Groafschap Vloandern
Uit Wikipedia
't Groafschap Vloandern ountstound in de twiddn elt van de 9e êeuwe achter da Karel den Kletsn 't West-Frankisch ryk o g'erfd in 843. 't Kerngebied van Vloandern lag ton tusschn Oudeburg, Eirdenburg (Aardenburg) en Tourout. In 869 kost Boudewyn met den Yzern Oarm in grôte moate zelfstandig wordn teegnover de Fransche keunienk. 't Kerngebied van Vloandern lag ton round Brugge. Ze breidegen under gebied uut tout an de Schelde.
Inoud |
[bewerkn] Vôorgeschiedenisse
't Geborteproces van Vloandern begunt al van styf verre in den tyd. De menschn die d'r ton weundn woaren e miengelienge van verschillige volkn die lange 'n eign identiteit, 'n eign noame en 'n eign verleedn addn. In 58 vo Christus viel de Romeinse generoal Gaius Julius Caesar 't gebied binn da nu Vloandern is. Deur z'n beschryviengn d'r over weetn me dat er ton Belgische (Belgae), Germoansche en Keltische volksstammn weundn lik de Menapiërs, de Morinen en de Eburonen. De Romeinn verdêeldn 't gebied in 2 provincies: Germania inferior in 't ôostn en Gallia Belgica in 't westn.
In 293 mostn de Romeinn ’t kustgebied beveilign teen d’involln van Saksische zêerovers en Frankn. De versterkte vestiengn wierdn Litus Saxonicum genoemd. d’Outn fortn woarn nie sterk genoeg en Maximianus en Constantius lietn nu fortn in steen bouwn w.o. de castellum in Oudenburg en verzekers ôok in de kuststreke. D’r zyn restn gevoundn van ’n boot, ’t bewys dat er commerce gedoan wierd tusschn de Gallo-Romeinsche nederzettienge en verschillige platsn in Gallië en Iengeland. Round 379 woarn d’r nog ossan troepn gelegerd in Oudenburg en in Zerkegem teegn de Saksische piroatn. D’r woarn veel Germoann by die under doa met under familie gevestigd aan. Ze vormdn de vaste grenstroepn en wierdn Limitanei genoemd. Ze droungn under eign cultuur ip en azo begost de germanisoatie van de streke.
[bewerkn] Van de 5de tout de 8ste eeuwe
De Romeinse bezettienge deurde tout in 't joar 406. Ton kreegn Frankische stammn de controle over de gewestn. De Merovienger Clovis I sloagde d'r in van de verschillige Frankische stammn te verênign. Deur em kwoamn de gebiedn die nu Vloandern zyn ôok mêer ounder invloed van 't katholiek geloof.
In 409 woarn de Angelsche en Saksische piroatn nie mi te stoppn deurdat de Romeinn weg woarn. Sommigte Saksische bendes vestigdn under an de kust, woa dat de bevolkienge gevlucht was noa ’t binnland, en andere stoakn ’t kanoal over en vieln Iengeland binn.
In de 5e en de 6e eeuwe wierdn de kuststreekn were overspoeld deur de zêe, die ’t woater langs ‘t Zwin, ’n zêeoarm van 25 kilometer lank, tout in ’t loatere Brugge liet stroomn langs de riviere de Reie (ton de Rugja genoemd). Round 570 begostn ôok de Vikings uze gebiedn in ’t nôordn van Neustrië en Austrasië te plundern. ’t Woarn Deenn, Noorn en Zweedn en ze wierdn ier Nordman in ’t Germoans genoemd.
Vanof de 6e eeuwe wierd ’t Christendom ier anveird. Round 650 kwoamn d’r Iersche missionoarissn preekn in ‘t municipium Flandrense en in ‘n levensbeschryvienge van Sint-Eligius, de Vita sancti Eligii (ca.590-660), wierd er vo d’n eeste ki over de Vloanderngouwe gesprookn. Andere prekers woarn d’ illign Amandus, Livinus en Willibrordus.
