Гомельская вобласць

З Вікіпедыя.

**Гомельская вобласць**
**Гомельская вобласць**
Герб	Сцяг
Краіна	Беларусь
Статут	Вобласць
Уключае	21 раён
Адміністрацыйны цэнтр	Гомель
Вялікія гарады	Мазыр Рэчыца Жлобін Рагачоў
Глава	А. С. Якабсан
Старшыня Гомельскай Абласной рады дэпутатаў	В. С. Селіцкі
Афіцыйныя мовы	беларуская, руская
Насельніцтва (2006)	1,476 млн чал.
Шчыльнасць	38 чал./км²
Нацыянальны склад	беларусы — 84,2%, рускія — 11,0%, украінцы — 3,3%, яўрэі — 0,4%, палякі — 0,2%, іншыя — 0,9%
Плошча	40,4 тыс. км²

Код ISO 3166-2	BY-HO
Код аўта. нумароў	3
Афіцыйны сайт

ГОМЕЛЬСКАЯ ВОБЛАСЦЬ, адміністрацыйна-тэрытарыяльная адзінка ў БССР і Рэспубліцы Беларусь. Размешчана на паўднёвым усходзе краіны, мяжуе з Расіяй і Украінай.

[правіць] Гісторыя

Вобласць створана 15 студзеня 1938, узбуйнена ў 1954. Падзяляецца на 21 раён.

У 1984 на тэрыторыі вобласці 17 гарадоў, 13 гарадскіх пасёлкаў, 4 рабочыя пасёлкі.

У 1995 колькасць насельніцтва склала 1594,2 тыс. чал. У вобласці налічвалася 17 гарадоў у т.л. 8 абласнога падпарадкавання, 18 гарадскіх пасёлкаў, 279 сельсаветаў, 2665 сельскіх населеных пунктаў.

[правіць] Прырода

Паверхня вобласці раўнінная, пераважае нізінны рэльеф. Клімат умерана кантынентальны.

Праз тэрыторыю Гомельскай вобласці цячэ Дняпро і яго прытокі: Прыпяць, Бярэзіна (справа), Сож (злева). Найбольшае па плошчы возера Чырвонае.

Асноўную частку сельскагаспадарчых зямель складаюць дзярнова-падзолістыя глебы (супясчаныя і пясчаныя), а таксама дзярнова-падзолістыя забалочаныя глебы і тарфяна-балотныя глебы, у далінах рэк распаўсюджаны поймавыя глебы.

Амаль палову тэрыторыі Гомельшчыны пакрываюць лясы. Самая высокая лясістасць (больш за 70%) у Лельчыцкім раёне. Галоўная лесаўтваральная парода - хвоя звычайная, характэрны таксама бяроза павіслая, вольха чорная, дуб звычайны. Поймы рэк займаюць нізінныя лугі. Балоты, пераважна нізінага тыпу, большай часткай асушаныя.

На тэрыторыі вобласці знаходзіцца Прыпяцкі нацыянальны парк.

[правіць] Насельніцтва

Для вобласці характэрна змяншэнне колькасці насельніцтва: з 1594,2 тыс. чал. у 1995 г. да 1516,1 тыс. чал. у 2003 г. Гарадское насельніцтва складае 69,8% (2003). Найбольшыя гарады: Гомель (481,3 тыс. чал.), Мазыр (111,4), Жлобін, Рэчыца, Светлагорск.

Нацыянальны склад насельніцтва (1999): беларусы - 84,2%, рускія - 11,0%, украінцы - 3,3%.

[правіць] Гаспадарка

У гаспадарчым комплексе важнае месца займае прамысловасць. Гомельская вобласць спецыялізуецца на здабычы нафты і каменнай солі, вытворчасці прадукцыі нафтаперапрацоўкі, чорнай металургіі, асобных галін машынабудаўнічай, хімічнай, дрэваапрацоўчай, лёгкай і харчовай прамысловасці.

На Гомельшчыне вырошчавюцца збожжавыя (ячмень, жыта, пшаніца, кукуруза), кармавыя культуры, бульба, гародніна. Жывёлагадоўля мае мяса-малочны кірунак.

У структуры перавозак важнейшае месца займаюць чыгуначны і аўтамабільны, а таксама трубаправодны транспарт. Ажыццяўляецца суднаходства па рэках.

Большая частка тэрыторыі вобласці забруджана радыёнуклідамі пасля катастрофы на Чарнобыльскай АЭС.