Engelschopp

Vun Wikipedia

Wapen/Flagg	Koort
Basisdaten
Bundsland: Neddersassen Landkreis: Stood Samtgemeen: Himmelporten
Flach:	19,69 km²
Inwahners:	755 (31. Dezember 2004)
Inwahnerdicht:	38,3 Inwahners pro km²
Hööch:	4 m över NN
Postleettall:	21710 (oolt: 2167)
Vörwahl:	04144
Geograafsche Laag:	Koordinaten:53° 40′ N, 9° 19′ O53° 40′ N, 9° 19′ O
Gemeenslötel:	03 3 59 015
Börgermeester:	Heinz Düe (Wählerblock Neeland)
Websteed:	www.himmelpforten.de

Engelschopp (hoochdüütsch Engelschoff) is ene Gemeen in’n Landkreis Stood in Neddersassen. To ehr höört de Öörd Engelschopp, Neeland, Borg un Hammahermoor.

Inholtsverteken 1 Geografie 1.1 Navergemenen 2 Historie 2.1 Entwässerung 2.2 Religion 2.3 Inwahners 3 Politik 3.1 Gemeenraat 3.2 Wapen 3.3 Börgermeester 4 Kultur 4.1 Bruukdom 4.2 Verenen 4.2.1 Schüttenvereen Borg 4.2.2 Riedvereen 4.2.3 Danzkreis 4.2.4 Engelschopper Gill 4.2.5 Freewillige Füerwehr 5 Weertschop un Infrastruktur 5.1 Verkehr 6 Literatur 7 Weblenken 8 Footnoten

[ännern] Geografie

Engelschopp liggt in de Maschen vun de Oost.

[ännern] Navergemenen

In’n Süden grenzt Engelschopp an de Gemeen Gemeen Himmelporten mit de Öörd Ossenpohl un Bredenwisch. In’n Süüdoosten un Oosten grenzt se bi Borg un Hammahermoor an de Gemeen Hammah mit Groot-Steernbarg. In’n Noorden warrt Engelschopp dör en smalen Striepen Land vun de Gemeen Drochters trennt, de to de noordwesten legene Gemeen Grotenwöörn höört. In’n Westen liggt de Oost un op de anner Siet Oost de Gemeen Heckthusen mit dat Dörp Lüttenwöörn.

[ännern] Historie

Engelschopp is en ole Siedlung ut de Tiet vun de Hollerkolonisatschoon, in de hollandsche Siedlers in dat Arzbisdom Bremen kemen un de Maschen, de jümmer vun Stormfloten gefährdet weren, oorbor maken hülpen.

De Historie vun den Oort is präägt vun den Kamp mit dat Water, vun dat jümmer toveel dor weer.

Bi de Wiehnachtsfloot vun 1717/1718 hett dat Engelschopp swoor drapen. Vun Kehdingen över dat Kehdinger Moor un över den Diek vun de Oost weer dat Water an’n 25. Dezember kamen un vun Wiehnachten bet na April noch stünn de hele Gemarkung bet ünner de Däcker ünner Water. Veer Lüüd un veel Veeh is verdrunken. Na en amtlich Opstellung sünd vun 560 Peer 349 doodbleven, vun 1077 Stück Rindveeh 934, vun 432 Swien 331 un vun 623 Schaap 488. 77 Hüüs güngen verloren un 264 hebbt sworen Schaden nahmen. De Gesamtschaden is op 58.640 Rieksdalers un 20 Schilling schätzt worrn. In’n Sommer 1718 is de Sietwenn an de Grenz vun Grotenwöörn to Oosten repareert un utboot worrn, doch an’n 19. November breek se trutzdem un ok Engelschopp stünn wedder vele Maanden lang ünner Water, so dat wedder dat Winterkoorn verdrunken is.

Na’n Orkan vun’n 3. November 1824 müssen de Engelschopper al över 500 Hand- un Spanndeensten leisten. Ok an’n 5. Februar 1825 keem wedder dat fremde Water ut Kehdingen, nadem annerwegens de Dieken braken weren. Wedder stünn dat Water hooch, doch ditmal geev dat kene sworen Schadens. Aver de Lüüd müssen al wedder mehr as 5000 Hand- un binah 2000 Spanndeensten leisten.

