Religjon
De Vichipedie, la enciclopedie libare dute in marilenghe.
La religjon e je l'insiemit des crodincis, dai compuartaments morâi, des pratichis, dai rîts che a nassin dal rapuart dal om cul sacri e cun la divinitât.
Une definizion rigorose de religjon e je te realtât une vore dificile parcè che a gambie seont dal tip di studiôs che al è in opare.
I sociolics e i antropolics a cjalin la religjon come sisteme di ideis, di valôrs e di esperiencis che a àn une origjin culturâl e sociâl.
Altris studiôs, in specie chei plui dongje a lis religjons studiadis, a disin che chestis definizions a son masse limitadis e a no rivin a cjapâ dentri dute la complessitât e la ricjece dal argoment.
Sie archeolics che antropolics a afermin che, stant a lis scuviertis, no indi è mai stât, in nissun lûc e in nissun timp, un popul che a nol fos in cualchi mût religjôs.
La religjon si presente sot une grande varietât di formis, da che dai nomadics dal desert, ai chei des glacis dal nord, ai abitants des grandis citâts e parfin dai cjaçadôrs di cjâfs des forestis dal Borneo.
Cuasi in ogni religjon o podin cjatâ une figure simbul a le cuâl si pense come fondadôr de fede juste.
Tancj di lôr a àn lassât scrits o detulis che a deventarin il fondament di gnovis religjons.
Cul timp cetancj di chescj a forin cerclâts di une forme di misticisim e cualchidun al è stât parfin rindût diu.
L'om al è religjôs parcè che al è convint che la vite no je acidentâl e disprivade di significât, partant la ricercje di un finâl lu puarte a la fede intune fuarce superiôr.
Partant la religjon e sodisfe un bisugn fondamentâl dal om.
Ancje se difûr lis religjons vuê esistìntes a comparissin diviersis une di che altre, se lis dispoin des distinzions dovudis al clime, lenghe, condizions propriis dal lûc e altris fatôrs, o notin cun maravee che in realtât a son une vore simii fra di lôr.
Par esempli in tantis religjons a si doprin liturgjiis, funzions, imagjinis, cjandelis, cjantis e preieris.
Ancje i insegnaments a son vonde comuns come imortalitât de anime, ricompense celest pai bogns o cruzie eterne pai triscj, diu trinitâris o divinitâts fatis di plui di un diu.
A 'ndi è po dopo, usaçs leâts a lis necessitâts di sacrificis par paidî il pecjât, ricercje di fonts pe eterne zovinece, leiendis di dius e mieç dius che a àn vivut fra i oms, diluvions catastrofichis.
Chel che al è di particolâr al è che ducj chei che a crodin in chestis robis, a vivin gjeografichementri distints un cun chel altri. A àn culturis e usancis diviersis e a no indi è nissun nes fra lis lôr usancis.
Pûr in cjamp religjôs a àn crodincis similis.
Chest al fâs pensâ che a 'ndi sedi stade une font comun da le cuâl dutis lis religjons a àn trat.
A chest a àn contribuît sigurementri tancj mîts, che no simpri a son dome contis fantasiosis di un lontan passât.
Spes a 'ndi è un nucli di veretât intal mît, un fat storic, un personaç o un acjadiment che po dopo al è stât trasfigurât dant vite al mît.
Un esempli di chest o podin cjatâlu inte conte dal Diluvi.
Cheste conte le cjatin intal popul ebreu cu le Biblie, là dai antîcs assiro-babilonês cu la epopee di Gilgamesh, ancje là dai sumers cun "Zinsudra" che al figure la cuintripart dal Noè biblic o in Cine cun il monarcje Yü.
Pûr la mitologjie azteche, maya e incas e vevin liendis rivuart al Diluvi.
Dutis a riferissin di gjigants su la tiere, di grande inicuitât intal mont, de scugne dai dius di intervignî midiant inondazions, e ancje dal salvament di cualchi bon.
Stesse strade la seguissin crodincis come l'imortalitât de anime, le adorazion dal soreli, i sacrificis umans, la adorazion dai dius e altris.
Ancje la magjie e lu spiritisim a àn un puest di rivuart in tantis religjons.
Cjitineçs, spirits divinadôrs, podès sorenaturâls, faturis, strolegheçs, astrologjie a son une misture par tantis confessions religjosis.
