Verona

Da Wikipedia, ła ençiclopedia libara.

Verona

[[Image:{{{panorama}}}|300px|Panorama di Verona]]

Nome ufficiale:

{{{nomeUfficiale}}}

Latitudine: 45° 26′ 0
Longitudine: N° 10′ 59

59 m s.l.m.

206,63 km²

259.068 31-12-04

1182 ab./km²

Avesa, San Michele Extra, Santa Lucia, San Masimo all'Adige,Quinzano, Quinto di Valpantena, Poiano di Valpantena, Parona di Valpolicella, Montorio Veronese, Mizzole, Marchesino, Golosine, Chievo, Cà di David e Moruri

Comuni contigui:

Busolengo, Buttapietra, Castel d'Azzano, Grezzana, Mezzane di Sotto, Negrar, Pescantina, Roverè Veronese, San Giovanni Lupatoto, San Martino Buon Albergo, San Mauro di Saline, San Pietro in Cariano, Sommacampagna, Sona, Tregnago, Villafranca di Verona

CAP:

37100 (città da 37121 a 37139)

Prefiso teł:

045

Codice ISTAT:

023091

Codice catasto:

L781

Nome abitanti:

veronesi

Santo patrono:

San Zen

Giorno festivo:

21 de majo

Sito istituzsionałe

La Arena de Verona de note

Verona l'è la cità più a ovest del Veneto, l'è vizsina al Lago de Garda. La g'ha na posizsion giografica che la ghe permete de esar senpre al centro dei trafichi de mercanti, che i vegna da levante, che i vegna da Milan, chi sia tamochi o chi vegna dal sud. Infati l'è una de i centri piasè importanti par le comunicazsion par strada, e gh'è na mota de robe inportanti par exenpio 'n fiera, 'ndo che i fa tute le spoxizsioni.

I só monumenti prinzsipali i è l'Arena in piazsa Bra, el pontexel de Romeo e Giulieta, el ponte Piera, Piazsa Erbe ndo che gh'è un casin de palazsi pituradi, e 'l Teatro Romano su par le toresele. Le só vie principali i è via Mazsini, via Capèl e via Balòn, se vardemo solo nte la parte pi asè vecia.

Le squadre de balòn de Verona i è do: l'Hellas Verona, che l'è la squadra piesè conoçua e che a gà vinto anca un scudeto anca se deso l'è 'ndà in serie C, e el Ceo, che la g'à xugà in Serie A, 'ndoe la sà xà dimostrà na bona squadra, anca se deso l'è finìa in B. A dir la verità le done a balon jè andà mejo, tre squadre le ga ciapà el scudeto: el Verona Calcio Feminile jutà anca da la Fondasion Gunther, el Foroni Verona e a la fine el Bardolin.

Verona l'è anca sede universitaria, che l'è sempre piasè granda sopratuto par medicina e informatica ance se jè facolta rilativamente nove.

[modifica] Storia

[modifica] Storia antica

Verona l'è sta abità fin da la preistoria co un pochi de insediamenti su la colina de le Toresele (dita anca de San Piero) che domina l'Adese. Se barufa 'ncora deso su ci sia stà la popolazion che ga fondà la sità: l'ipotesi pi acredità, sostegnua anca dal scritor romano Plinio el Vecio^[1], la parla dei Reti, opure de na popolazion de Galli Cenomani, come sostien inveze Tito Livio.^[2] Altre ipotesi le parla de na inprobabile origine etrusca (forsi parché vizin a Verona vivea i Arusnati, popolo de origine mia certa e che secondo alcuni el saria etrusco) e, par ultima, l'ipotesi paleoveneta la dise che la sità la saria stà fondà da la popolazion local dei Euganei.

Comunque l'è stà solo co la fondazion de la colonia romana ne la "esse" de l'Adese (89 a.C.) che è tacà el periodo de grando splendor de la sità. Da insediamento picenin e sconosùo, i romani i ghe na fato un capolaoro d'arte tirando su grandi monumenti, alcuni dei quali i se pol vedar ancora deso. La sità l'è sta in seguito particolarmente doparà nel III secolo d.C. come base militare contro i barbari, e l'è sta rinforzà da l'inperador Gallieno, che el ga fato slargar i muri de la sità.^[3]

[modifica] Storia medieval e moderna

Dal V al XII secolo Verona l'è passà soto el dominio de varie popolazion barbare: dai Visigoti de Alarico I a le distruzion portà da Attila, pasando par el dominio dei Ostrogoti de Teodorico el Grande, fin a rivar a l'ocupazion dei Longobardi guidà da Alboin. Nel 774, proprio a Verona, i Franchi de Carlo Magno i ga batuo l'ultimo re dei Longobardi, Adelchi, causando la fine del periodo Longobardo.

