Giuvanni Meli
Di Wikipedia, la nciclupidìa lìbbira.
 |
« ...un omu ca non sapìa cunzari na nzalata e pritinnìa di cunzari lu munnu. - (dû puema, Don Chisciotti e Sanciu Panza, unni Sanciu Panza sta discrivennu l'eroi, Don Chisciotti.) »
|
Giuvanni Meli (Palermu, 6 di marzu 1740 - 1815) fu unu dî cchiù granni littirati siciliani.
Ìndici |
[cancia] Vita
Vinìu di na famigghia mudesta e di giòvanni studiàu p'arcuni anni grammàtica e ritòrica. Doppu aviri studiatu filusufìa e midicina fu dutturi a Cinisi. Nta stu pirìudu, liggìu li pueti bucòlici, l'enciclopidisti e Rousseau, scuprennu lu valuri puèticu dâ lingua siciliana chi aduttau pi quasi tutti li soi òpiri.
Ntô 1760 vinni ammittutu nna l'Accademia dû bon gustu e ccà accuminzau a scrìviri li versi, prima pi talianu, poi pi sicilianu. Pubbricau la sò prima òpira, La Fata Galanti, ntô 1762 doppu lu quali vinni canusciutu di tutti li littirati e famigghi nòbbili di Palermu.
Ntramentri ca studiava la midicina ottinìu un mpiegu ntô paisi di Cinisi, vicinu Palermu, comu mèdicu tinutu a stipenniu di l'abbazzia binidittina di S. Martinu dî Scali. Duranti stu pirìudu a Cinisi cuntìnuava la sò attivitati di scritturi, pubbricannu puru quarchi saggìstica d'argumentu mèdicu.
Ntô 1772 si trasfirìu a Palermo, unni ntô 1787 vinni ncarricatu câ càttidra di Chìmica a l'univirsità di Palermu; unni arricugghìu e pubbricàu, 'n cincu vulumi, li soi puisìi siciliani. Ntô 1798, quannu la Curti si trasfirìu di Napuli a Palermo, l'àbbati Meli era già nu scritturi cèlibbri (a stu tempu Meli si fici chiamari àbbati e si vistìu di riliggiusu); lu rè cci assignau na pinsioni, e si didicau cu tranquillità ê littri.
Meli spirimintau cu na forma di linguaggiu ca putemu discrìviri comu nu sicilianu lustru. Pi na manu, chissu significa ca pruvau a scrìviri di suggetti di tanti gènira, spissu pi nu modu umurìsticu e filusòficu, ma pi l'àutra manu significa macari ca la sò scrittura abballarìa tra n'idioma chi ni pari quasi comu nu talianu arcàicu e la parrata parlimintana di strata di ddù tempu[1]. Facirmenti avissi a èssiri propiu d'accussì picchì lu sò tema prifirutu era di cuntrastari li carattirìstici di l'èssiri sicilianu, dunca spissu lu linguaggiu rifletti stu cuntrastu.
[cancia] Òpiri
La Buccolica (1766-1772), spirata di l'Arcadia, pâ majuranza fu scritta ntô pirìudu quannu era dutturi a Cinisi. Turnatu a Palermu cu na fama di scinziatu e pueta, si didicò â puisìa siciliana, arricugghiennu tuttu lu matiriali chi esistìa. Lu sò Poesî siciliani 'n cincu vulumi niscìu ntô 1787, e na edizzioni in sei vulumi niscìu ntô 1814.
Oltri a cumprènniri La Buccolica la raccolta dî puesìi cumprenni puru puemetti satìrici comu La Fata Galanti (1762); lu puema èpicu-umurìsticu Don Chisciotti e Sanciu Panza (1785-1787); li Favuli Morali 1810-1814; l' Origini di lu Munnu (1768); li Elegii; li Canzunetti e Ditirammu: Sarudda.
