Zebra
De Biquipedia
 |
Iste articlo tién una bersión escrita con una grafía alternatiba esperimental propuesta por bels biquipedistas aintro d'o Biquiproyeuto:Grafía. Puede beyer-se aquí. |
| Zebras | ||||||||||||||||
|---|---|---|---|---|---|---|---|---|---|---|---|---|---|---|---|---|
 Equus quagga chapmanii, zebras de Chapman. |
||||||||||||||||
| Estato de conserbazión | ||||||||||||||||
|
||||||||||||||||
| Clasificazión zentifica | ||||||||||||||||
|
||||||||||||||||
| Especies | ||||||||||||||||
|
 Esta fuella ye escrita en ansotano. |
As zebras son un grupo parafiletico drento d'o chenero Equus, que más responde á una denominazión popular pa una serie d'espezies d'este chenero que no á un grupo ebolutibo (eufiletico) definíu. Á penar d'ixo, bi'stá toda una serie d'autores que las consideran como subchenero, que claman Hippotigris.
A denominazión zebra ye más referida pa os equidos que tienen rayas que no pa os otros. Os estudios cheneticos d'as diferents espezies d'estos animales demostroron que no bi'stá más binculo entre ellas que con os caballos ó burros. O nombre d'as zebras lis ne dión os nabegantes portugueses que primero plegoron ta Africa, basando-se de raso en l'aspeuto fesico d'aquellos animals que primero biyoron, que bi'staba más parexíu con as enzebras que ellos conoxeban d'Iberia que con denguna cosa más.
As zebras se conoxe que son agún oi unos d'os equidos más antiguos, más que más a zebra de Grevy, e que os otros bi salión dispués á partir d'anzestros comuns con caballos e someros. A carateristica más rolliguera que bi cale referir d'as zebras no son que as rayas suyas, que s'alzan como churrumallos por todo o suyo cuerpo. Estan animales d'as grans planas d'Africa porque dize que se extinguión d'a resta d'os continentes. Biben en rebaños do o más gran capino ye un masto que ye l'unico en aparexar-se. En tiempos de sequera bellos grupos s'achuntan pa emprender migrazions que á ormino conziden parzialment con as d'otros animals d'a sabana, como os ñus, pa buscar-se zonas do bi'stase yerba más berde.
As zebras son grans corredoras, e cuando se beyen preseguidas de zerca pueden fer maniobras en zica-zaca pa esbarrar-se. As luitas entre os mastos se fan á muesos e calzes. Se conoxe que as zebras son de buen domesticar, e especialmente porque bellas d'as espezies son resistentes á la fizada d'os inseutos e á determinadas malotías que éstos transmiten, estioron apreziadas por os mainates colonialistas d'o sieglo XIX en Africa, que i biyoron una oportunidat pa aprobechar-las como animals de carga e d'abríos do con os machos e caballos no bi'stió negocio. A frebera d'este aspeuto estió tan importante que plegó á aber zebras que tiraban de carruaches en as carreras de Londres, por exemplo.
[editar] Espezies e sozespezies
- Zebra d'as planas u común; Equus quagga.
- Quagga; Equus quagga quagga.
- Zebra de Burchell; Equus quagga burchellii, antes más clamada Equus burchellii.
- Zebra de Grant; Equus quagga boehmi.
- Zebra de Selous; Equus quagga borensis.
- Zebra de Chapman; Equus quagga chapmanii.
- Zebra de Crawshay; Equus quagga crawshayi.
- Zebra de montaña; Equus zebra.
- Zebra de Hartmann; Equus hartmannae.
- Zebra de Grevy; Equus grevyi.
