Schwen

As Kinigreich Schwen (hochdeitsch: Königreich Schweden) is a Lånd in Nordeuropa. As Kinigriech liagt auf da skandinavischen Håibinsel, grenzt im Westen an Norweng, im Nordosten an Finnlånd und is im siadwesten durch d'Öresund-Bruckn mit Dänemark verbunden. Schwen is Mitglied vom nordischen Råt und seit 1995 vo da europäischen Union.

[dro werkln] Geographie

Schwen is a recht a langgstreckts Lånd: während im Norden da Polarkreis durchgeht, liagt da Siadn auf oana Heh mit de nerdlichsten Teile vo Deitschlånd. Dementsprechend is a s'Klima verschien: im Siadn is mild und im Sommer recht wårm, åber im Norden flackt da Schnee bis in Sommer. An da Grenz nåch Norweng håt's Berg bis ieber 2000 Meter, da hechste is da Kebnekaise mit 2111. Da Rest vom Lånd is eher flåch. In da Ostsee, wo estlich vo Schwen liagt, håm's no zwoa große Inseln, Ölånd und Gotlånd.

Im Hinterlånd und im Norden, wo net so vui Leit wohnan, håt's an Haufa wuide Viech, zum Beispui Elch, Wäif und Bärn. An großn Teil vo Schwen håm's zum Naturschutzgebiet erklärt, weil's eh gnua Lånd håm.

[dro werkln] Beväikerung

Mit mehr wia 10 Millionen is Schwen an oawohnerreichste Lånd in Skandinavien. Davon han stückra 90 Prozent ethnische Schwen. Danem håts vor åim an da Grenz nåch Finnland an Haufa Finnen, dera Språch wo doert a åis Minderheitenspråch oerkannt is, die Samen im Norden und an Haufa zugroaste Ausländer. In månche Stådtteil vo Stockholm håt's mehr wia 95% Ausländer.

De greßten Städt vo Schwen han:

Stockholm (1.253.309 Oawohner 2003)
Göteborg (515.253)
Malmö (261.549)
Uppsala (127.734)
Västerås (107.194)

Stückra 75% vo de Schwen han in da evangelischn schwedischn Kiach, da Rest han Moslems, ånders Christnvoik, Jun oder a gånz wås ånders.

[dro werkln] Politik

Wia d'Nåchbarländer Dänemark und Norweng is a Schwen a konstitutionelle Monarhie. Des hoaßt dass' a an Kini åis Stååtsoberhaupt håm - seit 1973 is des da Carl XVI. Gustav - dass der åber net bsonders vui zum sång håt. D'Regierung werd vo am Ministerpräsidenten gleit, der wo zwår vom Kini ernannt, åber vom Parlament bestimmt werd. As Parlament, in Schwen riksdag ghoaßn, werd ålle vier Jåhr gwäit. Im riksdag han d'wichtigsten Partein d'Sozialdemkraten (Sveriges socialdemokratiska arbetareparti) ind de konservaiven vo da moderatn Sammlungspartei (Moderata samlingspartiet). D'Sozialdemokraten han zwar traditionell d'stärkste Kråft in Schwen und håm in de letzten Jåhrzehnt a enorms Sozialsystem aufbaut, åber seit da letztn Wahl 2006 is da Fredrik Reinfeldt vo da Sammlungspartei im Åmt.