Dal 1136 Verona l'è deentà un Comun, entrando in na faxe de transizsion dal feudalesimo. Da de lora sa sucedùo varie guere e la sità l'è sta doparà spesso come forteza. Dominà prima da Ezelin III da Roman, nel 1262 l'è passà soto le mane dei Scaligeri, che i ga slargà un bel po la sità e i so domini. Dal 1387 Verona l'è sta ciapà dai Visconti de Milan, dopo par un tochetin dai Carraresi, e par finir nel 1404 è rivà i Veneziani. Soto la Serenisima ghè sta quasi quatro secoli de relativa pace, con na breve ma sanguinosa parentesi (1509-1516) al tenpo de la guerra de la Lega de Cambrai, quando i soldai inperiali i ga ocupà la sità.

[modifica] Storia contenporanea

Par savérghene piesè, varda ła vóxe Congreso de Verona.

Nel 1796 l'è sta conquistà da le armate de Napoleon, che nel 1797 el ghe là dà ai austriaci col Tratato de Campoformio, dopo che la sità la gavea proà con corajo a ribelarse ai francesi co le Pasque Veronesi. Dopo col Tratato de Lunéville (1801) Verona l'è stà spartìa in do longo el corso de l'Adese: la parte destra ai francesi, la sinistra (che i francesi i ciamava con disprezo Veronette, da cui el nome Veroneta^[4]) ai austriaci, e cosita l'è restà fin al 1805 quando i austriaci i ga dà el Veneto par intiero a la Francia.^[5]

Col Congreso de Viena (1815), Verona l'era stabilmente in man dei austriaci e la ghe restarà fin al 1866, deentando el vertice che strategicamente contava piasè tra le forteze del Quadrilatero, l'inportante zona militar asburgica che gavea da far da cusineto contro i asalti dei Piemontesi che zercava de conquistar el Lonbardo-Veneto austriaco.

La storia de Verona italiana l'è tacà el 16 de otobre 1866 co la conquista del Veneto da parte dei Savoja dopo la terza guera de indipendenza: da de qua in avanti la sità la ga passà un periodo de relativa tranquilità e prosperità, anca se verso la fine del secolo è tacà un forte fenomeno de emigrazion, soratuto verso le Meriche.

Nel 1882 ghè sta n'aluvion tremenda: l'Adese el ga superà i arzeni e bona parte de la sità l'è ndà soto aqua. Dopo de lora, par metar al sicuro la sità da altre piene, è stà costruii i murajoni, e la sità la ga dovuo rinunciar par senpre a uno dei so aspeti piasè tipici, de "sità che vivea su l'aqua".

Ne la seconda guera mondial l'è sta una de le sità pi colpie dai bonbardamenti. Dopo la caduta del fasismo (1943), Verona l'era difati deentà centro nevralgico dei "republichini" nazifasisti. Col Processo de Verona, Galeazzo Ciano e altri gerarchi fasisti, acusà de ver tramà con Badoglio par far arestar el Duce, iè stà dichiarà colpevoli e fusilà in riva a l'Adese.

Dopo el processo el regime de Salò l'è deentà, se posibile, ancora pi violento e persecutorio. L'atuale santuario de Lourdes sul col de san Leonardo (protetor dei carcerati), zà sede de una cesa omonima dal XII secolo, che l'era sta esproprià da Napoleon e trasformà dai austriaci nel 1838 nel Forte San Leonardo, l'è stà trasformà nel 1943 in carcere politico adibìo a la persecuzion de sitadini ebrei, antifasisti e prigionieri de gurra.

Nel secondo dopoguera, sicome l'Italia l'è entrà ne la NATO, Verona la ga ciapà de novo inportanza strategica, vista che la cortina de fero coi Paesi de l'Est no l'era mia tanto distante. La sità l'è deentà sede del Comando de le Forze Terestri Alleà del Sud Europa (FTASE) e par tuto el periodo de la guera freda ghè sta na forte presenza militar, soratuto mericana, che la sta calando solo in sti ultimi anni.

Ancó Verona la se presenta come na sità dinamica e inportante, economicamente molto attiva, e anca meta turistica de rilievo grazie a la so storia milenaria, dove el passato romano el vive a fianco de la Verona scaligera, che par molti versi la riprende i stessi motivi architetonici e artistici.

[modifica] Monumenti e posti da ndar vedar

El panorama de Verona da Castel San Piero

Bene proteto da l'UNESCO
Patrimonio de l'umanità
Sità de Verona City of Verona

Tipologia	Architetonico
Criterio	C (ii) (iv)
Pericolo	Nisuna indicazion
Anno	2000
Scheda	inglese francese
Patrimoni de l'umanità in Italia

[modifica] Epoca romana

El teatro romano

Verona la ga un mucio de monumenti de epoca romana, tirà su tuti quanti dopo el I secolo a.C., quando la sità l'è sta ricostruia rento de la "esse" de l'Adese. El monumento piasè famoso in asoluto, sinbolo de la sità stessa, l'è l'Arena, el terzo anfiteatro roman par dimension dopo el Colosseo e l'Anfiteatro Capuano,^[6] ma quelo tegnù mejo tra questi, tanto che el vien doparà ancora deso par ospitar el famoso Festival Lirico Areniano, oltre a numerosi concerti.

