Microsoft Windows

Mula sa Tagalog na Wikipedia, ang malayang ensiklopedya

Microsoft Windows
Retrato
Windows Vista Ultimate nang nakasindi ang Aero
Gumawa
Microsoft Corporation
Websayt: Microsoft Windows
Kaalamang pampaglalabas
Unang petsa ng paglalabas:	Nobyembre 20, 1985[1]
Pangkasalukuyang beryson:	Windows Server 2008 (NT 6.0.6001) (Pebrero 27, 2008[2])
Paunang tinging bersyon:	Windows 7 Milestone 1 (NT 6.1.6574.1) (Abril 21, 2008[3])
Modelong pinanggagalingan:	binahaging pinagmulan / saradong pinagmulan
Lisensya:	MS-EULA
Kalagayang pampagsuporta
Pangkasalukuyan
Mas malalim pang pagbasa
Kasaysayan ng Microsoft Windows Kritisismo ng Microsoft Windows Paghahambing ng mga bersyon ng Microsoft Windows Talaan ng mga bersyon ng Microsoft Windows Talaan ng mga nilalaman ng Microsoft Windows

Ang Microsoft Windows ['maɪˌkɹaʊsɒft 'wɪndəʊs], kilala rin sa katawagang Windows ['wɪndəʊs] o MS-Windows ['ɛmɛs 'wɪndəʊs], ay isang kamag-anakan ng mga operating system na ginawa ng Microsoft. Bagaman sa mga unang bersyon nito ang Windows ay ginawa ng Microsoft bilang isang operating environment at graphical user interface lamang habang halos lahat ng mga proseso ay sa MS-DOS pa rin isinasalalay, lahat na ng mga sumunod na bersyon nito ay mga OS na. At noong simula rin, ang mga bersyon ng Windows ay ginawa para sa mga tahanan lamang, at ang mga OS namang pantanggapan ay sa mga bersyon ng Windows NT. Ngunit nagtapos ito noong inilabas ang Windows XP, na nagsanib ng dalawang hanay na pang-OS ng Microsoft, ang Microsoft Windows at ang Windows NT.

Sa kasalukuyan, ang Windows ang pinakatanyag na operating system sa buong mundo. Pinanghahawakan sa kasalukuyan ng Microsoft ang 91.13% ng pamilihang pang-OS habang ang hinahawakan ng pinakamalaking katunggali nito sa pamilihan ay 7.82%; ito ang Mac OS ng Apple Inc..^[4] Bagaman sa laki ng agwat na ito, mayroon pa ring ilang nagsasabing ipinapanganiban pa rin ang Windows na bumagsak.^[5]

[baguhin] Kasaysayan

Punong artikulo: Kasaysayan ng Microsoft Windows

Kahon ng Windows 1.0; pansining hindi pa ito nabubuksan, at nakasulat sa kahong isa itong operating environment.

[baguhin] Mga operating environment

[baguhin] 1985 — 1989

Silipin din: Windows 1.0x at 2.x

Nagsimula ang Microsoft Windows bilang isang graphical user interface at operating environment ng mga kompyuter ng IBM at iba pang mga kahalintulad na kompyuter na tumatakbo sa ilalim ng MS-DOS. Ito ay noong Nobyembre 20, 1985, ang pagkakalabas ng Windows 1.0^[6], ang pinakaunang bersyon ng Microsoft Windows. Kailangang alalahaning ang mga unang limang bersyon ng Microsoft Windows: Windows 1.0, 2.x, 3.0 at 3.1x, ay hindi mga operating system kundi mga graphical user interface at operating environment lamang. Ang mga ito ay gumaganap lamang bilang isang pagpapalawig ng mga kakayahan ng MS-DOS, ngunit lahat pa rin ng mga proseso ay ginaganap pa rin ng MS-DOS.

