Schwerin

vanuit Wikipedia, die vrye ensiklopedie.

Schwerin
Land:	Duitsland
Deelstaat:	Mecklenburg-Voorpommere
Stigting:	1160 (Duitse stigting)
Koördinate:	53° 38' N, 11° 25' O
Oppervlakte:	130,46 km²
Bevolking:	96 542 (30 Junie 2006)
Bevolkingsdigtheid:	740 / km²
Hoogte:	38 m bo seespieël
Burgemeester:	Norbert Claussen (CDU)
Amptelike webwerf:	schwerin.de

Schwerin is die hoofstad van die Duitse deelstaat Mecklenburg-Voorpommere. Met 96 500 inwoners is dit die kleinste administratiewe sentrum van 'n Duitse deelstaat en na Rostock die tweede grootste stad in Mecklenburg-Voorpommere.

[wysig] Geografie

Schwerin lê in 'n meregebied in die weste van die deelstaat Mecklenburg-Voorpommere, aan die suidwestelike oewer van die Schwerinse Meer (Duits: Schweriner See). Die stadsgebied word deur uitgestrekte bosgebiede omring en beslaan naas die Schwerinse Meer 'n aantal ander mere soos die Heidensee, Ziegelsee, Medeweger See, Lankower See, Ostorfer See, Fauler See, Neumühler See, Burgsee, Pfaffenteich, Grimkesee en Große Karausche.

Die bewoners noem hulle stad dikwels "die stad van sewe mere en sewe woude", wat tans as 'n misleidende verwysing beskou kan word. Dit gaan terug op 'n tyd toe Schwerin nog 'n baie kleiner gebied beslaan het en slegs van sewe mere en uitgestrekte woude omring was. Met die uitbreiding van die stadsgebied het baie bosgebiede verlore gegaan.

Nogtans is 18,5 persent van Schwerin se huidige oppervlakte van 130 vierkante kilometer met woude bedek, en 28,9 persent word deur mere beslaan, en dis veral water en woude wat 'n besonderse karakter aan Schwerin gee. Die hoogte bo seevlak wissel van 38 meter vlakby die Schwerinse See tot 86,1 meter in die stadsbuurt Neumühle. Die grootste stede in die omgewing is Lübeck (sowat 54 kilometer noordwes van Schwerin) en Hamburg (94 kilometer wes van Schwerin).

[wysig] Klimaat

Schwerin word deur 'n gematigde klimaat gekenmerk. Vanweë die gure noordoostelike winde is temperature gedurende lentetyd laer as in Noordwes-Duitsland, maar danksy die invloed van die nabygeleë Oossee (of Baltiese See) ervaar mens hier nie die somerhitte nie en geniet ook warmer temperature in die herfs.

Die gemiddelde jaarlikse temperatuur in Schwerin is 8,4 °C, die verskil tussen die gemiddeldes van die warmste en die koudste maand beloop 17,2 °C. Die gemiddelde jaarlikse neerslag was in die periode tussen 1961 en 1990 621 millimeter.

[wysig] Geskiedenis

Die eerste verwysings na Schwerin dateer uit die jare 1012/1018 (Zuarina) en 1170 (Zuerin, Zwerin, afgelei van Polabies zvěŕ, letterlik "wilde dier" + die agtervoegsel [-in] of zvěŕin "wildpark, dieretuin, stoetery"). Schwerin se naam gaan moontlik ook terug op die Slawiese god Svarog, sodat Swarzyn letterlik "Plek van Svarog" sou beteken.

Die Duitse stad is in 1160 deur die Welfe-hertog Hendrik die Leeu gestig. In 1167 het dit die setel van 'n graafskap onder graaf Gunzelin von Hagen geword en is in 1358, ná die uitsterwe van die huis Gunzelin, aan die hertogdom Mecklenburg oorgedra.

Schwerin was vanaf die 15de eeu die setel van die hertogdom Mecklenburg-Schwerin, wat in 1918 ontbind is. In die periode tussen 1763 en 1837 het egter Ludwigslust as die setel van die hertoë gedien.

Ná 1918 het Schwerin as die hoofstad van die Vrystaat Mecklenburg-Schwerin en sedert die einde van die Tweede Wêreldoorlog as die administratiewe sentrum van die deelstaat Mecklenburg gedien (die westelike gedeelte van Pommeren is destyds reeds by Mecklenburg ingesluit). Ná die ontbinding van die deelstate van die Duitse Demokratiese Republiek (DDR) in 1952 het Schwerin as die hoofstad van die distrik Schwerin gefungeer. Met die Duitse hereniging en die herskepping van deelstate in die gebied van die vroeëre DDR in 1990 het Schwerin weer as hoofstad van die nuwe deelstaat Mecklenburg-Voorpommere gedien.

As gevolg van die politieke veranderings is vanaf 1991 die historiese stadskern saam met ander stadsbuurte omvattend gerestoureer. Daarnaas word ook die woonstelblokke, wat uit die DDR-tydperk dateer, tans opgeknap.