Vanof de 7e eeuwe trokt de zêe em stilletjes an were en de polderstreke wierd were beweunboar. De droge schorreground was surtout goed vo schoapn te kweekn. Veel Friezn, ton ol specialistn in ’t anleggn van dykn, aan under an de kust kommn vestign (t’ oorn an ’t verschil van ’t kustdialect) en de Frankn begostn veel commerce te doen met de Scandinoavische landn.
Deur de veroverienge van Gallië deur de Frankn woarn uze gewestn were e dêel van e grôot ryk. Volgns de Frankische geweunte wierd e keunienkryk verdêeld ounder de verschillige zeuns van de keunienk. Doadeure kwamt er instabiliteit en verzwakte 't keunienklik gezag. In de loop van de 6e tout de 8e êeuwe wierd 't Frankisch Ryk geregeld verdêeld en erênigd. Uutendelik wierd 't ersteld deur een nieuwe dynastie: de Karoliengers.
[bewerkn] De 9ste eeuwe
Ounder Karel den Grôotn (768-814) en Lodewyk den Vroomn (814-840) bereikte 't Frankisch ryk z'n toppunt.
In 802 liet Karel den Grôotn de Frankische (Salische en Ripuarische) wettn anpassn. Vo de kuststeedn liet ’n de Friesche wet vaste leggn en vo de Saksische gebiedn (die juste veroverd woarn), de Saksische wet. De Vikings begostn in dien tyd mêer en mêer uze streekn te plundern en Karel den Grôotn liet verdedigingswerkn bouwn an de kust. ’t Gebeurdeg ôok dan z’under ier bluuvnd vestigdn. De vôorouders van de menschn van de streke kunn dus Keltn, Germoann, Friezn en Scandinoavn zyn.
Binst dat Lodewyk den Vroomn nog leefde begostn z'n drie zeuns al de stryd vo d'erfipvolgienge. De erfenisse wierd beslist deur 't Verdrag van Verdun in 843. Karel den Kletsn krêeg 't westelik dêel (woarounder Vloandern) en Lodewyk den Duutscher 't ôostelik dêel. Die verdêlienge legde de groundslag vo de loatere keunienkrykn Frankryk en Duutsland. Den oudste zeune Lotharius krêeg 't middelste dêel moa in 870 gieng dat ôok noa Lodewyk den Duutscher. De Schelde vormde de grenze tusschen Frankryk en 't Duuts ryk en da blêef azo tout den tyd van Keizer Karel V (1519-1558).
Uze gebiedn krêegn mêer en mêer of te reeknen met plundertochtn van de Vikiengs. Ze droungn met under snekkn zô verre meugelik ’t land binn en ze noemdn die plekke woa dat de Reie en de Beuterbeke tegoare kwoamn Bryghia, wat dat in ’t Oud-Noors anlegplatse wilde zeggn. Boudewyn met den Yzern Oarm liet round 864 e versterktn burcht bouwn ip die plekke woa da nu de Burg is. ’t Was eest ’n versterkienge in out. An z’n burcht liet ’n ôok e Pre-Romoansche kapelle bouwn, loater de Sint-Donaaskerke . De menschn kwoamn under d’r round vestign en azo ountstound de stad Brugge.
[bewerkn] De Groavn van Vloandern
Uut de Vloanderngouwe groeide 't Groafschap Vloandern en Boudewyn met den Yzern Oarm (862-879) was den eestn groaf. In 't gebied ten westn van de Schelde bouwdn Boudewyn en z'n noakommeliengn under machtsgebied uut vanof de streke round Brugge. 't Groafschap Vloandern strekte em uutendelik uut over alle gebiedn ten zuudn en ten westn van de Schelde, 't Zêeuws-Vloandern van nu en een dêel van Frankryk inbegreepn tout over Rysel. De Vlamsche groaf was de vazal van de Fransche keunienk.
Boudewyn I stierf in januoari 879 en je wierd ipgevolgd deur z’n zeune Boudewyn II den Kletsn (879-918), die de boasis geleid et van ’t Groafschap Vloandern. Ie en z’n zeune Arnulf I èn ’t groafschap zuudwoarts uutgebreid tusschn 879 en 965.