Noong una, ang pagpapabuti ng Microsoft sa Windows ay mariing pinipigilan ng mga pagsasakdal ng Apple. Ito ay dahil sa hindi mailakip ng Microsoft ang mga katangiang kagaya ng mga nagpapatung-patong na bintana, at ang tapunan ng basura sa paniniwala ng Apple na ang mga istilong iyon ay dapat panghawakan ng Apple lamang dahil sila ang unang gumawa at gumamit ng ganoong istilo, at ang mga ito ay saklaw ng karapatang-aring sila ay tanging may-hawak. Sa lahat-lahat, inaangkin ng Apple na nalugi sila nang USD 5 bilyon dahil dito.^[7][8]

[baguhin] 1990 — 1992

Silipin din: Windows 3.x

Noong Mayo 22, 1990, inilabas ng Microsoft ang Windows 3.0,^[9] ang ikaapat na bersyon ng Microsoft Windows. Agad itong naging isa sa mga pinakatanyag at mabentang operating system sa kasaysayan ng Microsoft Windows at ng buong pamilihang pang-OS, at ang mayroong pinakamalaking naiambag sa pagsikat ng Microsoft at Microsoft Windows sa pamilihang panteknolohiya. At malamang ang mga pangunahing dahilan nito ay ito lamang ang nag-iisang bersyon ng Microsoft Windows na mayroong kakayahang tumakbo sa tatlong magkakaibang uri ng alaala.

Ang mga katangian ng Windows 3.0 ay pinagbutihan pa noong, Abril 6, 1992,^[10][11] inilabas ng Microsoft ang Windows 3.1, isang bagong operating system ng Microsoft na batay sa Windows 3.0, na mayroong dagdag na pagsasaayos sa mga suliranin ng Windows 3.0, at pagsuporta sa mga midya at TrueType.^[12] Bagaman marami pa rin itong kulang na katangiang mahahalagang, katulad ng mahahabang pangalang pantalaksan, isang desktop, o isang sistemang pananggalang mula sa mga talaksang mapanira, matatagpuan lahat sa katunggali nitong OS/2, isang OS na tinulungan ding pagbutihin dati ng Microsoft, ng IBM, naging matagumpay pa rin ito sa pamilihang pang-OS. Ang pangunahing nagdulot nito ay ang kasikatan ng nauna pa nitong bersyon, ang Windows 3.0.

Naglabas din ng mga pagpapabuti ang Microsoft para sa Windows. Ang Windows 3.11 ay halos kaparehung-kapareho ng Windows 3.1, at nagdagdag lamang ng ilang mga talaksan. Bagaman dito, marami pa ring mga sirang matatagpuan sa Windows 3.1 ang matatagpuan pa rin sa Windows 3.11.

[baguhin] Mga operating system

[baguhin] 1993 — 1995

Silipin din: Windows NT 3.1, 3.5 at 3.51

Ang pinakaunang inilabas na operating system ng Microsoft ay ang Windows NT 3.1, na ginawa sa arkitekturang Windows NT, isang hanay pang-OS ng Microsoft para sa pamilihang pantanggapan, ay inilabas noong Hulyo 27, 1993,^[13] hindi lumaon nang maghiwalay ng landas ang Microsoft at IBM sa paggawa ng kanilang sari-sariling operating system.

Ang arkitektura ay ginawa sa ilalim ng pamumuno ni Dave Cutler, ang punong arkitekto sa paggawa ng Windows NT. Ginawa ang Windows NT sa utos ng Microsoft na gumawa siya ng isang bitbiting, magagamit sa iba-ibang mga arkitekturang pangkompyuter, OS/2, at isa ring bitbiting pamalit sa Windows na nananalig sa isang DOS. Ngunit nang ang kanyang grupo ay matapos, iba na ang sistemang kanilang nagawa.

Noong panahong iyon si Dave Cutler ay isa dating pinunong arkitekto ng kakatigil lamang na proyektong PRISM, isang proyekto para sa pagpapabuti ng arkitekturang RISC ng Digital Electronics Corporation at Mica, ang paunang bansag sa operating system ng naturang arkitekturang pangkompyuter. At noong tinapos ng DEC ang proyekto, agad na kinuha ng Microsoft si Dave Cutler upang gawin ang operating system. Maraming naghinala na dinala ni Cutler at ng kanyang kawanian ang ilang bahagi ng kodigo para sa Mica, kaya naman binantaang sakdalin ng DEC ang Microsoft kundi nila itutuloy ang suporta ng Windows NT para sa DEC Alpha.^[14] Bagaman dito, pareho ring inalis ng Microsoft at Compaq, ang kompanyang bumili ng DEC noong bumagsak ito, ang pagsuporta sa isa at isa noong Agosto 1999.^[15]

