Mareas vivas
Na Galipedia, a wikipedia en galego.
| Mareas vivas | |
 --- (Mareas vivas) |
|
| Xénero | Drama, Comedia |
|---|---|
| Formato de imaxe | 4:3 |
| Duración | 60 minutos por episodio |
| Creador(es) | Antón Reixa |
| Director(es) | Antón Reixa (1998-1999) e Emilio Mac Gregor (2000-2002) |
| Promotor(es) | Miguel Aguiar, Ringo Rango e Zopilote |
| Produtor(es) executivo(s) | Voz Audiovisual |
| Intérpretes | Luís Tosar, Isabel Blanco, Luís Zahera, Camila Bossa, Miguel de Lira, Ana Santos |
| Opening theme | Adoro Galiza interpretada por Mercedes Peón |
| País de orixe | Galicia (España) |
| Emisión orixinal | TVG |
| Tempo de emisión | 11 de xaneiro de 1998 – 2002 |
| Número de episodios | 152 |
| Web oficial | |
Mareas vivas foi unha serie da Televisión de Galicia creada por Antón Reixa e producida por Voz Audiovisual e Zopilote que se emitíu entre os anos 1998 e 2002. Foi o maior éxito da TVG e os personaxes das primeiras tempadas fixéronse moi populares entre a poboación galega. A teleserie fixo historia por empregar unha lingua popular, dialectamente propia do galego da Costa da Morte. Gravouse principalmente en Laxe que na serie adoptou o nome ficticio de Portozás.
A serie viuse, xa sen éxito, en Telemadrid (9 episodios) e na EiTB.
Para moitos dos seus actores, Mareas vivas foi un trampolín cara a fama en Galicia e nalgúns casos propiciou o salto ó panorama nacional. O caso máis claro é o de Luís Tosar.
Índice |
[editar] Argumento e tramas
Mareas vivas reflicte a realidade dun pobo mariñeiro galego situado na Costa da Morte.
Aínda que o protagonismo recaía nas primeiras tempadas principalmente nos personaxes de Andrés (Luís Tosar) e María (Isabel Blanco), trátase dunha serie coral, cun elenco amplio, e que puido sobrevivir bastante tempo nas pantallas dende a marcha dos dous citados personaxes.
Aínda que moitas das amenas historias que se nos contan nesta serie son dun claro e marcado carácter costumista e enxebre (temas de naufraxios mariñeiros, disputas polas propiedades das terras, lendas relixiosas ou históricas, enfrontamentos cos da vila do lado...), algunhas das tramas máis importantes e que mantiveron en desacougo durante semanas ós espectadores de "Mareas vivas" teleserie foron temas moito menos alegres.
Algunhas das máis importantes foron:
[editar] Suso Maroto e a organización
[editar] Belinda e a mafia
[editar] A morte de dous amigos
[editar] O timo de Viriato e Odilo
[editar] Emprazamentos e lugares
Malia que a maioría das escenas de Mareas vivas foron rodadas en Laxe (Portozás na serie), outras moitas localidades galegas foron tamén protagonistas das gravacións de moitos dos momentos cumbre da serie, como a rodaxe do rescate de Iria no porto de A Coruña, ou moitos outros momentos en Corme (Cormelle na serie). Os veciños de Cabana tamén puideron ser testigos da gravación de Mareas vivas.
[editar] Intérpretes e personaxes
Estes son todos e cada un dos protagonistas principais da serie ó longo dos seus 5 anos de vida:
- Luís Tosar: Andrés Domínguez (1998-2000)
- Canso da súa vida na Coruña, Andrés decide aproveitar a oportunidade que se lle presenta ó ser elixido para ocupar unha praza vacante como xuíz nunha pequena vila mariñeira chamada Portozás. Acaba casando con María pero todo empeza a complicarse cando marchan para Bruxelas e acaban divorciándose.
- Isabel Blanco: María Ares (1998-2002)
- Despois de que o seu marido desaparecera no mar hai dous anos, María tívose que facer cargo ela soa da súa filla Iria. As dúas viven nunha casiña ás aforas da vila. Chega a casar con Andrés e mesmo marcha xunto a el cando este vaise traballar para Bruxelas, pero acaba voltando e divorciándose del, casando tempo despois con Viriato.
- Luís Zahera: Celso Álvarez Puga "Petróleo" (1998-2002)
- Tempo atrás traballara nas plataformas e por iso todo o mundo lle chama Petróleo. Agora é o dono do bar da confraría de pescadores. É moi amigo de contar as moitas historias que vivíu na súa época de mariñeiro pero os seus amigos nunca lle cren nin palabra. Ten un barco de pesca chamado o Cazador, no que traballa con Mangüi. É o novo alcalde de Portozás despois de que Celia marche da vila.
