Napoleon Bonaparte
De Vichipedie, la enciclopedie libare dute in marilenghe.
Napoleon Bonaparte (Ajaccio, 15 di Avost 1769 - Isule di Sante Eline, 5 di Mai 1821). Gjenerâl, om politic e figure storiche di notevule rilevance.
Gjenerâl dilunc la Rivoluzion francese, al guviernà la France dal 1799: al fo Prim Consul dal Novembar 1799 fintremai il Mai 1804 e Imperadôr dai Francês, cul non di Napoleon I (Napoléon Ier), dal Dicembar 1804 al Avrîl 1814 e di gnûf dai 20 di Març al 22 di Jugn 1815. Al fo ancje President de Republiche Taliane (Cisalpine) dal 1802 fin tal 1805 e Re di Italie dal 1805 al 1814, 'Mediatôr' de Republiche Elvetiche dal 1803 al 1813 e 'Protetôr' de Confederazion dal Ren dal 1806 fintremai il 1813.
In graciis di une serie di brilantis campagnis militâts e par mieç di aleancis, al rivà a concuistâ une grande parte de Europe continentâl, espuartant i ideâi de Rivoluzion francese, soredut chei sul rinovament sociâl; dongje dai stâts controlâts diretementri al rivà ancje a controlâ altris reams mandant al podê siei parincj (Spagne, Ream di Napoli, Vestfalie e Olande). Il so domini al finì di colp daspò de disastrose campagne di Russie (1812); sconfit dai Aleâts europeans tal Otubar 1813, Napoleon al abdicà tal Avrîl 1814 e al fo mandât in esili inte Isule d'Elbe.
Al rivà ancjemò a tornâ fûr tal Març 1815, cuant, sintint la delusion dal popul francês pe gnove situazion politiche, al sbarcjà a Antibes e al tornà a Paris "cence sbarâ un sôl colp"; tornât a concuistâ il podê (i famôs Cent dîs), al fo sconfit une altre volte a Waterloo de Setime Coalizion, ai 18 di Jugn dal 1815. I siei ultins agns di vite Napoleon ju passà in esili de Isule di Sante Eline, tal Oceani atlantic, sot dal control dai Inglês. Daspò de sô colade definitive, il Congrès di Viene al ristabilì i vieris Reams europeans che a jerin stâts parâts jù des concuistis francesis, cun cualchi ecezion, come pe Serenissime republiche (Restaurazion).
Napoleon al fo il prin cjâf di guvier de dinastie dai Bonaparte. Al sposà Joséphine de Beauharnais intal 1796, e intes secondis gnossis, la Arciduchesse Marie Luise di Austrie, ai 11 di Fevrâr 1810. I siei eredis a forin il fi legjitim, , Napoleon Luis cognossût come il re di Rome (1811-1832), e doi fiis ilegjitims: Carli, Cont Leone 1806 - 1881 (fi di Catherine Eléonore Denuelle de la Plaigne 1787 - 1868) e Alessandro Giuseppe Colonna, Cont Walewski (1810 - 1868) (fi di Marie, Contesse Walewski 1789 - 1817), ministri dal forest di Napoleon III.
La sô figure e à ispirât artiscj, leterâts, musiciscj, politics e storics, dai siei timps fintremai vuê.