[baguhin] 1995 — 1998

Silipin din: Windows 95, NT 4.0 at 98

Noong Agosto 24, 1995, ngunit ang kaunahang balak ay dapat Hulyo 11, inilabas ng Microsoft ang Windows 95, ang pinakamalaking hakbang sa pagbabago sa GUI ng Microsoft Windows simula nang inilabas ito, at ang pinakaunang ganap na pantahanang operating system na ginawa ng Microsoft; ang mga naunang OS ay naasa sa MS-DOS. Kasama sa mga malalaking pagbabago nito sa GUI ay isang ganap na desktop na hindi na para sa mga pinaliit na bintana kundi para na sa paglalagay ng mga talaksan at iba pa, paggamit ng kanang bahagi ng mouse, mas pinadaling pakikipag-ugnayan sa Internet sa tulong ng mga nakaluklok nang suporta sa iba-ibang mga pang-Internet na protokol at isang taskbar at start menu. Ngunit kailangang alalahaning ang ideya ng isang taskbar ay hindi unang nagpakita sa Windows 95 kundi sa Windows 1.0; inalis lamang ito ng Microsoft sa mga sumunod na bersyon, at ibinalik sa Windows 95. Hindi katulad ng mga naunang OS sa Windows 95, likas na tumatakbo ang Windows 95 sa 32-bit; ngunit mayroon pa rin itong suporta para sa 16-bit, at kaya pa ring tumakbo rito.^[16] At maging kahit sa pinakabagong bersyon ng Microsoft Windows, na ang Windows Vista, ay ginagamit pa rin ang parehong banghay ng GUI. Bagaman dito, ayon sa Micromart, nasasaloob pa rin sa Windows 95 ang mababang kaligtasan ng mga naunang bersyon ng Windows at MS-DOS. Isa rito ang mababang kaligtasan ng mga panagutang pangmanggagamit ng Windows 95, bagaman maaari nang magkaroon ng mga mararaming panagutan sa Windows 95, walang kahit ano mang dagdag na kaligtasan itong ibinibigay; pinapahintulutan nito ang pagkakaroon ng mga iba-ibang kagustuhan para sa bawat panagutan, ngunit pinapahintulutan din nitong pindutin ang "Cancel" sa pambungad, at makapagbigay ng malayang daan sa kahit sino mang taong mayroong hangad na gamitin ang kompyuter. Maging sa Windows 98 ay makikita pa rin ang problemang ito.^[17]

Windows 3.11

Windows 95

Windows Vista

Sumunod namang inilabas ng Microsoft Windows ang Windows 98 noong Hunyo 25, 1998, unang ginawa noong Mayo 15, 1998.^[18] Walang masyadong nagbago sa GUI ng bersyong ito. At nagdagdag lamang ng ilang katangian sa Windows 95, katulad ng mas malawak na suporta sa mga hardwer, at paggamit ng Internet Explorer, kung saan sa bersyong ito ay malawak na inilakip sa mga programa ng Microsoft Windows, maging sa Windows Explorer. Ngunit mayroong isang inhinyerong pangkompyuter, na si Shane Brooks, na gumawa ng isang manluluklok, nagngangalang 98Lite, noong Nobyembre 22, 1998 na mayroong kakayahang alisin ang nakalakip na Internet Explorer sa Windows Explorer sa iba-ibang mga bersyon ng Windows, at nagpatunay na kayang tumakbo ng Windows 98 at iba pang mga bersyon ng Windows nang walang Internet Explorer at iba pang inilakip na programa;^[19] pinabilis din nito ang pagtakbo ng Windows. Na pinasinungalingan ang mga pag-aangkin ng Microsoft na hindi maaalis ang Internet Explorer mula sa Windows 98, kung maalis man ito ay hindi ito gagana, at kung gumana man ito ay tatakbo ito nang napakabagal. Sa katotohanan, ang pag-aalis ng Internet Explorer ay nagbigay ng kabaligtaran ng mga sinabi ng Microsoft, bagaman sa pag-aalis na ito ay hindi na magagamit ang mga bersyon ng Notepad at Wordpad para sa Windows 98, ngunit malulutas naman ito kung gagamitin ang Notepad at Wordpad para sa Windows 95 sa Windows 98, at mawawala rin ang Windows Update, na malulutas din sa madaling paraan.^[20][21][22]