Van in 883 wast er vele contact tussch Iengeland en Vloandern vor under verweir teegn de Vikings t’organizeern. In 884 trouwde Boudewyn II met Elftrudis (Aelfthryth), de dochter van Alfred den Grootn, keunink van Wessex. Je most em in z’n burcht in Brugge verdedign teegn keunink Odo van West-Francië, die em wilde belettn van z’n groafschap verder uut te breidn.
[bewerkn] De 10ste eeuwe
In september 918 wierd ’n ipgevolgd deur z’n oudste zeune Arnulf I, den Grôotn. (918-965).
Arnulf I voegde ’t ryke Artesië by ’t groafschap. Loater in de 12ste eeuwe most Filips van den Elzas ’t were ofstoan an keunink Filips II van Frankryk.
In 944 zyn ze begost met de verbouwienge van de burchtkapelle ip de Burg tout ’n Karolingische kerke. Arnulf I, groaf van Vloandern en kleenzeune van Boudewyn I, liet de kerke no ’t model van de Paltskapelle van Karel den Grôotn in Aakn bouwn. ’t Was e symbool van groafelikke macht. Round 960 et ’n in de kerke e seculier kapittel gesticht met ’n college van proost, deekn en 12 kanunnikn. Vanof 958 regeerde z’n enigste zeune Boudewyn III (958-962) mee, moa je stierf ounverwachts an de moazels (of pokkn) in 962. J’aad e zeune, de loatern Arnulf II (965-988), die z’n grôotvoader in 965 ipvolgde.
De volgendn groaf Boudewyn IV met den Board (988-1035) aad e moeilikke begunperiode. Je most oadelikke rebelln, die achter d’n dood van z’n voader in ipstand woarn gekommn, overwinn. Je kost z’n gezag erstelln deur ’t groafschap te verdeeln in Burggroafschappn.
[bewerkn] De 11ste eeuwe
In meie 1035 wierd Boudewyn IV ipgevolgd deur z’n zeune Boudewyn V van Rysel (1035-1067). Z’aan tegoare tusschn 988 en 1067 ’t groafschap styf uutgebreid in oostwoartse richtienge, gebied van ’t Duuts Illig Rôoms Ryk. Azo ountstound Ryksvloandern (de gebiedn in lêen van ’t Ryk) tegenover Krôonvloandern (de gebiedn in lêen van de Fransche krone). De Vlamsche groavn aan nog noois zo sterk gestoan.
De loate middelêeuwen woaren een goudn tydperk vo 't zudelik dêel van de Nederlandn. In de loop van den elfste tout de vêertienste êeuwe groeide 't groafschap Vloandern uut tout 'n machtige lêenstoat. De steedn, de ambachtn en de commerce bloeidn en maktn Vloandern êen van de rykste gewestn. Mè Brugge a Vloandern êen van de belangrykste financiële centra van West-Europa.
In de 11ste eeuwe wierd er ol an internationoale commerce gedoan. Emma, keuniginne van Iengeland, dochter van Richard I van Normandië, kwam in dien tyd no Brugge an ’t of van Boudewyn V. Doar is ‘t Encomium Emmae geschreevn, ’n loflied over keuniginne Emma, woarin dat er sproake is van de Brugsche commercantn en de kostboare productn en ôok dan d’Iengelsche scheepn rechte tout by Brugge voardegen. Mathilde, de dochter van Boudewyn V, trouwde mè Willem de Veroveroare, ertog van Normandië, die in 1066 by de Slag van Hastings Iengeland veroverde en tout keunink van Iengeland gekroond wierd in Westminster (Londn). Mathilde wierd doar in meie 1068 gekrôond en gezalfd tout keuniginne van Iengeland.
De zeune van Boudewyn V, Boudewyn VI (1067-1070) verenigde Henegouwn mè Vloandern deur te trouwn mè Richilde van Henegouwn, mor in 1071, ounder Robrecht de Fries, geraktn de twi groafschappn were uut makkoar.
