Nije Testamint
Ut Wikipedy
It Nije Testamint is in samling godstsjinstige skriften dy't ta it kristendom hearre. Dizze skriften foarmen mei inoar it twadde diel fan de Bibel, it hillige boek fan de Kristenen. Alhoewol't de feitlike datearring swier is, wurdt algemien oannomd dat dizze skriften út de 1e en/of 2e ieu nei Kristus komme. De namme is oersetten út it Latynsk fan Novum Testamentum, dat wol in oersetting is út it Gryksk fan Η Καινη Διαθηκη, Hê Kainê Diathêkê, en betsjut "It Nije Ferbûn of "It Nije Testamint".
It Nije Testamint beskriuwt de dieden en wurden fan Jezus dy't neffens it kristendom de Messias (de Kristus) en de stifter fan it kristendom is. Fierder stean de skiednis fan de iere kristlike mienskippen en de lear en de prediking fan de apostelen dêryn beskreaun. It Nije Testamint foarmet ek foar in grut part de grûnslach fan it kristlik leauwen. Yn dat leauwen wurdt bûten de teksten fan it Nije Testamint ek dy fan it Alde Testamint beskôge as it Wurd fan God.