[baguhin] 2000

Silipin din:Windows 2000 at Me

Noong Pebrero 17, 2000, inilabas ng Microsoft ang Windows 2000, isang operating system na batay sa arkitekturang NT.^[24][25]. Bagaman noong una ay pinagpipilitan ng Microsoft na ilalabas nila ang OS ng Oktubre 6, 1999,^[26] o ng alin mang petsa sa 1999. Lubhang ipinagmamalaki ng Microsoft ang OS, kagaya ng nakasaad sa itaas, ngunit walang masyadong nagbago sa OS sa larangan ng GUI, at ang hitsura nito ay kamukhang-kamukha pa rin ng Windows 98 at NT 4.0. Mariin ding iginigiit ng Microsoft na ang Windows 2000 ay para sa mga tanggapan, at hindi ipinapayo para sa mga tahanan. Ang dahilang ito ay, bagaman mayroong dagdag na suporta ang Windows 2000 para sa hardwer, marami pa ring mga larong pangkompyuter at hardwer ang hindi sinusuportahan ng Windows 2000.^[27]

Noong Setyembre 14, 2000 naman, ayon sa ilan, kaunahang balak ay Mayo 26,^[28] inilabas ang Windows Me, OS na ginawa ng Microsoft para sa mga tahanan.^{[29][30][31][32][33][34]} Walang masyadong nagbago sa Windows Me kung ikukumpara sa Windows 2000 at 98, at nagkaroon lamang ito ng mas bagong bersyon ng Internet Explorer at Windows Media Player.^[35] Isinama rin dito ang pinakaunang bersyon ng Windows Movie Maker. Ngunit bagaman iyon, marami ring nagsasabi na ang Windows Me ay isa sa mga pinakamapanganib na bersyon ng Windows. Ang pangungutiyang ito ay dahil mabagal daw ito, palaging namamatay, at maraming hindi pinapatakbong programa.^[36]

[baguhin] 2001 — 2006

Silipin din: Windows XP, Server 2003 at Fundamentals for Legacy PCs

Ang taong 2001 ang naging pinakamabuting taon sa Windows. Sa Oktubre 25 ng taong ito, inilabas ng Microsoft ang pinakamabiling operating system sa kasaysayan, ang Windows XP.^{[38][39][40][41][42][43]} At maging ngayon ay nananatili pa rin itong pinakamatagumpay sa pamilihan bagaman isang taon na mula nang inilabas ang mas bago nitong bersyon, ang Windows Vista.^[44] Nagpapakita rin ng panibagong disenyo ang OS, at inilakip na MSN Messenger.^[45]

Windows Me

Windows XP

Noong Marso 28, 2003, inilabas ng Microsoft ang Windows Server 2003 sa mga pamilihan. Ayon sa Microsoft ang operating system ay dalawang ulit na mas mabilis sa lahat ng paggawa nito kung ikukumpara sa ibang mga OS. Ito rin daw ay nakakatipid ng 20% sa pangkalahatang gastos, at 50% ang matitipid kung ikukumpara sa Windows NT Server 4.0.^[46] Ilan sa mga bagay na pinagbutihan dito ay ang Active Directory at mga patakaran pampamamahala nito.^[47] Bagaman dito, maging sa pinakabagong bersyon nito, walang suporta ang OS para sa maraming programang pangkompyuter, lalo na sa mga programang panserbidor kahit sa mga gawa ng Microsoft mismo.^[48]

Noong Hulyo 12, 2006 naman, inilabas ng Microsoft ang bagong bersyon ng Windows. Sa katotohanan, isa lamang itong pinamura^[49] at pinababang edisyon ng Windows XP.^[50] At dahil dito, ang hitsura nito ay totoong katulad na katulad pa rin ng Windows XP. Ginawa ng Microsoft ang bersyong ito para sa mga luma at mababagal na mga kompyuter.^[51][52]

