Kadagatan Arktiko
Halì sa Wikipedia
An Kadagatan Arktiko yaon sa Norteng Hemispero asin an kahiwasan na parte kaini yaon sa norteng porong rehiyon nin Arktiko. Ini an pinakásadit sa limang pangenot na mga pankadagatan na bangâ kan kinàban asin an pinakáhababaw. Dawà na an International Hydrographic Organization (IHO) pigbibisto ining sarong kadagatan, Dagat Arktiko Mediterano o simpleng Dagat Arktiko an apod digdi kan mga oceanographer asin klinaklasipikar na sarô sa mga dagat kan Kadagatan Atlantiko.
An Kadagatan Arktiko napapatos nin nagyeyelong dagat sa enterong taon. Napapalibutan ini kan Eurasia asin Amerika Norte. An temperatura asin kaaskadan (salinity) kan Kadagatan Arktiko minaiba depende sa panahon na an patos na yelo kaini minatunaw asin minatagas. An kaaskadan kaini an pinaká hababa sa limang pangenot na kadagatan nin huli sa hababang pagsungaw (evaporation) asin sa limitadong pagbulos paluwas sa nakapalibot na mga katubigan.
