്ച് ആര്ക്കിമിഡീസ് തന്റെ ഗണിതശാസ്ത്ര ഉപകരണങ്ങളുമായാണ് കീഴടങ്ങാനെത്തിയത്. അദ്ദേഹത്തിന്റെ കയ്യിലുള്ളവ വിലപിടിപ്പുള്ള വസ്തുക്കളാണെന്നു തെറ്റിദ്ധരിച്ച് റോമന് സൈനികന് ആര്ക്കിമിഡീസിനെ വധിക്കുകയായിരുന്നത്രേ. ആര്ക്കിമിഡീസിനെ അപകടപ്പെടുത്തരുതെന്ന് പ്രത്യേക നിര്ദ്ദേശം പുറപ്പെടുവിച്ചിരുന്ന ജനറല് മാഴ്സലസ് അദ്ദേഹം കൊല്ലപ്പെട്ടതറിഞ്ഞ് ക്ഷുഭിതനായിരുന്നെന്നും വാദങ്ങളുണ്ട്[1].
[തിരുത്തുക] ആധാരസൂചിക
- ↑ Rorres, Chris. Death of Archimedes: Sources. Courant Institute of Mathematical Sciences. Retrieved on 2007-01-02.