Linux
Di Wikipedia, la nciclupidìa lìbbira.
Linux è lu nomu dû kernel urigginariamenti sviluppatu di Linus Torvalds. Lu nomu Linux, cu tuttu ca è assai sumigghianti cu chiddu dû sò auturi, ci vinni datu di Ari Lemke, l'amministraturi ca pi primu misi dispunibbili Linux 'n capu internet pi via FTP. Pi èssiri pricisi Linux era lu nomu dâ directory unni stavunu li files dû novu sistema upirativu. Lu nomu scigghiutu di Linus Torvalds era Freax, na mmiscata ntra "free", "freak" e "x", p'innicari megghiu ca era nu sistema UNIX-like.
Cu lu nomu "Linux" spissu si ìnnica sbagghiannu lu sistema upirativu lìbbiru spummintatu 'n capu kernel Linux e sistema GNU, ca secunnu na parti dâ cumunitàti nfurmatica s'avissa pi chistu chiamarisi "GNU/Linux".
Ìndici |
[cancia] Stòria di Linux
[cancia] Lu ncuminciari
Linux vitti luci ntô 1991 grazzi ô carusu studenti Linus Torvalds, ntô mentri lu pruggettu GNU nascìu ntô 1984 pi vulìri di Richard Stallman. Torvalds, appassiunatu di prugrammazzioni, nun era cuntenti dû sistema upirativu Minix (sistema upirativu Unix-like fattu pê scòli, scrivutu di Andrew Tanenbaum, prufissuri urdinariu di Sistemi di Riti all'universitati di Amsterdam), pi chistu vòsi fari nu kernel ca avìa pi scupu l'arricriarisi e studiari comu funziunava lu sò novu computer (nu 80386), addupirannu lu sistema di pirmissu GNU.
Pô fattu ca la licenza di Minix nun pirmittìa la rivisioni dû software eccettu pi mutivi didattichi, Linus Torvalds pinzau di spummintari lu sò kernel sanu sanu. Pi fallu addicidìu di usari la licenza GPL, pi fari 'n manèra ca tutti putèunu cuntribbuiri e addupirallu libbiramenti. Linux ê primi tempi era sulu nu emulaturi di tirminali scrivutu in C e assembly, senza appujarisi a nu sistema upirativu. L'emulaturi di tirminali facìa pàrtiri e cumannava dui thread, unu pi mannari signali â porta siriali e l'àutru pi pigghialli, quannu appoi Linus àppi la nicissitati di lèggiri e scrivìri file nti nu discu, stu emulaturi fu fattu 'n manèra ca putìa criari filesystem. Alleggiu alleggiu stu prugramma si ìju trasfurmannu nti nu sanu kernel ca putìa gistiri nu sistema upirativu e Linus attaccau a pigghiari nfurmazzioni 'n capu ê spicifichi POSIX, dumannannu ajutu ntô newsgroup comp.os.minix ntô pupulari missaggiu dû 25 di austu 1991. La prima virsioni dû kernel Linux, la 0.01, vinni pubbricata nti internet lu 17 di sittèmmiru 1991 e la secunna ntô uttùviru dû stissu annu.
A Torvalds piacìa chiamari Freax lu kernel unni stava travagghiannu, ma a Ari Lemke, assistenti dâ Helsinki University of Technology ca c'avìa datu lu spazziu FTP pô pruggettu (ftp.funet.fi), piacìu dari â subdirectory lu nomu altirnativu di travagghiu Linux.
Nzinu dâ virsioni 0.01 si putìa cumpilari e fari pàrtiri la shell GNU Bash: c'era nu sistema upirativu minimali d'unni pirò putèunu accuminciari assai migghiuramenti. Ô ncuminciari s'avìa lu bisognu di nu computer cu Minix pi cunfigurari, cumpilari e nstallari Linux (nzinu â virsioni 0.10, la 0.11 putìa vèniri cumpilata di Linux stissu), picchì addupirava lu filesystem dû sistema unni s'appujava. Prestu li sistema Linux fonu megghiu di Minix comu funzionalità, Torvalds e àutri sviluppaturi di Linux abbissanu lu sò kernel pi fallu funzionari cchê cumpunenti GNU e li prugrammi user-space pi fari nu sistema upirativu cumpletu, funzionanti e lìbbiru.