De volgndn groaf van Vloandern was z’n zeune Arnulf III, den Oungelukkign (1070-1071), die moar e poar moandn geregeerd et, vandoar z'n bynoame. Ip 22-02-1071, by de slag van Kassel, ist ‘n an z’n viftien joar versleegn deur z’n nounkel, Robrecht den Fries. J’is gesneuveld binst ’t gevecht. Keunink Filips I van Frankryk stound an de kant van Arnulf III, moa j’erkende nu toch Robrecht den Fries (1072-1093), de joungste zeune van Boudewyn V, ols nieuwn groaf van Vloandern. In 1086 vertrokt ’n noa ’t Illig land en z’n zeune Robrecht II wierd z'n regent. In 1089 bouwde Robrecht II d'administroatie voort uut deur de provoost van ’t Brugs Sint-Donatuskapittel tout kanselier en belastingountvanger van ’t groafelik domein te benoemn.
Robrecht II van Jeruzalem (1093-1111) volgde z'n voader ip in 1093 en je wierd in 1111 ipgevolgd deur z'n zeune Boudewyn VII (Hapkin of met de Byle).
[bewerkn] De 12ste eeuwe
In juni 1119 wierd Boudewyn VII (1111-1119) groaf van Vloandern. Z’n kozyn, Karel van Denemarkn, loater bygenoamd den Goein, die an ’t Vlams hof verbleef sedert de môord ip z’n voader, was z’n adviseur. Korts vo z’n dôod e Boudewyn VII, die gin kinders aad, Karel den Goein angeduud ols ipvolger. Clementia van Bourgondië, de weduwe van Robrecht II en moeder van Boudewyn VII was doa teegn. Zy steunde de bastoardzeune van Robrecht den Fries, Willem van Yper, burggroave van Yper. Karel den Goein (1119-1127) et ’t uuteindelik gewonn. Je was vrêe populair by ’t geweun volk en je wilde de macht van de Erembalds vermindern. Doarom èn z'em d'n twiddn moarte 1127, ’s nuchtnds binst z’n gebed in de Sint-Donaaskerke, vermôord. Den zeevnstn moarte 1127 stak Gervaas Van Praet d’n ipstand teegn de Erembalds in gank.
Vloandern gerakte in e serieuze crisis, woavan dat de keunink van Frankryk profiteerde deur de Normandiër Willem Clito, ‘n achterkleenzeune van Boudewyn V te kiezn ols ipvolger. Den 23sten moarte volgde Willem Clito (1027-1028) Karel den Goein ip, moa de Bruggeliengn verzettegen under teegn em deur zyn anti-Iengelschn politiek. Economisch kwoamn Vloandern en Iengeland goed overêen, omdat de Vlamsche loaknindustrie Ingelsche sjette verwerkte. Z’n regerienge deurde mor e joar. Ip 27 juli 1128 ist ’n gesneuveld in Aalst en Diederik van den Elzas (1128-1168), klêenzeune van Robrecht den Fries, volgdeg em ip. Brugge kreeg van em enigte belangryke voorrechtn, keurn genoemd.
In de elfste eeuwe was Brugge uutgegroeid tout e commercieel center van Europees niveau. In die periode was de nateurlikke verbindienge van Brugge met de zêe begunn te verzandn. Mor in 1134 veranderde de Vlamsche kustvlakte deur e stormvloed. D’r was e diepe voargeule ountstoan, ’t Zwin, die liep tout in Damme. Brugge bleef doadeure tout an de 15ste eeuwe verboundn met de zêe, met de vôoroaves Damme en Sluus. Azo kostn ze tusschn de 12ste en de 15ste eeuwe uutgroein tout ‘t importentste commercecenter van Noord-West-Europa. Vanuut Brugge wierd ‘t Vlams loakn, e wulln stoffe van oogstoande kwaliteit, over hêel Europa uutgevoerd. In de 12ste eeuwe was de loaknindustrie de belangrykste inkomste. Van grôot belang was de invoer van Ingelsche sjette vo de fabricage van da loakn. De bloeiende loaknindustrie bevorderde d'ountwikkelienge van de commerce en de politieke machtsuutbreidienge van de grote steedn Brugge, Gent en Yper.