1838 geev dat Reparaturen an de Feldslüüs ünner annern dör de Firma Hahn. Dat harr en langen Weg vör de Gerichten to Folg. De Kamper un Vörwarker wullen nich de vullen Bidrääg to disse Arbeiden betahlen. Ok de Lüüd ut Waterkroog un Engelschopp glöven, dat se to veel betahlen müssen. So keem de Geschicht 1849 vör Gericht. Dör stünnen sik de beiden Parteien mit de beropenen Afkaten Karl Diedrich Holtermann (Vörwarker) un Gottlieb Wilhelm Freudentheil (Engelschopper) gegenöver. Rut keem denn 1852, dat alle Kosten op de vörhannenen Fläch to betahlen sünd un nich mehr op de Stücken so as vörher.

[ännern] Entwässerung

En eerste Windschöppmöhl stünn in de 1820er Johren in dat Möhlenmoor, dat vörher noch Schwabelsmoor heten harr. En Andrag op Bo vun wiedere Möhlen is 1839 noch aflehnt worrn, doch 1850 warrt eerste lütte Schöppmöhlen opboot. 1862 kummt de Idee op, en dampbedreven Schöppwark an’n Utgang vun’n Borgbeck to boon. Doch de inhoolte Vöranslag is den Slüsenverband to düür un de Idee warrt nich wiederverfolgt. Eerst 1891 weer dat so wiet. En Schöppwark mit Dampmaschien warrt boot. De Kosten weren üm un bi 110.000 Mark un de Schosteen weer 23,4 Meter hooch.

[ännern] Religion

De Gemeen is evangeelsch-luthersch präägt un höört to dat Kaspeel Horst in’n Karkenkreis Stood.

[ännern] Inwahners

• 31. Dezember 2002: 741 Inwahners
• 31. Dezember 2004: 755 Inwahners

[ännern] Politik

[ännern] Gemeenraat

De Gemeenraat vun Engelschopp sett sik siet de letzten Kommunalwahl in’t Johr 2001 so tohoop:

• WG Engelschopp: 3 LüüD
• Wählerblock Neeland: 6 Lüüd

[ännern] Wapen

De Hauptsatzung vun de Gemeen^[1] beschrifft dat Wapen so:

Unter silbernem Zinnenschildhaupt Blau von Grün durch eine silberne Wellenleiste geteilt; oben ein silbernes Mühlenschrägkreuz mit innen zweibögigen Blattenden; unten zwei pfahlweise einander abgewendete silberne gestürzte Sensen mit goldenen Blättern.

Ünner en Schildhaupt vun sülvern Tinnen Blau vun Gröön dör sülvern Wellenliest deelt; baven en sülvern Möhlenkrüüz mit binnen tweebagige Blattennen; neern twee pahlwies enanner afwennte sülverne störte Sesen mit gollene Blääd.

De Sesen staht dorför, dat de Öörd in de Gemeen ole Buurndörper sünd. De Stellung vun de Sesen süht ut as en ‚E‘ un billt dormit den Anfangsbookstaven vun de Gemeen. De Wellenbalken is Symbol för de Oost un de Laag in de Maschen, de jümmer wedder ünner Water stahn hebbt un de vun de Siedlers in Kulturland verwannelt worrn sünd. Dat blaue Feld boben schall den wieten Himmel över dat flache Land dorstellen, dat Möhlrad erinnert an de beiden Koornmöhlen, de fröher in de Gemeen stünnen. De Tinnenrand oder Turnierkragen erinnert an den sagenhaften Roovridder Schwab in Borg.

[ännern] Börgermeester

• üm 1861: Johann Diedrich Winter
• 1868 bet ?: Johann Diedrich Schlichting
•  ? bet 1889: Hinrich Jarck
• 1889 bet ?: Claus Diedrich Jarck
•  ? bet 1916: Hinrich Winter
• 1916 bet 1930: Hinrich Jarck
• 1930 bet 1943: Hans Seebeck
• 1943 bet 1945: Heinrich Jarck
• 1945 bet 1972: Hinrich Jarck
• 1972 bet 1976: Hinrich Koppelmann
• 1976 bet 1986: Horst Horeis
• 1986 be 1996: Heinrich Winter
• siet 1996: Heinrich Düe

[ännern] Kultur

[ännern] Bruukdom

Bi’t Neijohrskloppen güngen de jungen Lüüd in’t Dörp vun Huus to Huus, hebbt en froh Neijohr wünscht un an jede Statschoon en lütten Kööm mit en Stück Sucker drunken. Na den Krieg is dat mit dissen Bruuk avers to Enn kamen.