[cancia] "Linux is obsolete"
Lu 29 di jinnaru 1992 Andrew Tanenbaum, auturi di Minix, prubbabbirmenti suddiatu dû forti ntiressi a bbèri Linux ntô newsgroup dû sò sistema upirativu scrissi nu missaggiu cô titulu LINUX is obsolete. Ntô post Tanenbaum criticava l'architittura monulitica dû kernel Linux e la sò scarsa purtabbilità. Torvalds ci rispunnìu subbitaniamenti ribbattennu puntu pi puntu a Tanenbaum, sminuzziannu noltri minix e lu sò auturi facennu na stòrica flame war ca tutt'oi si pò attruvari 'n capu diversi siti web.
[cancia] Linux e la riti
Ntâ primavera dû 1992 l'hacker Orest Zborowski arriniscìu a fari funziunari lu server X ntâ virsioni 0.13 di Linux. Pi fari stu fattu Orest appi fari funziunari tutta la struttura dê Unix Domain Socket nnispinsabbili a X Window e quinni nu primu liveddu socket unni vinni appoi custruiuta tutta la struttura di riti di Linux. Riarmenti tuttu avìa statu fattu 'n manèra tanticchiedda cunfunnusa e nun avìa statu ntigratu bonu dintra lu kernel ma Linus accittau lu stissu la patch, picchì cu chista era pussibbili putìri sia addupirari X, sia macari addupirari sta struttura pi dutari Linux di nu stack di riti. Cuntenti dâ nuvità lassau, doppu la virsioni 0.13, la 0.95 senza pinzari a tutti li prubblema di sicuranza ca la riti avissi causatu. P'abbissari sta cosa ntê dui anni ca passanu dâ 0.95 â 1.0 Linus appi addupirari sia n'àutru nùmmiru p'innicari lu liveddu di patch sia li lèttiri di l'alfabbetu (nzinu â virsioni 0.99.15Z, 0.99 15° liveddu di patch, rivisioni Z).
[cancia] La virsioni 1.0
Lu 14 di marzu 1994 lu 16° liveddu di patch dû kernel 0.99 addivinìu Linux 1.0. Fu lu stissu Linus Torvalds a prisintari la prima virsioni stabbili dâ sò criazzioni nti l'Universitati di Helsinki.
[cancia] Oi
Oi, Torvalds cuntinua a diriggiri lu sviluppu dê kernel, ntô mentri àutro parti dû sistema, comu li cumpunenti GNU, sunu fatti spartutamenti. Lu compitu di furnìri nu sistema cumminatu, ca avìa tutti li cumpunenti di basi cchê ntirfacci grafichi (comu p'asempiu GNOME o KDE, ca pê fatti sò si jèttunu 'n capu la prisenza di l'X Window System) e cô software appòicativu, veni ora svurgiutu dê distribbuzzioni. Ntô 1996 vinni scigghiutu comu logu ufficiali di Linux nu pinguinu disignatu di Larry Ewing a cui ci vinni datu lu nomu di TUX, comu accurzata di Torvalds UniX. Àutri genti sustenunu ca si tratta d'accurazata di TUXedo ca ntô ngrisi significa comu "giacca e crivatta" a causa dâ culurazzioni dû corpu dû pinguinu. Oi GNU/Linux arresta lu sistema upirativu prifirutu di migghiara di prugrammaturi spargiuti nti tuttu lu munnu, vèni addupiratu suprattuttu comu server nti ambienti di pruduzzioni ma urtimamenti s'hà fattu putenti macari pi ambienti desktop.
[cancia] La mpurtanza di Linux
GNU/Linux è lu prudottu di appassiunati nnipinnenti spummintatu pi sèmprici sfida ntillittuali, senza lazza cummirciali. Chistu hà fattu dui mpurtanti cunsaiquenzi:
- 'n primu locu lu risurtatu uttinutu è la cullabburazzioni di migghiara di prugrammatura spargiutu nti tuttu lu munnu (pi chistu veni vidutu comu li cchiù granni pruggettu cullabburativu dâ stòria di l'òmu).
- lu secunnu carattiri mpurtanti è la "libbiralizzazzioni" dû prudottu: GNU/Linux è nu software lìbbiru ca pirmetti ê utenti di avìri a disposizzioni nu sistema upirativu cumpritamenti funziunanti sliatu dê classichi lazza cummirciali.