N'altro famoso monumento l'è el teatro romano, del I secolo a.C., ma riportà a la luce solo nel 1830, quando i edifici che i leteralmente i lo cuerzea iè stà butà zo. D'istà se tien nel teatro na serie de spetacoli che tol el nome de Estate Teatrale Veronese.

[modifica] Epoca medioevale

La Basilica de San Zen

El basso medioevo el ga lasà pochi ricordi a Verona, par via del devastante teremoto del 3 gennaio 1117 che ga vu come epicentro proprio el veronese, e ga fato un mucio de danni. Par colpa del teremoto è cascà parfin na parte de l'anel esterno de l'Arena, lasandoghene in pié solo un tochetin, che l'è sta botà ancora piasè in un sucessivo terremoto nel 1183, creando cosita l'attuale suggestiva forma de l'Arena co lo so "ala". Inoltre un mucio de palazi e quasi tute le cese, i monasteri e i monumenti iè stà seriamente danegià, se non butà zo.

I principali monumenti medievali i risale quindi a dopo del XII secolo. In particolar sto periodo el ga visto la costruzion de un saco de edifici de culto, dei quali quelo piasè famoso l'è la Basilica de San Zen, ritegnù uno dei capolavori del romanico in Italia, e ligà a l'omonima Abazia de San Zen, de cui ne resta la torre ed alcuni chiostri.^[7]

[modifica] Epoca scaligera

Piaza dei Signori co la statua de Dante e el Palazo del Podestà

El centro storico, in particolar piaza Erbe, piaza dei Signori e piaza San Zen, el presenta vari edifici nati durante la Signoria dei Scaligeri, come el Palazo del Podestà (o Palazo del Goerno) e quelo de Cansignorio.

Importantisimo l'era el sistema difensivo costruio dai Scaligeri, che el fasea perno su Castelvecio, fato costruir da Cangrande II de la Scala insieme al ponte Scaligero. El castel l'è sta tirà su tra el 1354 ed el 1376, e l'era pensà no par difendar la sità dai nemici, ma par difendarse proprio dai sitadini; difati el ponte Scaligero el servea par poder scapar via dal castel verso la Germania, dove regnava el genero de Cangrande II, Ludovico el Bavaro. El ponte Scaligero l'è sta costruio ne l'arco de tri anni, tra el 1354 e el 1356, e l'è talmento ciosso che el ga tegnù bota a tute le piene de l'Adese par sié secoli, fin a la note del 24 aprile 1945, quando, a la fine de la seconda guera mondial, i tedeschi, che i stava scapando via, i ga fato saltar tuti i ponti de Verona. Castelvecchio l'ospita inoltre el museo piasè importante de Verona, el museo civico de Castelvecchio.

[modifica] Veronexi famosi

Tra i scritori e i òmeni de cultura famosi nati a Verona, val la pena de nominar almanco Aleardo Aleardi, Scipione Maffei, Ippolito Pindemonte, Emilio Salgari, oltre al storico Giovanni Battista Biancolini e al'umanista Guarino da Verona e el poeta Berto Barbarani. Tra i veronexi famoxi de ancó ghè el genetista Mario Capecchi, premio Nobel par ła medizsina nel 2007.

Tra le personałità famose che gà visù un tòco a Verona o ghe n'ha parlà in tełe só opere, i du piesè famosi jè sicuramente Dante Alighieri e William Shakespeare, Wolfgang Amadeus Mozart. N'altro veronexe celebre, anca se no se conoxe propio ben łe só origini, l'è el poeta latìn Catullo.

[modifica] Evoluzsion demografica

Abitanti censiti

[modifica] Xemełagi

[modifica] Note

↑ Plinio il Vecchio. Naturalis Historia, III, 130.
↑ Tito Livio. Ab Urbe Condita, V, 35.
↑ P. Brugnoli. Le strade di Verona. Verona, 2004. pp. 19-20-22-23-24
↑ Tratto da verona.com URL consultà el 4-12-2007.
↑ Tratto da travelitalia.it URL consultà el 25-10-2007.
↑ I assi esterni i misurano 152 metri x 123 metri, mentre el perimetro l'è de 435 metri. El perimetro de la platea l'è inveze de 391 metri. Dati riscontrabili nel sito verona.com URL consultà il 01-12-2007.
↑ G. Borelli. Chiese e monasteri di Verona. Verona, 1980. pp. 50-53