Arthur C. Clarke
Wikipedia(e)tik
Sir Arthur Charles Clarke, Zientzia-fikzio generoko idazlea eta asmatzailea izan da. Minehead, Somerset, Ingalaterran jaio zen 1917ko abenduaren 16an, eta 2008ko martxoaren 19an hil, Colombo hirian, Sri Lankan.
Bere lan ezagunena 2001: Espazio Odisea Bat edo 2001: A Space Odyssey da. Seguruenez Stanley Kubrick zinemagile famatuarekin batera idatzitako gidoia film arrakastatsua bihurtu zelako.
Robert A. Heinlein eta Isaac Asimov idazleekin batera sarritan zientzia-fikzioaren hiru handien taldea ("Big Three") bezala ezagutu den idazle multzoaren barnean kokatzen dute.
1937 eta 1945 bitartean fanzine ezberdinetan idatzi laburrak argitaratu zituen. 1948 urtean BBC irrati-telebista katearen lehiaketa batentzat idatzi zuen bere lehendabiziko lan arrakastatsua: The Sentinel, ("Zelataria"). Idatzi laburra da, baina bertan 2001: Espazio Odisea Bat historia arrakastatsuaren oinarria aurki daiteke.
Zientzia-fikzio eta zabalkuntza zientifikoko lan asko idatzi zituen, mota askotakoak. "Hitzordua Rama-rekin" (Rendezvous with Rama) edo "Paradisoko Iturriak" (The Fountains of Paradise) bezalako lanak zientzia-fikzio gogorra, zientifikoena edo Hard Science Fiction barruan kokatzen dira. Aldiz, The Sentinel edo The City and the Stars idazlanetan erlijio gaiak sartzen ditu, eta beste batzuetan, Richter 10 adibidez, gai sozialak erabiltzen zituen zientzia-fikzioarekin nahastuta.
Arthur C. Clarke idazlea izateaz gain zientifikoa zen eta satelite eta telekomunikazioei buruz hainbat lan eta idatziak egin zituen. Esate baterako, GEO edo orbita geoestationarioak , Clarkeren orbitak bezala ezagutuak dira.
Ezagunak dira bere esaera batzuk, batez ere zabalkuntza zientifikoko Etorkizunaren Perfilak (1962) (Profiles of the Future; an Inquiry into the Limits of the Possible) liburuan argitaratu eta Clarke-n Legeak bezala ezagutu direnak. Esate baterako, seguruenez famatuena den Clarke-n Hirugarren Legea: "Nahiko aurreratuta dagoen edozein teknologia, magiatik bereiztea ezinezkoa da"
Honetaz gain, asteroide bat bere ohorez (4923) Clarke bezala izendatu zuten (2001 zenbakia zuena dagoeneko erabilita zegoen Albert Einstein-i dedikatuta) eta Australian, Inverloch-en, aurkitutako dinosauro mota bat, Serendipaceratops arthurcclarkei, dedikatu zioten.
Sri Lankan bizi zen eta nazionalitate bikoitza zuen, Erresuma Batuakoa eta Sri Lankakoa. Oraindaino (haren heriotzaren egunean) ez da bere lanik euskaratu izan.