Lu aspettu dâ libbirtà dû prugramma metti ô centru l'utenti dannucci la pussibbilità di taliari e canciari li còdici surgenti, la pussibbilità di addupirari lu software pi qualisiasi causa, la pussibilità di ridistribbuillu ntô furmatu urigginariu o canciatu. Lu sistema GNU/Linux è di cunzidirari transparenti e cumpritamenti cunfigurabbili, pi chistu certiduni vòti, Microsoft Windows, darrèri nu velu di simpricità, ammuccia lu funzionamentu lòggicu dû computer e la mpussibbilitati di uttiniri lu risartatu ca si vulìa. Sta filosufìa pirmetti lu scanciu di nfurmazzioni ntra l'utenti e li prugrammatura e havi comu rinèscita nu prudottu ca havi megghi pristazzioni nti certiduni cosi 'n cunfrontu ê attuali cuncurrenti cummirciali. GNU/Linux è cchiù picca jittatu di l'àutri sistemi upirativi ê virus e 'n ginirali ê malware nfurmatichi pi certiduni mutivi:
- la nfizzioni di na machina, nurmalmenti, è circuscrivuta ô singulu utenti nun cumprumetti lu sanu sistema upirativu.
- quannu vèni scuprutu nu prubblema nti nu prudottu di software lìbbiru s'havi la patch (la curriggiuta) ntô giru di picca uri o jorna rinnènnu vacanti li pussibbilità di nu virus di trasiri nti tali purtusu.
- cuèca sviluppa software malignu, ginirarmenti, vò nfittari lu megghiu nùmmiru di machini pussibbili: datu ca la spargiuta di Windows è assai cchiossai 'n cunfrontu a chidda di sistemi upirativu jittati 'n capu a Linux, lu malware 'n circulazzioni hà statu fattu pi nfittari machini Windows, quinni nun cumpatibbili cu Linux (sulu raramenti li virus sunu multichiattafurma).
- Li utenti di Linux sunu picca nummirusi, ma assai cchiù priparati ticnamenti o canusciunu armenu li basi di nu sistema upirativu, sunu cuscienti di nzoccu fanu e sanu li risurtati ca vonu pigghiari.
Ê nostri jorna, quasi tuttu l'hardware è cumpatibbili cu GNU/Linux.
Ci sunu praticamenti dui suluzzioni quannu l'eseguibbili di àutro sistemi upirativi nun funzionunu: addupirari suluzzioni comu Wine oppuru jiri a furriari tunnu ô prubblema e addupirari nu applicativu sumigghianti sviluppatu pi Linux. Nti tutti dui li casi ci ponu èssiri pussibbilità di falluta e svantaggi ca nun si pò fari a menu di valutari casu pi casu.
[cancia] Li distribbuzzioni di Linux
Nun c'è na sulu virsioni di GNU/Linux, ma ci sunu diversi distribbuzzioni ô sòlitu spummintati di cumunitati di sviluppauri o sucità, ca priparunu e scegghiunu li pachetta di mèttiri. Tutti li distribbuzzioni hanu 'n cumuni lu kernel Linux, mentri si diffirìsciunu pi l'accussì diciutu "parcu software", zoè li pachetta priparati e/o silizziunati dê sviluppaturi pâ distribbuzzioni stissa, pô sistema di gistiuni dû software e pê sirvizzi di ajutu/manutinzioni uffruti.
Ci sunu distribbuzzioni direttamenti funziunanti dê CD senza ca veni richiduta la nstallazzioni nti l'hard disk, comu Knoppix e dirivati: vènunu chiamati distribbuzzioni "live" oppuru "desktop CD".
Certiduni ntra li principali distribbuzzioni sunu:
- ALT linux
- Arch Linux
- CentOS
- Damn Small Linux
- Debian GNU/Linux
- DeLi Linux (distribbuzzioni assai bona pi pc cu 32Mb di Ram o cchiù picca)
- Dreamlinux
- Dynebolic
- Fedora Core
- Foresight Linux
- Fox Desktop
- Gentoo Linux
- Knoppix
- Kororaa
- Mandriva Linux, nzinu ô 2004 canusciuta cô il nomu "Mandrake Linux"
- Mepis
- Puppy Linux
- Quantian
- RedHat
- Rxart
- Sabayon
- Slackware (macari ntâ dirivata Slax)
- Slamd 64
- So.Di.Linux
- SUSE Linux
- Ubuntu Linux (macari ntê varianti Xubuntu, Kubuntu, Edubuntu, Ubuntu Lite)
- Yellow dog (pruggittatu comu sistema upirativu alternativu pâ PLAYSTATION3, assai flissibbili pi chiddu ca rivarda la prugrammazzioni gnome)
[cancia] Curiusità
[cancia] Prununzia
Assai pirsuni nun sunu sicuri dâ prununzia dâ palòra "Linux". Ci ponu èssiri diversi cancianti, ma vèni pi norma prununziatu cu na "i" curta e ccâ prima sìlliba dura, comu nti "LIH-nucks".