[baguhin] 2006 — 2008

Silipin din: Windows Vista, Home Server at Server 2008

Ang hitsura ng bagong start button

Inilabas ang Windows Vista^[53] noong Enero 30, 2007 sa buong daigdig;^{[54][55][56][57][58]} inilabas naman ito sa mga malalaking mangangalakal sa isang mas maagang petsa ng Nobyembre 30, 2006.^{[59][60][61][62][63][64][65][66][67][68][69]} Bago pa ang paglalabas na ito ilang ulit na ding ipinahayag ng Microsoft ang paglalabas ng Windows Vista nang simula pa nang Hulyo ng 2006,^[70] at nangako rin sila rati na ilalabas nila ito ng Disyembre 2006^[71][72] ngunit hindi natuparan ng Microsoft ang mga petsang ito. Naglakip ito ng mararaming pagbabago lalo na sa GUI nito. Isa na rito ang inibang Start menu, at ang bagong disenyong Aero na nagbibigay ng napapaglagusang-liwanag na mga bintana, ngunit nakakabagal ito ng pagtakbo ng operating system.^[73] Bagaman dito, maraming nagsasabing pangit ang OS na ito dahil sa laki ng kinakain nitong kagamitan at alaalang pangkompyuter, at sa kawalang-suporta nito sa napakaraming software at hardwer.^[74] Kasama rin sa bersyong ito ang pangangailangan i"Activate" ang Windows Vista, isang mekanismo laban sa pamimirata. Kundi gagawin matapos ang 30 araw na palugit mula sa araw ng pagkaluklok sa kompyuter, maraming kagamitan ng OS ang mamamatay at babagal. ^[75] Bagaman mayroon nang ganito, madali pa ring mababaliwala ang katangiang ito sa pamamagitan ng mga napakaraming crack na ipinamimigay nang libre sa Internet.^[76][77]

Noong Nobyembre 5, 2007 naman, naglabas ang Microsoft ng isang OS na panserbidor ngunit sa pagkakataong ito ay para naman sa mga tahanan hindi sa mga tanggapan; ito ang Windows Home Server,^[78] ang pinakaunang Windows na panserbidor na ginawa para sa mga tahanan. Unang ipinakilala ito ng Microsoft sa Consumer Electronics Show noong Enero 8, 2007. Ilan sa mga itinatampok sa bagong OS ang kakayahan nitong gumawa ng mga backup araw-araw ng mga kompyuter para sa madaliang pagbangon sakaling masira man, at, ayon sa Microsoft, ang pagkakaroon ng isang mas sentralisado at buong daan sa mga kompyuter at talaksan nitong nakaugnay sa kompyuter na mayroong Windows Home Server. Ayon din sa Microsoft, ito raw ang sagot sa panininop kung mayroong malaking katipunan ng mga retrato, musika at bidyo.^[79][80]

Ngayon ang pinakabagong bersyon ng Windows ay isang serbidor. Ito ang Windows Server 2008, isang OS na panserbidor na inilabas sa ilalim ng walong edisyon^[81] noong Pebrero 27, 2008,^[82] bagaman ipinangako ng Microsoft na ilalabas nito ang OS sa huling bahagi ng 2007.^[83] Ang OS na ito ay ipinagbuti nang limang taon, at ang kasunod ng Windows Server 2003. Ayon sa Microsoft, nilalayon ng Server 2008 bawasan ang ginagastos na oras sa pagtatrabaho, tulungang mabilis na makaangkop ang mga kompanya sa mga pangangailangan, at dagdagan ang kaligtasan. Maganda ang mga kritisismong natanggap ng Windows Server 2008, at totoong nagtatampok ang OS ng dagdag na kaligtasan;^[84] isa rito ang pangangangailangan ng pagtatakda ng isang "matatag" na hudyat, isang hudyat na naglalaman ng mga bilang, tanda at titik, bago makalagda sa isang panagutan.^[85] Kahit batay ito sa Windows Vista, mas maayos ang pagtakbo nito.^{[86][87][88][89]}

[baguhin] Mga bersyon

Silipin din: Paghahambing at talaan ng mga bersyon ng Microsoft Windows

[baguhin] Kaligtasan

Sa mga rumaraang taon, ilan nang ulit na iginigiit ng Microsoft na ang kanilang operating system ay higit na mas ligtas; mayroong ilang sumasang-ayon sa Microsoft, ngunit totoong maraming tumututol.