- Camila Bossa: Belinda Romero (1999-2002)
- Chegou a Portózas fuxindo dunha mafia que lle obrigaba a traballar nunha barra americana. Despois de solucionar a situación acaba casando con Petróleo, co que ten unha filla chamada Carmiña. É da República Dominicana.
- Sonia Castelo: Berta Díaz (1998-2000)
- É a médico de Portozás. Ela é de Vigo e espera que lle dean alí a praza fixa que tanto ansía. Ó final queda en Portozás pero cando Xurxo marcha, ela vaise con él.
- Mela Casal: Celia Rei (1998-2001)
- É a alcaldesa de Portozás. Son típicos os enfrontamentos entre ela e Couto, pois a alcaldesa non quere que o empresario se faga con todo o control da vila, mais parece que a súa enemistade tamén ven por cousas que aconteceron no pasado. Ten unha sobriña chamada Ana. Cando marcha de Portozás é substituída no seu cargo por Petróleo.
- Tuto Vázquez: Ramón Couto (1998-2002)
- É o cacique da vila. É armador e construtor e case sempre consegue o que el quere. Os seus maiores propósitos son amolar a Celia e intentar facerse co varadoiro de Puntazás.
- Carlos Blanco: Ladislao Couto (1998-2001)
- É o fillo de Ramón Couto. Estudou Dereito en Santiago de Compostela e agora exerce como avogado picapreitos en Portozás. É un fanático dos ovnis e dos misterios do máis alá. Desgraciadamente morre electrocutado na bañeira da súa casa.
- María Louro: Paula Couto (1998-2002)
- É a filla pequena de Ramón Couto e a irmá de Ladislao. Sempre lle leva a contra ó seu pai porque pensa que a súa forma de facer negocios, estafando e aproveitándose da xente, non está nada ben. Traballa na radio local e, posteriormente, na televisión da vila.
- Miguel de Lira: Evaristo Currás / Víctor Currás (1998-2001)
- Currás é un percebeiro furtivo da zona. Sempre dí que os seus percebes "son coma puños". Lévase mal con Taracido pois este sempre lle está a amolar e moitas das veces denúncianse un o outro. Ó que máis medo lle ten no mundo son ós esquimós. Acaba morrendo afogado ó salvarlle a vida a Taracido. Evaristo ten un curmán chamado Víctor que é cuspidiño a el.
- Xaquín Caamaño "O Platero": Arturo Vidal "Mangüi" (1998-2002)
- Mangüi é o mellor amigo de Petróleo. No pasado tivera problemas coas drogas pero logrou deixar esa época atrás e agora traballa con Petróleo no Cazador. Tivo unha relación con Aurea, profesora no instituto da vila.
- Isabel Naveira: Ana Mouzo Rei (1999)
- É a sobriña de Celia. Traballa na radio con Paula e Chano. É unha persoa un pouco atolada e moitas das veces acaba mentendo, a ela e mailos seus amigos, en problemas.
- Nacho Castaño: Chano Morais Vidal (1999)
- É o curmán de Manghüi. Traballa na radio con Paula e Ana. Consegue un traballo como periodista nun xornal de Santiago e acaba marchando para alá.
- Xosé Manuel Olveira "Pico": Don Amancio (1998-1999)
- O párroco da vila, don Amancio, é un cura moi moderno sempre disposto a axudar ós demáis. O seu mellor amigo é Florencio. Logo de ter un accidente de coche con Petróleo e quedar nunha cadeira de rodas, decide cambiar de aires e marchar a Vigo para facerse cargo dunha parroquia da zona.
- Paco Campos: Florencio Quintela (1998-1999)
- Don Florencio é o mestre de Iria e Fito. É un home de mediana idade moi intelixente e culto. Mantén con Amancio unha constante rivalidade xa sexa por ver quen é o mellor xogando ó xadrez ou o mellor pescador de troitas, aínda que no fondo son moi bos amigos. É substituído por Xurxo cando é ascendido a director da escola Neira Castro.
- Monti Castiñeiras: Xurxo Vázquez (1999)
- É o novo mestre dos rapaces. Ó primeiro non aturaba a idea de ser substituto nunha vila coma Portozás pero co tempo acaba sendo un máis entre a xente. Ó final acaba marchando a Mozambique, acompañado por Berta, para rematar a súa tese de doctorado.
- Santiago Romay: Fito (1998-2002)
- É o mellor amigo de Iria. É o típico estudante con malas notas e moi popular entre os seus compañeiros. Sae con Laura.
- Patricia Fernández Aufiero: Iria Maroto Ares (1998-2002)
- É a filla de María e Suso. O seu mellor amigo é Fito.
