Al-Kaida

De Wikipedio

Al-Kaida ne esas hierarkial (o lineal) organizuro, ma laxe relatanta grupo di teroristo-celuli. Pro ito esas tre desfacila sizar ula parti di la organizuro. La spirituala chefo di la Al-Kaida esas Araba-naskinta Osama bin Laden.

On supozas, ke teroristo-celuli existas preske omnaloke en la mondo. Teroristo-celulo signifikas en ica relato ula grupo, qua financias ipse lua agado. On suspektas, ke la celuli aranjas lua financo, adminime parte, per kriminala moyeni. Ofte la celuli projetas la ataki nedependante e kontaktas altra celuli nur dum bezono.

La vorto al-Kaida signifikas “bazo”, ma en praktiko ol esas kom spirituala bazo od inspirala fonto dil teroristi, ne ula loko. La mesajo di lua chefi pri la objekto o la skopo di la iraco e la santa milito (jihado) expansas per la cirkulanta predikeri e rekruteri o per la interreto, la inventuro di la ocidentala mondo.

Importanta rekruto-loki di nova adepti esas moskei e Korano-skoli. Nun on rekrutas anke en universitati e tala instituti di la alta edukado. La maxim motivoza rekrutarii ed adepti duktesas ad exerco-kampeyi. Ibe la maxim harda personi esas selektita kom la exekutanti di la ataki; ofte la projekteri esas altra personi.

La unesma exerco-kampeyi fondesis ye 1980a yari en Afganistan. Tatempe, dum la kolda milito, mem Usa suportis la Islama grupi en la milito kontre Soviet-Uniono. Pose Soviet-Uniono krulis e la kolda milito finis chanjinte la relati en la mondo. La ocidentala e la ne-Islama mondumo divenis la objekto di la teroristi. On savas (ye 2005), ke la exerco-kampeyi di la al-Kaida esas en Afganistan e Sudan. Segun sekreta guato-servi ocidentala en la kampeyi docesas inter altri Islama lego, proxima kombato e la uzado di la explosivi, armi ed veneni.