Дуб звычайны
З Вікіпедыя.
ДУБ ЗВЫЧАЙНЫ, летні, чарэшчаты (лац. Quercus robur), лістападнае дрэва роду дуб сямейства букавых.
Дрэва вышынёй да 30-40 м, у дыяметры больш за 1 м. Лісце лопасцевае. Кветкі тычынкавыя ў каташках, песцікавыя - адзіночныя. Плод - жалуд.
Светалюбнае дрэва, расце павольна. Жыве 400-500 і больш гадоў.
На Беларусі дуб звычайны пашыраны па ўсёй тэрыторыі, на поўдні ўтварае дубовыя лясы; найбольш пашыраны на Палессі, дзе захаваліся ўнікальныя поймавыя дубровы. Цвіце ў красавіку-маі, распускаецца пазней за іншыя дрэвы, плады выспяваюць у верасні-кастрычніку. На Беларусі ёсць дубы ва ўзросце 500-550 гадоў, у дыяметры 1,5-1,9 м. Больш за 40 дубоў-волатаў і іх груп абвешчана помнікамі прыроды.
Драўніна дуба адрозніваецца высокй якасцю, трываласцю. Кара з'яўляецца дубільным і лекавым сродкам. З жалудоў можна прыгатаваць сурагат кавы.