De zêeroutes wierdn geprefereerd omdat de weegn over land slicht woarn en doavan kost Brugge profiteern. Grôte zeilbôotn met Ingelsche wulle, Spoans fruut, wyn uut de streke van Bordeaux en Ôosterse kruudn voardegen Brugge binn en vertrokkn were mè luxueuze Vlamsche loakns en z’aan ‘t olleenrecht ip de commerce mè Scandinavië en Rusland. Ip de Brugsche markt wierd er o.a.vis en out uut Scandinavië en amberstêen en fourreure uut Rusland verkocht. D’Ôosterse productn kwoamn binn langs Genua en Venetië.
O Diederik van den Elzas in 1157 noa ’t Illig land vertrok kwam z’n zeune Filips van den Elzas (officieel 1168-1191) an de macht.
In 1163 stichtte Filips van den Elzas twi nieuwe oavesteedn an de kust: Nieuwpoort en Grevelingn (Frans Gravelines). En in 1177 brocht 'n êeneid in de rechtn van de grôte steedn Atrecht, Brugge, Yper, Rysel, Dowaai (Frans Douai), Sint- Omaars en Gent en je gaf under stedelikke vryeedn. Je stichteg ôok Mardyk. In 1180 miekt ’n van Damme een echte stad en je liet ’t Groavenkastêel in Gent eripbouwn. In 1183 stichtegt ie nog twi oavesteedn: Biervliet en Duunkerke.
O de Franschn keunink Filips II, bygenoamd Filips August, an z'n 15 joar ip de trôon kwam was Filips van den Elzas z'n voogd. Filips van de Elzas gaf z’n nichte Isabella van Enegouwn, dochter van z’n zuster Margaretha van den Elzas, an keunink Filips II van Frankrijk tegoare met Artesië.
In 1191 ist 'n gesneuveld in Palestina binst de derdn kruustocht. Je wierd ipgevolgd deur z’n zuster Margaretha, die getrouwd was mè Boudewyn V van Enegouwn, en die Boudewyn VIII van Vloandern (1191-1194) wierd. O z’n vrouwe Margaretha in 1194 stierf dêed ’n ofstand van ’t groafschap Vloandern en gaf ’t an z’n oudste zeune Boudewyn IX (1194- 1205).
[bewerkn] De 13ste eeuwe
In 1200 stichtte Boudewyn IX d’n êestn joarmarkt in Brugge. In 1202 vertrokt ’n vo de vierde kruustocht. Z’n vrouwe Maria van Champagne wierd z’n regente. In 1204 wierd Constantinopel ingepakt deur de kruusvoarders en d’n neegnstn meie verkôozn ze Boudewyn IX tout keizer van Constantinopel. E weke loater was de krônienge. Mor in 1205 stierft ’n in de kerkers van Bulgareye. Z’n minderjoarige dochter Johanna van Constantinopel (1205-1244) volgdeg em ip. Filips van Naamn, eur nounkel, was eur regent tout da ze trouwde in 1212 mè Ferrand, de zeune van de keunink van Portugal. Achter eur dôod wierd Johanna van Constantinopel ipgevolgd deur eur zuster Margaretha van Constantinopel (1244-1278). Eur twidde vint was Willem van Dampierre uut de streke van Troyes, de zeune van de drost (ippermoarschalk) van Champagne. Under oudste zeune Willem stierf in 1251. Under twidde zeune was Gwyde, die in 1246 trouwde mè Mathilde van Bethune. Van 1252 deelde Gwyde de macht mè z’n moeder. Moar in 1278, an eur 77 joar, gaf ze de macht helegans over an eur zeune Gwyde van Dampierre (1278-1305), den eerstn groaf uut ‘t uus Dampierre.
