Minga

Aus Wikipedia

Wappn	Koartn
Minga Münchn • Minchn

Basisdatn
Bundeslåund:	Baian
Bezirk:	Obabaian
Geografische Lage:	Koordinaten: 48° 8′ N, 11° 34′ O 48° 8′ N, 11° 34′ O
Flächn:	310,4383 km² (31. Dez. 2003)
Einwohna:	1.314.551 (31. August 2006)
Postleitzoin:	80331-81929 (oid: 8000)
Vorwahl:	089
Kennzeichn:	M
Gmoaschlüssel:	09 1 62 000
UN/LOCODE:	DE MUC
Gliedarung:	25 Stadtbezirke
Adress vo da Stådtvawaltung:	Marienplatz 8 80331 München
Hohmbäidsch:	www.muenchen.de/
I-Mäil-Adress:	rathaus@muenchen.de
Politik
Oberburgamoasta:	Christian Ude (SPD)
Regierende Parteien:	SPD, Grüne, Rosa Liste München

Mariensäuln

Minga (Hochdeitsch: München) is d Hauptstådt vo Baian. In da nähern Umgebung (20-30km) von Minga hoasst ma's oft aa oafach d'Stådt' . Im Sidboarischn sogt ma zu Minga aa Minchn/Minichn/Minkn/Minschn. Minga is mid 1,3 Millionen Einwohna de gräßte Ståd vo Baian und noch Berlin und Hamburg de dritt gräßte Ståd vo Deitschland. Da gräßte Båch dea durch Minga laafd is d'Isar.

In fast da ganzn Wäid bekannt is Minga wega da Wiesn. Aussadem gibt's aa no as Hofbreihaus, de vuin Biergärtn, as Glocknspui am Rathaus am Marienblååz, d' Residenz und as Schloss Nymphenburg. Weider hots in Minga a mehra Museen, wie as Deitsche Museum, oder de oide, de neie und de moderne Pinakothek.

[dro werkln] Gschicht

Offiziell is Minga 1158 vom Herzog Heinrich dem Löwen gründt worn, aber beim Bädasbergl ham scheinbar scho vorher Leid glebt, wia ma heit woas. Wo heid da Oide Bäda stääd, då is scho im 8. Jahrhundad a Kirch gsschdandn und, scheinds, aa a Klosta. Da Nam München kimmt von "Zu den Munichen", oiso "bei de Möncha". Då is doch klar, dass då scho a Kloster gwen is, wei's do hoid Möcha geem håd. Zwoamoi is a Maua um Minga rum baud woan. Oamoi vo da Heinrichsståd de wo da Heinrich da Löwe gründt håd und dann nommoi hundad Jåhr spaada, wo de erschde Maua z' gloa woan is. Vo da Heinrichsmauer is nix mehr üba, aba von da zwoaddn gibts no a bissl wås, zum Beischbui as Isartor, as Sendlinga Tor und as Karlstor, des wo lang Neuhauser Tor ghoaßn håd.. Wia nåchn erschdn Weltkriag da letzte Kini Ludwig III. obdanga hod miassn,åå hods in Minga a kommunistische Revolution gebn. De Münchner Räterepublik, wia mas nachher gnennt hod, hod aber nur vier Wocha g'holtn. 1923 hod da Hitler bei da Feldherrnhalln an Putsch versuacht. Ois' a dann an da Macht war, hod mas Hauptstadt der Bewegung gnennt. Im Zwoaten Welkriag ham de Amerikaner und de Engländer Minga schlimm zuagricht. Fast de ganze Oidstod hams zambombt. 1972 hod Minga de XX. Olympischen Sommerspui ausgricht.

[dro werkln] Münchna

A Münchna is a Einwohna vo da Stodt Minga. De weibliche Form davo is Münchnarin.

De Einwohna vo da Stodt Minga nennan se säim zu Leid, de vo aussauhoib kemma, (Zuagroaste^[1]) "Münchna", statt "Mingara", während sa se untanand im Oigemeinen mit da Stodtteilbezeichnung z'eakenna gem.

So sogt zum Beispui a Münchna zu am Frankn I bin a Münchna, währnd'a zu am Schwabinga sogt, "I bin a Hadana". Des guit bsondas füa de Stodteil de in de 30ger Johr zu Minga kemma san.

