Manuel Lourenzo
Na Galipedia, a wikipedia en galego.
Manuel Lourenzo, nado en Ferreira do Valadouro o 15 de marzo de 1943, é un actor, dramaturgo, director teatral, conferenciante, tradutor galego, e dinamizador de diferentes iniciativas teatrais.
Índice |
[editar] Datos biográficos
Manuel Lourenzo cursou estudos de Maxisterio. Entre 1962 e 1964, viviu en Alemaña. Volta a Galiza e, en 1965, crea na cidade da Coruña (xunto con Francisco Pillado) o Grupo de Teatro O Facho, grupo ligado á Agrupación Cultural O Facho e que marca, a xuízo de autores como Laura Tato Fontaíña ou Manuel Fernández Vieites, o inicio do Teatro Indenpente Galego. En 1967, funda o Grupo de Teatro Circo (1967-1976), o cal é de vital importancia dentro da Historia do Teatro Galego. Co Teatro Circo, acudirá ás Xornadas de Teatro de Pontevedra de 1971 e mais ás Mostras de Teatro Abrente de Ribadavia (1973-1980), citas de necesaria referencia dentro do contexto do Teatro Independente. En 1978, funda, outra con Francisco Pillado, a Escola Dramática Galega, e codirixe con este autor os Cadernos da Escola Dramática Galega, os cales viron nacer ao seu ábeiro personalidades do noso teatro como Xesús Pisón, Miguel Anxo Fernán-Vello, Henrique Rabunhal,...
En 1979 publica, igualmente en coautoría con Pillado Mayor, a monografía O Teatro Galego, libro pioneiro e aínda de referencia aínda hoxe en día dentro do ámbito do estudo da dramática.
Por outra parte, en 1980 crea a Compañía Teatral Luís Seoane e, en 1981, recibe con Pillado un premio outorgado pola Aula de Teatro da Universidade de Compostela, outorgado a raíz dun traballo sobre o teatro de Luís Seoane. Tamén en 1981, e tamén con Francisco Pillado Mayor, funda a editorial Castrodouro.
No ano 1990, crea o Clube de Teatro Elsinor, en 1995 saca á luz (tamén con Pillado Mayor) a colección Cadernos de Teatro.
En 1997 recibiu o Premio Nacional de Literatura Dramática, por Veladas indecentes.
No ano 1998, xunto con Santiago Fernández, crea a escola teatral Casahamlet, a cal rexenta actualmente.
[editar] Obra
[editar] Obra de creación
Autor de aproximadamente 150 obras dramáticas, o seu teatro volta aos temas da traxedia grega para denuciar situacións históricas (como o franquismo, a transición,...). Laura Tato Fontaíña destaca o seu interese polas figuras femininas que cumplen o rol da femme fatale e polas pezas de mulleres apaixonadas, no medio dunha mestura entre nostalxia, humor e fantasía. Concibiu tamén obras dramáticas nas que se ironiza con aspectos teóricos da dramática. Algunhas das súas obras máis destacadas son:
- Romería ás Covas do Demo (1969)
- Tres Irmáns Parvas (1969)
- Crónica do Sol de Inverno (1971)
- Erros e Ferros de Pedro Madruga(1972)
- Traxicomedia do Vento de Tebas Namorado dunha Forca (1978)
- Todos os Fillos de Galahad (1978)
- As Criadas (1980)(espectáculo)
- Últimas Fasquías de Setembro (espectáculo)
- Liturxia de Tebas (espectáculo)
- Fedra (1982)
- Electra (1994)
- Magnetismo (1996)
- Veladas Indecentes (1996)
- Lionel. O Malestar do Benestar (1998).
- Insomnes (publicado en 2004)
[editar] Obra ensaística
Manuel Lourenzo é tamén autor de libros e artigos teóricos sobre o teatro galego. Os máis destácabeis son:
- O Teatro Galego (1979) (escrito en colaboración con Francisco Pillado)
- Antoloxía do Teatro Galego (1981) (escrito en colaboración con Francisco Pillado)
- Dicionario do Teatro Galego (1987)(escrito en colaboración con Francisco Pillado)
- Pensar co Corpo (2001).
[editar] Premios
Durante a súa carreira, Manuel Lourenzo colleitou numeorosos premios literarios e teatrais. Estes son:
- Concurso Breogán de Contos en Lingua Galega (1971, 1972, 1975).
- Concurso/ Premio de Teatro Infantil O Facho (1975, 1979, 1981, 1986, 1988).
- Premio Aula de Teatro da Universidade de Santiago de Compostela (1977, 1981).
- Premio Abrente (1978)/ Mención de honra no Premio Abrente (1980).
- Premio de Poesía Cidade da Coruña (1980).
- Premio Nacional do Disco (1981).
- Premio O Facho de Poesía (1982).
- Premio Celso Emilo Ferreiro de Poesía (1982).
- Premio Artur Carbonell (1983).
- Festival Interncional de Teatro de Ribadavia (1984, mellor dirección).
- Premio da Sociedade Filantrópico-Dramática de Ribadeo (1984).
- Premio Concello de Xove (1984).
- Premio Teatro de Cámara Ditea (1985).
- Festival de Teatro Cómico e Festivo de Cangas (1986, 1990).
- Certame Galego de Teatro Xuventude (1991)/ Segundo Premio en 1996.
- Premio de Narrativa Pub Combo (1992).
- Premio Xeración Nós de Ferrol (1993).
- Finalista do Concurso de Obras Teatrais Inéditas "No Camiño" (1993)/ Accesit en 1994.
- Premio de Teatro Rafael Dieste (1996, 1999).
- Premio Nacional de Literatura Dramática (1997).
- Pedrón de Ouro (2001).
- Premio Nacional de Artes escénicas (2008)