La majuranza di ssi puisìi vìnniru traduciuti, supratuttu pi talianu, ma puru pi ngrisi (viditi li rifirimenti ccasutta). Ntô 1787, visitannu Palermu, Goethe s'accappitau a lèggiri lu puema cèlibbbri: L'occhi, chi fa parti di nu gruppu di puemi chi cumprènninu La Lìrica (li canzunetti). Goethe s'attruvau d'accussi acchiappatu dû sintimentu di sta puisìa ca iddu traducìu li primi ottu righi pi tudiscu, chiamànnulu Sizilianisches Lied (Canzuni Siciliana). N'àutru puema chi fa parti di La Lìrica, Lu labbru, fu traduciutu pi tudiscu di J. Herder. Nu fattu stranu e picca canusciutu e ca Lu labbru fu lu primu puema scrittu pi na lingua itàlica chi fu traduciutu pi finlannisi. Ssi fatti ni dùnanu n'idìa dû riguardu ca li littirati europei tinìanu pi Meli nni l'ùrtimi anni dû sèculu XVIII.[2]
[cancia] Asempi di puisìa
Li Surci di Fàvuli Murali [3]
-
- Un surciteddu di testa sbintata
- avìa pigghiatu la via di l'acìtu,
- e faceva na vita scialacquata
- cu l'amiciuni di lu so partitu.
-
- Lu ziu circau tiràrilu a bona strata,
- ma zuppau a l'acqua, pirch'era attrivitu,
- e dicchìu la saìmi avìa liccata
- di taverni e zàgati peritu.
-
- Finalmenti mucidda fici luca;
- iddu grida: Ziu, ziu, cu dogghia interna;
- so ziu pri lu rammaricu si suca;
- poi dici: "lu to casu mi costerna;
- ma ora mi cerchi? chiaccu chi t'affuca!
- Scutta pri quannu jisti a la taverna."
Lu labbru di La Lirica [4] (li canzunetti)
-
- Dimmi, dimmi, apuzza nica
- Unni vai cussì matinu?
- Nun c'è cima chi arrussica
- Di lu munti a nui vicinu:
-
- Trema ancora, ancora luci
- La ruggiada 'ntra li prati,
- Dun'accura nun ti arruci
- L'ali d'oru dilicati!
-
- Li ciuriddi durmigghiusi
- 'Ntra li virdi soi buttuni
- Stannu ancora stritti e chiusi
- Cu li testi a pinnuluni.
-
- Ma l'aluzza s'affatica!
- Ma tu voli e fai caminu!
- Dimmi, dimmi, apuzza nica,
- Unni vai cussì matinu?
-
- Cerchi meli? E s'iddu è chissu
- Chiudi l'ali e 'un ti straccari,
- Ti lu 'nsignu un locu fissu
- Unn'hai sempri chi sucari
-
- Lu canusci lu miu amuri,
- Nici mia di l'occhi beddi?
- 'Ntra ddi labbra c'è un sapuri,
- 'Na ducizza chi mai speddi
-
- 'Ntra lu labbru culuritu
- Di lu caru amatu beni
- C'è lu meli chiù squisitu...
- Suca, sucalu, ca veni.
-
- Ddà ci misi lu Piaciri
- Lu sò nidu 'ncilippatu
- Pri adiscari, pri rapiri
- Ogni cori dilicatu.
-
- A lu munnu 'un si pò dari
- Una sorti chiù felici,
- Chi vasari, chi sucari
- Li labbruzzi a la mia Nici.
[cancia] Rifirimenti
- ↑ Meli, Giuvanni (2002) Don Chisciotti and Sanciu Panza, Legas, (edizzioni bilinguali siciliana/ngrisa, traduciuta di Prof. Gaitanu Cipolla)
- ↑ Meli, Giuvanni (1995) Moral Fables and Other Poems: A Bilingual Anthology (Sicilian/English), Legas (antoluggìa bilinguali, traduciuta di Prof. Gaitanu Cipolla)
- ↑ Meli, Giuvanni (1995) Moral Fables and Other Poems: A Bilingual Anthology (Sicilian/English), Legas (antoluggìa bilinguali, traduciuta di Prof. Gaitanu Cipolla)
- ↑ Meli, Giuvanni (1995) Moral Fables and Other Poems: A Bilingual Anthology (Sicilian/English), Legas (antoluggìa bilinguali, traduciuta di Prof. Gaitanu Cipolla)
[cancia] Lijami di dintra
[cancia] Lijami di fora
- Biografìa pi talianu
- Puisìi siciliani di Giuvanni Meli di scaricari sùpira a Google
- Sicily Page n'asempiu di nu puema di Meli traduciutu 'n ngrisi di Art Dieli