Da Minga scho seit je her an hauffa Zuagroaste^[2] ghabt hod, de in da Stodt seßhaft gworn san, untascheidn d'Münchna drei Kategorien:

Münchna - Da (gwöhnliche) Münchna is a jeda, dea sein Hauptwohnsitz in Minga hod.
Echte Müncha - Da echte Müncha is oana, dea z'Minga auf d Wäidt kemma is und sein Wohnsitz in da Stodt hod.
Waschechte Münchna - A waschechta Münchna is oana, dessn beide Äitan in da Stodt geborn san, und dea säim in Minga geborn is und do wohnt.

Des typische am Münchna is sei Gmiatlichkeit und as Grantln^[3].

Füa oan, dea no ned lang in da Stodt lebt oda nua auf Bsuach do is, mog des Grantln ausschaung ois warn de Münchna unfreindle oda ständig schlecht glaunt. Tatsächlich is a grantlnda Münchna in na fast neuttraln Laune. Es fäiht eahm grod des wichtigste füan Münchna: sei Griawiga. Wos no dazua beitrogt, daß d Münchna oiwei nua schlecht glaunt warn, is de füa vui Leid mit extreme köapaliche Beschwerdn (Schädlwäh, Müadigkeit usw.) einhergeähade Auswirkung vom Fön.

As Nationalgetränk vo de Münchna soit eigentle as Bier sei, des angeblich a Münchna erfundn hod. Des stimmt beides ned. As Bier is zerscht vo de Mesopotamier erfund worn, in Baiern wieda vo de Mönch ausm Klosta Weihenstephan z'Freising und tatsächle wead vo de Münchna vui mehra Wein drunga.

Zua Wiesn trogt da (echte oda waschechte) Münchna sei Stodaratracht zua dea koa Ledahosn und koa Huat mit Gamsbart ghead. A Müncha Original wead a Person gnennt, de se im öffntlichn Lem hervorduad und bekannt wead und dabei mid seina Müncha Art typisch is.

[dro werkln] Im Umland da Mingara und b'Mingararin

Im Mingara Umland nend ma de Bewohna vo Minga aa no Mingara bzw. Mingararin; zumindest is dees be de oidan Leid no a so.

[dro werkln] Parks, Woid und Wiesn

Z'Minga gibts a boar schene Parks wie an Englischn Gartn (den ma übrigns am Grafen Rumford zum vadangga håt) mit seim bekanntn Biergartn am Chinesischen Turm. Im Sommer laffas do beim Eisbach sogar nakkert umanander. Sei Valängarung drübahoib vom Mittlan Ring entlang da Isar hoasst se Tucherpark. Mehra zua Stodtmittn hi gibts an Hofgarten, dea in den Englischn Gartn übageht und in da Näh vom Hauptbahnhof den oidn botanischn Gartn. A as Schloss Nymphenburg håd an großn Schlosspark und nebmo is glei da (neie) Botanische Garten. Entlang da Isar verlaffd a broada Greanstroafa, der durch de ganze Ståd geht. Inmittn vo da Maxvoastodt (Oidschwabing) liegt da Leopoldpark, glei hinta da Mensa v da Uni Übrigblim vo de Olympischn Spui 1972 is am Obawiesnfäid da Olympiapark mit seim Aussichtsbergl zum auffisteign und obischaugn. Faule kennan a mitm Aufzug aufn Olympiaturm auffifahrn und vo do obischaugn. Oda glei im Biergartn bleim. Zwischn Olympiapark und an Englischn Gartn gibts no an Luitpoldpark, a mit Aussichtsbergl und grossm Schpuiplatz für de Kinda^[4]. A dort gibts an subba Biergartn, dazua a Sommaschwimmbad im Nordn. Im ehemalign Mollgelände liegt, inzwischn a weng vakleanat, da Westpark, oglegt zua IGA 1983. Z'Allach gibts trotz Rangierbahnhof und A99, an Allacha Woid, dea ois Lohwoid mittlaweile wos extrem säitns darstäit. Im Ostn gibts den Ostpark mitm Michaelibod.

[dro werkln] Schuin und Hochschuin

In Minga gibts zwoa große Universidäden, de Technische Universität (friaras Technische Hochschui) und de Ludwig-Maximilians-Universität. Weider hod a da Barras do bei Neibiberg a eigene Uni und Fachhochschuin hod's a no. An Hauffa künsdlerische Studiosi dreim si a no umanand in da Kunstakademie, da Fachhochschui füa Design, da Journalistnschui, da Musihochschui oder am Fremdspracheninstitut.

[dro werkln] Medien

De greßte Tageszeitung is d'Süddeitsche, weider gibts no an Merkur und mit da AZ und da TZ no zwoa Tradschbladdln und freili a a Hauptstäi vo da BUID-Zeidung (im Haus vom ehemalign Völkischen Beobachter).