- Tamara Canosa: Laura Castro (2000-2002)
- É a moza de Fito e amiga de Iria. Ó rematar o instituto acaba traballando como camareira no Petróleo para sacarse uns cartiños.
- Martiño Rivas: Dani (1999)
- Dani convértese no fillo adoptivo de Andrés logo da repentina morte do seu pai. É un pouco maior que Fito e Iria.
- Uxía Blanco: Helena Souto (1999-2000)
- Elena chega dende Barcelona logo da morte do seu pai para facerse cargo do varadoiro que lle deixara en herdanza. Depois de moitos problemas cos bancos e de intentar por tódolos medios que a situación económica do varadoiro de Puntazás mellorase, Helena decide, con certa tristura, desfacerse del e voltar para Barcelona.
- Evaristo Calvo: Carlos Porto (1999-2002)
- É o sustituto de Andrés cando este marcha para Bruxelas. É un xuíz novato e con pouca man dura. Tras diferentes problemas no traballo acaba collendo a baixa por depresión e vaise a virir para os cantís nunha autocaravana. O seu mellor amigo é Anselmo.
- Eva Fernández: Rosa (2000-2002)
- Rosa é unha mariñeira con moita experiencia. Acaba vivindo nos cantís con Carlos e sendo elixida como patroa maior da confraría de pescadores.
- Patricia Vázquez: Sabela Muíños (2001-2002)
- É a nova xuíza e substituta de Carlos. Lévase moi ben con Pitusa e incluso acaban vivindo xuntas.
- Ana Santos: María Xesús Seoane "Pitusa" (1998-2002)
- É a secretaria do xulgado. É moi disciplinada no seu traballo. Estivo a piques de casar con Currás.
- Víctor Mosqueira: Francisco Taracido Taracido (2000-2002)
- Igual ca Currás, Taracido é un percebeiro furtivo. Calquera motivo é bo para amolar a Currás, xa sexa por problemas cos percebes ou polas propiedades das terras. Está casado con Concha.
- Amelia Rodríguez: Concha (2001)
- É a muller de Francisco Taracido.
- Ronaldo Delgado: Ismael Taracido (2001)
- É medio irmán de Francisco Taracido.
- Rebeca Montero: Mónica (1998)
- É a antiga compañeira sentimental de Andrés.
- Manuel Lourenzo: "Melgacho" (1998-2002)
- Melgacho é un vello e sabio mariñeiro. Toda canta historia hai e coñecida por Melgacho. Toda a xente pensa que é moi bo conselleiro mais o único que el fai e falar do que máis lle gusta no mundo: o mar.
- Marcos Viéitez: Suso Maroto (1998-1999)
- É o home de María, desaparecido hai anos nun naufraxio de dado oficialmente por morto.
- Roberto Vidal Bolaño: Miguel Aguiar (1998-1999)
- É un temido avogado que leva o caso de Maroto. Planea e coordina o secuestro de Iria.
- Miguel Varela: Hadrián (1999-¿?)
- É un veterano traballador do varadoiro de Puntazás.
- Suso Lista: Suso Lista (2002)
- É un mariñeiro que anteriormente traballara no varadorio de Puntazás.
- Mariana Carballal: Cristina (2001)
- É a compañeira sentimental de Carlos cando chega a Portozás.
- Alfonso Agra: Anselmo (2000-2001)
- É o médico que substitúe a Berta. O seu mellor amigo é Carlos co que comparte a paixón polas aves.
- Miro Magariños: Don Vicente (2002)
- É o novo cura de Portozás trala marcha de Don Amancio.
- Xavier Estévez: Viriato (2001-2002)
- É un sofisticado avogado que engana a María para quitarlle os cartos á xente. Ó final arrepíntese de todo o mal feito e trama un plan para traizonar ó seu xefe Odilo e recuperar o diñeiro de todos.
- Xurxo Souto: Brais (2001-2002)
- É un novo locutor de Radio Portozás.
- César "Goldi": Lisardo Montes (2002)
- Coñeceu a Viriato na cadea e as marabillas que este lle contou sobre Portozás foron as que lle fixeron decidirse ir vivir para a vila. Acaba atopando un traballo como encargado da limpeza.
- López Baño "Tanas": Manolo (2002)
- É un membro da Garda civil e mozo de Loli.
- Adrián Búa: Lois
- É amigo e compañeiro de moitas das trasnadas de Fito.
- Nunci Valcárcel: Loli
- É caixeira do supermercado. Caracterízase por ser moi cotilla e estar sempre pendente da vida dos demais.
[editar] Lista de episodios
A teleserie Mareas vivas conta cun total de 152 episodios divididos en 10 tempadas.
- Artigo principal: Lista de episodios de Mareas vivas
