Neustria
Diwar Wikipedia, an holloueziadur digor
Neustria a oa ur rouantelezh frank e kornog Galia er VIvet kantved. Krediñ a reer edo ar gêrbenn e Soissons.
Dont a rafe anv Neustria eus ar ger frankek Niuster , « an nevesañ », met savet e vije bet an anv 100 vloaz war-lerc'h ar rouantelezh.
[kemmañ] Istor Neustria
Krouet e oa bet pa voe rannet rouantelezh Hlodvig Iañ (pe Clovis hervez ar galleg a vremañ) war-lerc'h e varv e 511 e div lodenn, Neustria hag Aostrazia. Mont a reas Neustria gant Hlotar Iañ, a renas 50 vloaz, hag a zeuas a-benn da adunvaniñ rouantelezh e dad.
Bevennet e oa gant ar stêr Liger er c'hreisteiz, rouantelezhioù Breizh er c'hornog, ha Champagn er reter, met mont a rae betek Flandrez en hanternoz.
Pa varvas Hlotar en 561 e voe rannet ar rouantelezh frank adarre, etre e bevar mab en taol-mañ: (Caribert Iañ, Gontran Iañ, Sigebert Iañ ha Chilperig Iañ). Gant Chilperig eo ez eas Neustria.
Pa varvas Chilperig avat en 584 ne oa ket gwall gozh e vab Hlotar II: un toullad mizioù nemetken. E 613 e teuas da vout roue ar Franked dre ma lakaas e grabanoù war Aostrazia, war lerc'h marv Teodorig II Bourgogn (Thierry gant ar C'hallaoued) , ha war Akwitania war un dro.
Pa varvas Hlotar III en 674 e voe lakaet ar roue Teodorig III e penn gant tud Aostrazia. E-keit-se e oa deuet Akitania da vout dizalc'h. ,
Pa voe sinet Feuremglev Angers e 851 entre rouantelezh ar Franked ha Breizh e voe kollet gant Neustria broioù Roazhon ha Naoned a voe staget ouzh Breizh. Ar vro-se, a vo anvet Breizh-Uhel, ne voe ket brezhonekaet.
[kemmañ] Eus Neustria da Normandi
Da goll ez eas an anv pa voe kemeret hini Northmannia pe Normandi, pa voe roet d'ar Viking Rollon hervez emglev Saint-Clair-sur-Epte en 911.