[dro werkln] Wirtschoft

In Minga hod's net nur mehra große Brauereien, sondern a mehra DAX-Firm wia Siemens oder BMW, d'Münchna Rück oder d'Allianz, Krauss-Maffei, MAN oda MTU, Telekom und große Baufirmen wia Leonhard Moll. In Minga do gibts außadem an großen Fluaghafn nams Franz Josef Strauß, der wo in da Stod ogschriebn is mit Flughafen München und Minga de Abkiazung MUC eibrocht hod.

[dro werkln] Partnastädd

Minga had zur Zeit foigende siem Pardnasdädd

	Edinburgh (Schottlånd) seid 1954
	Verona (Italien) seid 1960
	Bordeaux (Frankreich) seid 1964
	Sapporo (Japan) seid 1972
	Cincinnati (USA) seid 1989
	Kiew (Ukraine) seid 1989
	Harare (Zimbabwe) seid 1996

[dro werkln] Fuasboi

In Minga gibts a drei bekannte Fuasboivereine, de Baian (FC Bayern München), de Sechzga (TSV 1860 München). De zwoa Vereine spuin seit 2006 in da neian Allianzarena z' Frettmaning draussn. Dann gibt's ano de Hachinger (SpVgg Unterhaching) de wos im Generali Sportpark spuin!

[dro werkln] Språchn z'Minga

Dialekt: „Stådt-Såizburgarisch“

Z'Minga, sowiam Umlånd vô da Stådt wead hauptsächle Standarddeidsch gredt. Dés is durchn stårkn Zuazug vô Leid aus åndare Regjonen vô Deitschlånd, sowia da stårkn Assimilationspolitik vô de Schuin (durch dé boarische Büidungspolitik) z'ståndkemma.

Weitas is Minga a bedaitenda Wirtschåftsståndort in Deitschlånd. Vüi intanazjonale Firmen san in Minga ånsässig. Dés hàßt, dass vüi Leid dé in dé Firmen tätig san im beruflichn Åitåg sowieso mehr Standarddeidsch redn miassn und dés meißtns in privatlichn Åitåg mitnehman. Dés hin- und herschwenkn vô Hochdeitsch ins oarische is Ånstrengend und wird oft åis unpassend empfundn.

Dé meistn jungen Leid - dé no aus boarisch-redendn Fàmilien kemman - kennan zwår zum Großteil no Boarisch, benutzns åba im Åitåg aus dem Grund übahapt nimma. Zum oan, weis in da Schui sowieso Standarddeidsch redn miassn, sé mit dé Mitschüla à auf Hochdeitsch untahåitn und 's dessweng schlussendlich dånn a befremdend wàrad, mit an Mitschüla sé auf boarisch z' untahåitn. Boarisch håd vüifåch a sehr a schlechts Prestige und wird oft gleichgsetzt mit "bäurisch". Ma bemerkt åba a diaweng s' schwenkn vô jüngane Leid in a boarisch-gfärbts Hochdeitsch, wånns zum Beispüi mit dé Öitan redn.

Schätzungen gengan davô aus, dass umara 20% vô dé Mingara no boarisch im Åitåg redn, 70% redn Standarddeitsch mit norddeitschn beziehungsweise fehrnsehdeitschn Eîschlåg und 10 % san åndane Språchn. Desweng wead bei de Leid, de im Obaland wohnand, gsogt, dass z'Minga de Isapreissn wohnan.

Aisa is Minga schã fåst a standarddeitsche Språchinsl im boarischspråching Raum. Wann de Entwicklung a so wia bishea weidagäht, nacha is in dé nextn 30 Jåhr 's Boarische z'Minga ausgstarm.

[dro werkln] Omerkungen, Zitat' und Quäiin

↑ Tasächle is damit da "Zuazongne" gmoant, oiso oana dea sein Hauptwohnsitz in da Stodt hod awa ned do geborn is. De Bezeichnung is in Minga weitgehendst neutral, je noch Betonung und Zsammenhang
↑ Im Johr 2006 san alloa aus'm umligadn Baiern 31843,und insgesamt 92390 Mensch noch Minga zuagroast, bzw. zuazong)
↑ Guat dargstäit in dem Stückl "Ein Münchner im Himmel" vom Ludwig Thoma, wos bsondas bekannt worn is in da Hörspuiversion vom Adolf Gondrell
↑ In dem Spuiplotz steht de Statue vom bekanntastn Münchna Kobold: vom Pumuckl