[cancia] Intirfaccia Grafica
Ntê primi virsiuni dû sistema, Linux nun havìa intirfaccia grafica. Tuttu si facìa cû "Terminal" scrivinnu cumanni. L'intirfacci venneru dopu, comu "compunenti" 'nstallati ntô sistema. Li principali virsiuni di'ntirfacci grafichi sugnunu KDE e Gnome. Ancora oi l'intirfaccia è solu pî lu confort e emula li cumanni sott'a forma grafica.
[cancia] Virsioni Embedded
La granni spargiuta di Linux e la sò capacitati di funziunari ntê pc a vasci pristazzioni hà nfuinzatu macari l'alittronica. Ô jornu d'oi è pussibbili attruvari chip cumannati di nu Os Linux minimali ma cumunqui capaci di simprificari assai la rializzazzioni di apparati rubbòtichi. N'asempiu di na distribbuzzioni Linux addupirata pi sistemi embedded è OpenWRT.
[cancia] Siparaturi
Ntâ passata di nu sistema Windows a nu Linux, arrisurta prubbabbirmenti evidenti la diffirenza ntra li siparaturi dê directory. Nti Windows s'addopira lu carattiri backslash ("\"); nti Linux, comu macari nti tutti li sistemi Unix (comu macari nti àutri sistemi upirativi), s'addopira lu slash ("/"). Macari lu siparaturi di pircursu ntê URL dê diversi prutucolli di riti (comu li nnirizzi internet) è custituiutu dû slash; lu mutivu è ca li riti di computer e Internet hanu nasciutu 'n capu sistemi Unix.
[cancia] Software
Comu quasi tuttu lu Software dispunibbile su Linux è libbiru (GNU), unu poti installari quarsiasi software solu scrivendu un comandu cû so nomi ntâ l'interfaccia terminal. Esempiu, installari "Amarok", nu lettori mp3 :
apt-get install amarok
(La sintassi poti canciari a sicunnu dâ virsiuni)
[cancia] Liami nterni
[cancia] Liami Esterni
- Linuxpedia (linuxpedia.netsons.org) Enciclopedia lìbbira didicata ô munnu GNU/Linux e Open Source 'n ginirali 'n lingua taliana
- (ngrisi) kernel.org Lu situ ufficiali dû kernel di Linux
- Linux.it situ dâ Italian Linux Society. Pussedi nu elencu dê Linux user group taliani, assai ducumintazzioni 'n talianu e àutri nfurmazzioni 'n capu Linux.
- Linux Facile - Nu tutorial ntruduttivu a Linux rializzata di Daniele Medri.
- Manualinux - Manualinux, lu manuali supra Linux rializzatu di Cristiano Macaluso.
- (ngrisi) Lu post di Tanenbaum Linux is obsolete
- Appunti di nfurmatica lìbbira - Rializzatu di Daniele Giacomini, grannissima òpira supra Linux, lu software libero e la nfurmatica lìbbira.
- Nfurmatica e GNU/Linux - Nu testu supra la nfurmatica cu particulari riferimentu a GNU/Linux, rializzatu da Daniele Masini.
- (ngrisi) Distrowatch - Na lista cumpleta di distribbuzzioni aggiurnata cuntinuamenti.
- LinuxISO - Nu aggiurnatu elencu di mirror e fonti di ISO dê cchiù diversi distribbuzzioni Linux.
- LDZ - Linux Di Zeru (LDZ), parti dû pruggettu DaZero ca furnisci tutorial assai basilari e nnirizzati a utenti finali di Linux pi nu usu supra desktop grafichi.
- Italian Linux Distro Network - È n'assuciazzioni cu diversi purtali pi sustèniri li utenti Linux di diversi distribbuzzioni.
- Informatica Libera - È n'assuciazzioni taliana ca tratta di Linux e, cchiù 'n ginirali, dâ nfurmatica lìbbira.
- Linux di HTML.it - La sizzioni didicata a Linux di HTML.it. Pubbrica artìculi di apprufunnimentu e tutorials di usu.
- LinuxHelp.IT - Purtali lìbbiru didicatu a GNU/Linux e ô software Open Source.
- Distribbuzzioni a cunfrontu
- Linux@P2P Forum Italia - Wiki didicatu a chiddi ca vonu avvicinarisi ô munnu di GNU/Linux, cu particulari arènza pi chiddi ca hanu già espirienza cchê SO Windows.
