Harry Potter
Us der alemannische Wikipedia, der freie Dialäkt-Enzyklopedy
De Harry Potter isch e Romanfigur vo de Joanne K. Rowling. Si het 7 Harry-Potter-Romän gschribe und de Serie isch damit zuram End kumma.
Inhaltsverzeichnis |
[ändere] Inhalt
De Harry Potter isch en Zauberer und bsuecht d'Zaubererschuel Hogwarts. Jede Band beschriibt jewils äs Schueljahr. Wil em Harry sini Eltere vom sehr mächtige Zauberer Voldemort tödet worde sind, wachst er bi sinere Tante Petunia und sim Onkel Vernon uf. Doch d'Dursleys chönd Magie überhaupt nöd usstaa, und drum verheimliched si em Harry, dass er en Zauberer isch.
Magie isch em Harry öpis Fremds. Er findet sich besser i de Welt vo de Muggel - so sägad d'Zauberer de Mensche, wo kei magischi Chreft händ - z'rächt. Erscht as sim elfte Geburtstag erfahrt er nämli vo sine bsundere Fähigkeite, wonen de Hagrid, de Wildhüter vo Hogwarts, mitnimmt uf Hogwarts zu sim erschte Schueljahr. De Hagrid vezellt em au vo sine Eltere und dass de Voldemort au vesuecht het ihn z töde. De Harry het aber uf wundersame wis überläbt und de Voldemort het sini Macht verlore und isch sit do nieme gseh worde.
Em Harry sini beschte Fründ sind de Ronald Weasley und d Hermine Granger. Si sind im vom gliche Huus wie de Harry, nämlich Gryffindor. In Hogwarts wird jede Schüeler eim vo de Hüüser Gryffindor, Hufflepuff, Ravenclaw oder Slytherin zuegwise. Ein vom Harry sine Find isch de Draco Malfoy, en Schüeler us Slytherin, wo im gliiche Schueljahr isch wi de Harry. Sin Vater, de Lucius Malfoy, isch - so wird behauptet - en Ahänger vom Voldemort gsi.
Im Verlauf vo de Gschichte zeigt sich, dass de Voldemort na nöd endgültig besiigt isch und versuächt, wider a d'Macht z cho. Das glint em au im 7. Band, er kontrolliert s'Zaubereiministerium. Am Ändi vo de Septologie wird de Voldemort jedoch endgültig vom Harry besiegt.
Im Prolog vom 7. Teil (En Uusblick uf das wo 19 Johr spöter isch) isch de Harry mit em Ron sinnere Schöschter, de wunderschöne Ginevra "Ginny" Weasley ghürate, si isch eis Johr jünger als de Harry und scho sit de erste Büecher i ihn verliebt. Im Band sechs sinds denn serst mol offiziell es Paar, tränned sich aber zu ihrem Schutz weder und chömed erst nachem Voldemort sim Tod weder zäme.
[ändere] Houptpersone
[ändere] Harry Potter
De Zauberlehrling Harry Potter isch d'Hauptfigur vo de Romän. Er isch berüehmt wil er as Buschi än Agriff vom böse Zauberer Voldemort überläbt het. Er isch am liebschdä mit sine Kollege zäme und sini Berüemtheit isch em mängisch unagnehm. Magie isch für in neu und sehr interessant. Er het Talent für Zauberei, isch aber längstens nöd so fliisig wi d'Hermine und bricht ab und zu eini - oder grad mehreri - vo de strenge Schuelregle vo Hogwarts.
[ändere] Ronald Weasley
De Ronald Weasley isch de beschti Schuelkolleg vom Harry und begleitet en bi sine Abetür. Er het wie alli sini Gschwüschterti roti Haar. De Ron, wie em sini Fründ sägäd, bewunderet de Harry, isch aber mängisch iifesüchtig, wil de Harry so berüehmt isch. Am Ron sini Brüedere sind au alli in Hogwarts gsi und hend hervorragendi Leischtige vollbracht - bis uf d'Zwilling Fred und George. De Ron mues immer d'Chleider vo sine ältere Brüeder alege und au anderi alti Schuelsache bruuchi wie zum Biispiil Bäse, wil d'Familie vom Ron eher arm isch. Es ärgeret en sehr, dass er nie neui Sache überchunnt.
[ändere] Hermine Granger
D'Hermine isch e sehr fliessigi Schüeleri und wot i jedem Fach nume Beschtnote, wo si meischtens au erreicht. Am Afang vestaht si sich nöd guet mit de andere Schüeler, me lacht si als Streberi us. Spöter wird si aber die beschti Fründin vom Harry und em Ron. D'Eltere vo de Hermine sind Zahnärzt. Si isch drum mit de Welt vo de Muggel vetraut. D'Hermine isch sehr gschiid und weiss fascht alli Zaubersprüch uswändig und au di meischte Büecher. Das isch sehr hilfriich, wenn di drü i gföhrlichi Situatione grated.
[ändere] Die 7 Bänd
D Harry-Potter-Reihe bistoot us siibe Bänd:
- Harry Potter und dr Stai vo de Weise
- Harry Potter und d Kammere vom Schräcke
- Harry Potter und dr Gfangni vo Askaban
- Harry Potter und dr Füürchälch
- Harry Potter und em Phönix sin Orde
- Harry Potter und dr Halbbluetprinz
- Harry Potter und em Tod sini Hailigtümer
