Lanceloot Blondeel
Uit Wikipedia
Lanceloot Blondeel (Poperienge, 1498 - Brugge, 4 moarte 1561) was e Vlamsche kunstenoare uut de 16ste eeuwe. Je zou begost zyn ols metser.
Lanceloot Blondeel was e belangryke figeure in d’eeste generoatie Brugsche renaissancekunstenoars. Je was ’t type van de uomo universale, de moderne, veelzydige en individualistische kunstenoare nor Italioans model.
Z’n oeuvre bestoat uut schilderyen, têkeniengn, ountwerpn van patrôonn vo tapytn, glasroamn, beeldn en bouwwerkn, w.o. de bekende Keizer-Karelschouwe van ’t Brugsche Vrye, die te bezichtign is ip de Burg. Die schouwe is 'n erinnerienge an d'overwinnienge van Karel V in de slag by Pavia. Je makteg ôok landkoartn woavan dan der twêe bewoard zyn in ’t stadsarchief van Brugge.
In ‘t Groeningemuseum angt z’n werk Den Illign Lucas schildert Onze-Lieve-Vrouwe. ’t Ipvollendste ounderdêel van ’t schilderye is de omkoaderienge: e groteskelyste in goud en bruun. De groteske is ’n ornamentvorm uut de Romeinschn oudeid en de Italioansche renaissance. D’eeste Vlamsche schilders die ip die maniere werktegen krêegn de noame Vlamsche maniëristn.
Blondeel weunde ’t grotste dêel van z’n leevn in Brugge en z’n dochter Anna trouwde doa me z’n lêerlink Pieter Pourbus.
J'is gestorvn in Brugge en begroavn in de Sint-Gilliskerke.
In Brugge zyn der werkn van em te zien in:
- ’t Groeningemuseum
- de Sint-Salvatorskathedroale
- de Sint-Jacobskerke