Deur de loaknindustrie was Vloandern ofankelik gewordn van d’Ingelsche sjette, binst dat de groaf lêenman was van de Franschn keunink. Da zorgde vor een twêedêlienge ounder de Vlamsche bevolkienge. D’r ountstoundn Frans gezinde lelioards, genoemd noa de lelie in ‘t woapn van de Franschn keunink, en pro-Ingelsche klauwoards, een volkspartye die under noemdn noa de klauwende lêeuw van ‘t woapn van Vloandern. Gwyde van Dampierre voerde een Ingelsgezinde politiek en kwam azo in conflict met zyn lêenhere, de keunink van Frankryk. De moeilikeedn van Gwyde mè Frankryk woarn begost o Filips IV den Schoonn (1285) ip den trôon kwam. Gwyde zocht steun by den Ingelschn keunink Eduard I.
[bewerkn] De 14ste eeuwe
In 1300 wierd Vloandern bezet deur Frankryk en loater g’annexeerd. D’r volgdn stedelikke ipstandn in Vloandern w.o de Brugse Mettn mè kort d’r achter de Guldnspoornslag ip 11 juli 1302 by Kortryk, woa dan de Vloamiengn ‘t Frans leger versloegn.
Gwyde van Dampierre stierf in 1305 in e gevang in Frankryk en je wierd ipgevolgd deur z’n zeune Robrecht III van Béthune (1305-1322).
D’uutvoerienge van ‘t vo Vloandern styf noadelig Verdrag van Athis-sur-Orge è zyn stempel gedrukt ip heel ‘t bewind van Robrecht III.
Zyn twidde vrouwe was Yolande van Bourgondië, de dochter van Mathilde II, gravinne van Nevers. O Mathilde stierf in 1280 wierd Robrechts oudste zeune Lodewyk groaf van Nevers ols Lodewyk I van Nevers. Je stierf in 1322, nog vo z’n voader, en kost dus gin groaf van Vloandern wordn. Zyn zeune Lodewyk II van Nevers volgde zyn grôotvoader Robrecht III ip ols Lodewyk I van Vloandern, Lodewyk van Nevers genoemd (1322-1346).
’t Verdrag van Athis-sur-Orge drukte zwoar ip ’t economisch leevn in Vloandern en in 1323 kwoamn de boern van Kust-Vloandern in ipstand (1323-1328) ounder leidienge van Klaas Zannekin. Den ipstand was surtout gericht teegn de maniere woarip da groaf Lodewyk van Nevers de belastiengn verôogd aad in ipdracht van Karel IV den Schoonn, de keunink van Frankryk. Teegn 1325 was bykan hêel Vloandern bezet deur ipstandeliengn.
Zannekin kost de steedn Nieuwpoort, Veurn, Kortryk en Yper verovern en ze paktn Lodewyk van Nevers gevangn in Kortryk. Ze kreegn steun van Robrecht van Kassel, z’n nounkel, die uutgeroepn wierd ols ruwoard of regent. Ze probeerdn ôok Gent en Oudenoarde in andn te krygn moa da mislukte. De groaf die ol van 1325 gevangn zat wierd in 1326 vry geloatn en je vluchtte noa Frankryk vo steun te zoekn by de Franschn keunink.
Ip 23 augustus 1328 versloeg de nieuwn keunink Filips VI, den eestn keunink van ’t uus Valois, de Vlamsche boern mè z’n leger in de Slag by Kassel (1328) en kwamt er een ende an den ipstand.
Ip 23 november 1334 wast er een enorme overstromienge an uze kust, d’overstromienge van Sint-Clemens genoemd, die de dykn van verschillige kuststeedn in Vloandern en Olland brak. Ostende en Blanknberge stoundn helegans ounder woater en Scarphout is ton verdweenn in de zêe. Langs ’t Zwin èn ze zêre de dykn moetn verôgen.
Deur de steun van Lodewyk van Nevers an Frankryk teegn Ingeland, gerakte Vloandern in een economischn crisis, deurdan d’Ingelsche in 1336 stoptn mè wulle an te voern. Doadeure vielt de loaknindustrie stille met ols gevolg werklôoseid, ounger en socioale ounlustn.