In Borg gaht de de Mannslüüd to Fasslom dör Dörp un schnorrt Wust un Eier, de denn den Avend tohoop opeten warrt.

[ännern] Verenen

[ännern] Schüttenvereen Borg

De Schüttenvereen Borg is 1929 grünnt worrn. Schaten hebbt se in de Borgschanz mit de twee Kleenkalibergewehren, de den Vereen tohören. De Diek vun’n Borgbeck deen as Kugelfang. Dissen provisorischen Scheetstand müss 1936 op Anwies vun’t Amt opgeven warrn. Bi’n Gasthoff Jarck hebbt se en ne’en boot. De eerste Fahn hebbt se 1934 köfft un wieht. 1939 müss wegen den Krieg denn dat Scheten instellt warrn. De Fahn un de Gewehren güngen in’n Krieg verloren. Ok de Fahn – woll vun wegen dat Hakenkrüüz dat dor op weer – is to Kriegsenn verbrannt worrn. Na den Krieg geev dat Gedanken den Vereen weddertobeleven, doch de sünd in’n Sand verlopen un de Schüttenbröders sünd de Naververenen bitreden.

[ännern] Riedvereen

De Riedvereen Engelschopp is 1924 grünnt worrn. Kort later is en Riedplatz in Waterkroog inricht un en poor Hinnernissen sünd köfft worrn. 1926 hebbt se ok ene Standarte köfft. In de eerste Tiet müssen de Maten ehr Bidrääg betahlen, indem se den Sommer över Lämmer versorgt hebbt, de in’t Vörjöhr köfft un in’n Harvst to Gunsten de Vereenskass wedder verköfft worrn sünd. 1938 hebbt se en ne’en Riedplatz direkt blangen dat Gasthuus Bardenhagen anleggt. Aver al 1939 keem dat Vereensleven to’n Erliegen un eerst 1947 güng dat mit’n Vereen wieder. 1979 hett de Vereen in Sittens ene Riedhall op Afbruch köfft un in Engelschopp bi’n Gasthoff Drewes nee opboot.

[ännern] Danzkreis

Ut de Landjugendgrupp, de se in de 1950er Johren grünnt hebbt un de Theaterspelen, Fohrten un Volksdanzopföhrungen organiseert hebbt, hett sik later de Danzkreis Engelschopp billt. Vun em is ok mit Hülp vun de Gemeen dat Danz- un Klönhus opricht worrn.

[ännern] Engelschopper Gill

De Engelschopper Gill is woll in oder kort na den Dörtigjohrigen Krieg as Gemeenschop grünnt worrn, in de sik de Maten Bistand in de Noot toseggt hebbt. In en Breef vun 1705 warrt seggt, dat de Gill to de Tiet al mehr as 50 Johren bestahn schall hebben. Bi de Versammlungen vun de Bröders an’n Sünndag na Johanni müssen en poor Lüüd je ene Tünn Beer geven. De Versammlung, de gegen 1 Uhr middags mit en Vadderunser un dat Singen vun’t Leed Nun bitten wir den Heiligen Geist anfüng, harr de Regel, dat nüms Wapen mitbringen dröff un dat ok ans de Maten sik ehrbor to verholen harrn. De Gill, de ehr Zweck sik vun en Bistandsbund mehr un mehr hen to dat Veranstalten vun dat Gillfest wannelt harr, is 1859 oplööst worrn.

[ännern] Freewillige Füerwehr

De Freewillige Füerwehr vun Engelschopp is 1902 grünnt worrn.

[ännern] Weertschop un Infrastruktur

[ännern] Verkehr

Dör Neeland geiht de Landsstraat 113, de in’n Noordwesten na Grotenwöörn föhrt un in’n Süden in Himmelporten Ansluss an de Bundsstraat 73 hett, de wieder na Stood un Hamborg föhrt. Ok de Bahnverkehr över de Nedderelvbahn Richt Hamborg löppt över den Bahnhoff Himmelporten. Dör den Oort Engelschopp föhrt de Kreisstraat 62, de över de K 63, K 3 un K 27 över Asselermoor na Stood geiht, un na Süüdoosten na Hammoh un Himmelporten föhrt.

[ännern] Literatur

• Heinrich Winter: Engelschoffer Chronik. Leben in einer Holländersiedlung. Kreisspoorkass Stood, Stood 2004

[ännern] Weblenken

• Websteed vun de Gemeen Engelschopp (hoochdüütsch)

[ännern] Footnoten

1. ↑ http://www.himmelpforten.de/278.htm