[baguhin] Pag-aangkin

Isa sa mga pag-aangkin ng Microsoft na ang kanilang Windows ay higit na ligtas ay mas ligtas daw ang Windows XP kaysa sa Linux, at ginagawang 15 ulit na mas ligtas ang pagkakaroon ng SP2 sa Windows XP ang OS.^[90]

Ayon sa Patnugot ng Estratehiyang Pangkaligatasan Jeff Jones ng Microsoft, mas ligtas pa rin ang Microsoft kung ihahambing sa ibang mga OS, at dito ipinaghambing niya ang Linux at Apple laban sa Windows;^[91] matinding tinutulan ito ng pamayanang Linux. Ayon sa kanila, hindi katulad ng Microsoft, na inaayos ang mga problema ng Windows nang patago, inilalathala ng Linux ang bawat pagsasaayos na kanila ginagawa sa Linux kaya hindi katulad ng Linux, kakaunti lamang ang nakakaalam ng mga problema ng Windows, at kung ang isang OS ay ligtas na, hindi na ito nangangailangan pa ng mga pagsasaayos at dagdag mula sa manggagawa nito,^[92] isang bagay na sinasalungat palagi ng Microsoft sa kanilang palagiang paglalabas ng mga pagsasaayos sa Windows.

Bukod pa rito, ang pinakamalaking pag-aangkin ng Microsoft sa aspeto ng kaligtasan ay nang sinabi nitong ang Windows Vista ang pinakaligtas na OS magpakailanman. Ang pag-aangking ito ay dahil sa pagkakaroong ng Vista ng User Account Control, Internet Explorer 7, BitLocker Drive Encryption at mga teknolohiyang pampag-eenkrip.^[93]

At sinabi ni Bill Gates na ang kaligtasang ito ng Windows ay dulot ng mga mararaming manghahak at manunulat ng mga virus, at ang Windows ay mas magiging ligtas kung mas marami pang mga mamimili ang magluluklok ng mga pagsasaayos.^[94]

[baguhin] Reaksiyon

Kagaya ng naunang sinabi, inangkin ng Microsoft na ang Windows ang pinakaligtas na operating system, ito ay lubhang pinasinungalingan at tinuligsa ng iba-ibang tao at pamayanan.

Ayon sa isang ulat, walang gaanong nagbago sa Windows Vista kung ihahambing sa Windows XP. Ang Vista ay katulad na katulad pa rin daw ng XP sa kaligtasan nito, na sinasabing mababa, at ang Vista ay nag-iba lamang ng hitsura. Ang Windows Vista raw ay marami pa ring mga butas sa kaligtasan nito, at walang pinagkaiba sa pagsasanggalang nito mula sa mga virus.^[95]

Mayroon namang isang pag-aaral na isinaliksik ni Nicholas Petreley, isang manunulat ng mga patungkol sa Linux, na nagsasabing ang Linux naman daw ay mas ligtas kaysa sa Windows.^[96]

[baguhin] Kritisismo

Silipin din: Kritisismo ng Microsoft Windows

[baguhin] Panagutang pantagapangasiwa

Sa kadalian ng pagnanakaw ng mga hudyat mula sa Windows, naging malaking problema rito ay kapag nanakaw ang hudyat para sa isang panagutang pantagapangasiwa, ang pinakamakapangyarihang panagutan, lagot na ang kompyuter na pinatatakbuhan ng Windows.^[97].

[baguhin] Windows Metafile

Punong artikulo: Kahinaan ng Windows Metafile

Noong Enero 2, 2006, napag-alamang ang mga Windows Metafile ay mga posibleng mang-aangkat ng mga virus sa mga kompyuter. Ito ay dahil laging itinuturing ng operating system ang mga talaksang .wmf, ang daglat ng Windows Metafile (huwag ikalito sa Wikimedia Foundation), bilang mga larawan bagaman mayroong kakayahan ang mga itong magkaroon ng ibang pang mga uri ng talaksan sa loob ng mga ito. Ayon sa McAfee, ginagamit ang mga talaksang ito upang magpatakbo ng hanggang 30 sari ng Bifrose, isang uri ng virus, at tumama rin daw ito sa 6% ng mga mamimili ng McAfee.^[98]

[baguhin] Mga programa

[baguhin] User Account Control

Punong artikulo: User Account Control

Ang UAC habang humihingi ng pahintulot sa manggagamit

Dahil sa problema ng mga makapangyarihang panagutang pantagapangasiwa, ang mga bersyong Windows Vista at ang mga sumusunod dito ay niluklukan na ng User Account Control. Ito raw, ayon sa Microsoft, ang nagdulot sa Windows Vista sa pagiging pinakaligtas na OS na ginawa ng Microsoft.^[99] Bagaman nakaluklok ang UAC sa Windows Vista nang pangkaraniwan, mailuluklok din ito sa mga naunang bersyon ng Windows mula sa websayt ng Microsoft.