In oktober 1337 eiste Edward III, sedert 1327 keunink van Ingeland, de Fransche krône ip. In 1328 was ’t uus Capet uutgestorvn. Je was nog ertog van Normandië en z’n moeder, Isabella van Frankryk, was de dochter van de Franschn keunink Filips IV den Schoonn, gestorvn in 1314. Da was ’t begun van de Ounderdjoarigen ôorlog (1337-1453).
De Gentenoars, ounder leidienge van Jacob van Artevelde, kwoamn in 1338 in ipstand. Jacobs politiek die eest neutroal was kôos nu de kant van Ingeland. De groaf vluchtte noa Frankryk, de Vlamsche steedn slootn een verbound met Ingeland en d’Ingelsche wulle kêerde were. Binst gevechtn tusschn de gildn van oarme volders en ryke wevers is Jacob van Artevelde ip 17 juli 1345 vermôord.
Lodewyk van Nevers stierf in de Slag by Crécy in 1346, teegn d'Ingelsche. Zyn ipvolger, ols groaf van Vloandern, wos Lodewyk van Male (1346-1384).
Zyn dochter Margaretha van Male trouwde in 1369 met de Bourgondischn hertog Filips den Stoutn, de broere van de Franschn keunink Karel V.
In 1379 kwam Gent, ounder leidienge van Filips van Artevelde, de zeune van Jacob, in ipstand teegn Lodewyk van Male. Met d’ulpe van z’n schôonzeune Filips den Stoutn kost Lodewyk de Slag by Westrôzebeke winn ip 27 november 1382.
Ip 9 meie 1382 was Lodewyks moeder, die gravinne van Artesië was, gestorvn. Azo krêeg Vloandern Artesië were.
Lodewyk Van Male stierf in 1384 en was de latstn groaf van Vloandern uut et uus Dampierre.
[bewerkn] De Bourgondiërs
An 't ende van de 14e êeuwe krêeg de dynastie van de Bourgondische Ertoogn, 'n zytak van de Fransche keuninklikke familie, voet an de ground in de Nederlandn. Deur te trouwen met Margaretha van Male (1384-1404), dochter van de Vlamsche groaf Lodewyk van Male, wierd Filips den Stoutn, ertog van Bourgondië, zelve groaf van Vloandern. Deur erfipvolgienge, trouws en veroveriengen krêegn zyn zeune Jan zounder Vrees en loater zyn klêenzeune Filips den Goein de mêeste van de Nederlandsche gewestn in under bezit. Karel den Stoutn volgde zyn voader Filips den Goein ip en zyn dochter Maria van Bourgondië trouwde met Maximiliaan van Oostnryk. Doadeure kwoamn de Bourgondische erflandn in Habsburgs bezit. Filips den Schoonn was under ênigste zeune.
[bewerkn] De Habsburgers
In 1555 erfde Filips II de Nederlandn en de Spoansche bezittingen van z'n voader Karel V. Deur den ipstand teegn Filips II en de doarip volgnde Tachtigjoarign Oorlog (1568-1648) raktn de Zudelikke Nederlandn en de Nôordelikke Nederlandn van mekoar geschid. De zudelikke gewestn blêevn trouw an under keunienk en de nôordelikke vormdn de Republiek der Verenigde Provinciën. In 1713 kwoamn de zudelikke gewestn in andn van de Ôostnrykse Habsburgers.
De Fransche Revolutie makte een ende an 't Ôostnryks bewind in de Zudelikke Nederlandn. Teegn 1795 woarn de Ôostnrykers definitief verdreevn. Kort doarip wierdn uze gewestn geanexeerd deur de Fransche republiek. 't Groafschap Vloandern wierd ingedêeld in twêe departementn (Leie en Schelde), woarvan dat de grenzn soamenvieln met de loatere provincies West-en Ôost-Vloandern.
[bewerkn] Lyste mei de Groavn van Vloandern
Zie 't artikel groaf van Vloandern.
