Firginia
Ut Wikipedy
|
||||
 |
||||
| Ofkoarting | VA | |||
| Haadstêd | Richmond | |||
| Tiidsône | -5 | |||
| Algemien | ||||
|---|---|---|---|---|
| Oerflakte | 110.862 | |||
| Befolking | 7.459.827 | |||
| Oare ynformaasje | ||||
| Tatreden | 25 juny 1788 | |||
| Oantal countys | 95 | |||
Firginia (Ingelsk: Virginia) is ien fan de steaten fan de Feriene Steaten fan Amearika. De haadstêd is Richmond. Firginia is mei Kentucky, Massachusetts en Pennsylvania ien fan de fjouwer steaten, dy't harren in commonwealth neame. Lykwols hat dat gien juridyske betsjutting, mar slagget allinne op in part fan de histoaryske steatsnamme.
Ynhâld |
[bewurkje seksje] Skiednis
Firginia is de earste koloanje fan de 13 koloanjes fan Amearika. De namme Firginia ferwiist nei de de "Virgin Queen" ("Famme Keninginne") Elizabeth I fan Ingelân. Ynearsten tsjutte de namme op in folle grutte gebiet, te witten it gebiet dat troch Sir Walter Raleighs ekspedysje fan 1584 yn besit nommen waard. Yn 1607 waard Jamestown stifte, de âldste Ingelske delsetting yn de Nije Wrâld dat noch altyd bestiet. Kening Karel II joech Firginia, dat de monargy trou bleaun wie tidens de Ingelske Boargeroarloch, de bynamme "The Old Dominion".
De koloanje hie har earste ekonomyske opbloei te tankjen oan de tabakstylt. Op it ein fan de 18e ieu begûn katoen hieltyd wichtiger te wurden as eksportprodukt. Foar de tabakstylt brûkten de planters ynearsten blanke arbeiders ("indentured labourers"), dy't ûnder harren kontrakttiid it amper better hienen as slaven, mar nei sân jier arbeidzjen wol folsleine frijheid krigen en meastal in eigen boerenspul begûnen. Om-ende-by 1700 gongen de planters lykwols hieltyd faker ynfierde negers brûken, dy't libbenslang yn slavernij ferkeare bliuwe soene. Op dizze wize waard Firginia stadichoan in slavesteat, dêr't 30 oant 40 % fan de befolking út swarte slaven bestie.
Firginia wie ien fan de trettjin koloanjes dy't yn de 18e ieu tidens de Amerikaanske revolúsje tsjin de Britske oerhearsking yn opstân kamen. Op 25 juny 1788 waard Firginia offisjeel, as tsiende, in steat fan de Feriene Steaten.
By de Amerikaanske Boargeroarloch keas Firginia de side fan de Konfederaasje, wêrnei it westen fan de steat har ôfskiede en West Firginia foarmje soe.
[bewurkje seksje] Geografy
Firginia grinzet yn it noardwesten oan West Firginia, yn it noardeosten oan Marylân en it Distrikt fan Kolumbia, yn it westen oan Kentucky en yn it suden oan Tennessee en North Karolina.
Yn it westen fan de steat lizze de Appalachen en it easten is frij flak. Op de grins mei Marylân rint de rivier de Potomak, dy't útmûnet yn Chesapeake Bay. It súdeasten fan de steat leit foar it meastepart oan dizze baai oan de Atlantyske Oseaan. It heechste punt fan de steat leit op in hichte fan 1726 meter.
[bewurkje seksje] Bestjoerlike yndieling
Firginia is ûnderferparte yn 95 countys en 39 saneamde ûnôfhinklike stêden.
