Somero salbache africano
De Biquipedia
 |
Iste articlo tién una bersión escrita con una grafía alternatiba esperimental propuesta por bels biquipedistas aintro d'o Biquiproyeuto:Grafía. Puede beyer-se aquí. |
| Somero salvage africano | ||||||||||||||||
|---|---|---|---|---|---|---|---|---|---|---|---|---|---|---|---|---|
 Equus africanus |
||||||||||||||||
| Estato de conserbazión | ||||||||||||||||
|
||||||||||||||||
| Clasificazión zentifica | ||||||||||||||||
|
||||||||||||||||
| Nomenclatura binomial | ||||||||||||||||
| Equus africanus | ||||||||||||||||
 Esta fuella ye escrita en fobano. |
O somero salbache africano (Equus africanus) ye un mamifero salbache d'o continente africano, pareixíu á o pullino domestico, que anque oy s'ancuentra prou recluyíu en os paises d'o nordueste d'Africa (Etiopía, Somalia e Eritrea) antes ba tener un aria de destribuzión que encluyiba Sudán, Echipto e Libia.
As suyas medidas pllegan ta os 2 metros de longitut, con d'entre 230 e 275 Kg de peso. O pelo lo tiene curto e a color la tiene grisa clareta, con una francha escura que s'estira d'a nuca ent'a coda (como os pullinos) e con rayetas negras en as patas, por baixo d'o chinullo. A subespezie nubia (Equus africanus africanus) tieen, á más d'a francha lonchitudinal d'a espallda, 'atra que le baixa por l'ombro, que anque son compartidas con bellos pullinos, mancan del tot en l'atra subespezie (E. a. somalicus).
Os someros africanos biben por regular en ambientes deserticos ó semideserticos, á onde nomás que os suyos estomagos pueden sacar-ne cosa d'a pastura. Os sistemas dichestibos d'istes animals son duros e capaz que ne sacan l'augua de poca cosa que minchen. Se conoze que pueden tamién tirar á sabelos días sin de gota d'augua, anque bien luego ben de baixar á mirar-ne, lo menos cada 3 días. Á diferenzia d'a mayoría d'equidos, os someros africanos no prezisan mica compañía, e se mueben abitualment soleteros (con eszezión d'as femallas con pullinetes), e nomás que cuando se troban solos fan serbir a boz suya, que ye prou grabe e asinas se claman os unos con os otros en a distanzia, distanzia que puede enfilar-se enta 3 km.
Tamién s'ha pensau que os someros africanos pudiesen estar os debantepasaus d'os pullinos domesticos. Se conoze que os sumerios ya en van fer uso de largo fa sieglos, que los meteban á empentar bagons e carros. Atros autors piensan que ixes ban aber de ser onagros ó pullinos ya más mudernos.
O estau de conserbazión atual d'a espezie ye dramaticamente perigloso t'a suya superbibenzia. As capturas masibas que antes se-ne feban ta domesticar-los e tamién l'entrecruze con os pullinos domesticos ha empentau a espezie ta que atualmente no en queden si que unos poquez zentenars. Á más, en Somalia e Etiopía, onde los cazan ta usar-los en a merezina tradizional, o incremento d'armas en zirculazión con as rezientes guerras zebils no ha fecho si que estimular-ne o deszenso poblazional. A competizión, finalmente, con o bestiar domestico ta sacar-ne pastura d'o suyo duro hábitat en ha fecho declinar aúno más a demografía que teneba.