Pinagbabawalan ng UAC ang tahasang pagganap ng mga programang gumagamit ng mga kagamitan ng sistema ng operating system nang walang pahintulot mula sa isang tagapangasiwa. Ito ay dahil pinapatakbo ng UAC ang alin mang panagutan bilang isang pangkaraniwang panagutan, maging pantagapangasiwa man ito. Ito, ayon sa Microsoft, ang bumabawas sa pangkalahatang dulot ng mga virus at iba pang banta.^[100][101]

[baguhin] Internet Explorer 7

Punong artikulo: Internet Explorer 7

Ang bagong bersyon ng Internet Explorer na nakaluklok sa Windows Vista ay tumatakbo na sa ilalim ng "Protected Mode", na pumipigil sa mga programa at iba pang galing sa Internet sa paggagalaw sa kompyuter nang walang pahintulot mula sa manggagamit.^[102]

Ang Windows Defender

[baguhin] Windows Defender

Punong artikulo: Windows Defender

Ang Windows Defender, dating kilala bilang Windows AntiSpyware, ay isang nakaluklok na programa sa Windows Vista, ngunit maaari ring mailuklok sa Windows XP, na punong panlaban sa mga adware, spyware at spamware.^[103] Ilan sa mga kagamitan nito ang Microsoft SpyNet, isang lambat-lambat ng Microsoft na kumukuha ng kaalaman mula sa mga kasapi nito upang madaling makaalam ng mga bagong banta at malutas ito, at ang Software Explorer, isang bahagi ng Defender na pinapahintulutan ang mga manggagamit nitong usisain ang mga programang tumatakbo sa kasalukuyan at nang nakatakda sa kanilang kompyuter. Binansagan din ito ng ZDNet bilang pinakamabuting libreng panlaban-spyware.^[104] Pero bagaman dito, mayroong ilang kabagalan ang pagtakbo nito.^[105]

Ang Windows Live OneCare

[baguhin] Windows Live OneCare

Punong artikulo: Windows Live OneCare

Ang Windows Live OneCare ay isang antimalware, nangangahulugang pinupuksa nito ang mga programang hindi nakakabuti sa kompyuter, at pangkalahatang pangmatyag ng buong kompyuter.^[106] Dahil sa kakayahan nito laban sa mga adware, spamware at spyware, at firewall, ang pagluluklok nito ay nangangahulugan ng pagsasalanta ng Windows Defender at Windows Firewall. Ito rin ay hindi nakaluklok nang nakatakda kundi binibili bilang isang bahagi ng Windows Live, isa hanay ng mga produkto ng Microsoft.

Batay sa dalawang nagsasariling pag-aaral ang OneCare lamang ang tanging programang bumagsak sa 17 mga antivirus na sinulit. Natagpuan lamang ng OneCare ang 82.4% sa 500,000 mga virus na iniharap.^[107]

[baguhin] Suporta

Silipin din: Kasaysayan ng Microsoft Windows#Suporta

Dahil sa Windows Life-Cycle Policy, isang patakaran pampagsuporta ng Microsoft, pinapatid ng Microsoft ang pagsuporta sa mga bersyon ng Windows matapos ang 4 na taon pagkatapos ng malawakang pagkaroon nito sa pamilihan.^[108] Bagaman mayroong ilang kataliwasan kung saan pinapahaba pa ng Microsoft ang suporta sa mga bersyon ng Windows na totoong mabili nang ilang taon, kagaya ng Windows 2000, na ang pagsuporta mula sa Microsoft ay pinahaba hanggang Hunyo 30, 2010.^[109][110]

[baguhin] Talasanggunian

• Ang Walang XPng Pook: Unang Bahagi
• Talaan ng mga paglalabas ng Microsoft Windows

[baguhin] Kawing panlabas

• (Ingles) Opisyal na websayt ng Microsoft Windows

[baguhin] Silipin din

• Microsoft
• MS-DOS
• Operating system
• Windows CE