Gothenborg

Vun Wikipedia

Wapen/Flagg	Koort
Basisdaten
Bundsland: Neddersassen Landkreis: Landkreis Stood Samtgemeen: Samtgemeen Hornborg
Flach:	11,32 km²
Inwahners:	1.065 (2003-12-31)
Inwahnerdicht:	94,1 Inwahners pro km²
Hööch:	16 m över NN
Postleettall:	21684
Vörwahl:	04141
Geograafsche Laag:	Koordinaten:53° 34′ N, 9° 32′ O53° 34′ N, 9° 32′ O
Gemeenslötel:	03359001
Börgermeester:	Gerd Allers (WGA)

Gothenborg is en Dörp un Gemeen in’n Landkreis Stood in Neddersassen.

Inholtsverteken 1 Historie 1.1 Inwahnertall 2 Politik 2.1 Gemeenraat 2.2 Wapen 3 Weertschop 3.1 Verkehr 4 Infrastruktur 5 Kultur 5.1 Scholen 6 Verenen 7 Weblenken

[ännern] Historie

Gothenborg heet fröher Lieth. Dat ole Lieth kummt den 8. Juni 1199 toeerst in ene Oorkunn vun’n Bremer Arzbischop Hartwig II. vör. Heinricus de Lyt warrt dor as Tüüg nöömt. 1652 hett de sweedsche Generalguvernör Hans Christoph von Königsmarck, de de sweedsche Baas in dat Hartogdom Bremen un Veern weer, en Goot in Lieth köfft un dor 1655/1656 en Slott boot. Dat Slott nööm he na siene Fro Agathe von Lehsten Agathenburg. De Naam is denn ok op dat Dörp övergahn un op Platt to Gothenborg worrn.

1740 hett de Kurfürst vun Hannover Georg II., de blangenbi noch König vun Grootbritannien weer, dat Slott för 45.000 Daler köfft. In dat Slott seet denn vun 1753 af an de Amtmann vun dat Amt Stood-Gothenborg. De Amtmann hett sienen Seet 1859 denn aver in Stood nahmen un dat Slott hebbt se as Domään verpacht. 1876 schull dat Goot verköfft warrn. Do hebbt de Dörpslüüd ehr Geld tohoopsmeten un Slott un Land för 143.000 Mark köfft. Dat Slott keem 1881 an den Buur Hans Wilkens, de jüst as noch fief Buurn in Gothenborg vun jemehr Hoffsteden rünner müss, as dat Johr tovör de Iesenbahn na Gotenborg keem. Ok de Barockpark, de to’t Slott höör, is vun wegen de Iesenbahn mit weg kamen. 1921 is dat Slott afbrennt un blots de Muurn sünd stahn bleven. Hans un Sophie tom Felde hebbt dat Slott denn wedder opboot. 1983 hett Sophie tom Felde dat denn den Stoder Geschichts- un Heimatvereen nalaten, de dat allens an’n Landkreis afgeven hett. De Landkreis hett dat Slott 1991 saniert un bedrifft dat nu as Kulturzentrum.

Siet 1972 is dat Dörp Deel vun de Samtgemeen Hornborg.

Intressant is, dat de Oort, ofschoonst Gothenborg een vun de wenigen Öörd in de Gegend is, bi de de Naam ut dat Hoochdüütsche stammt, ok as een vun ganz wenig Öörd Oortsschiller hett, op de de plattdüütsche Naam mit opsteiht.

[ännern] Inwahnertall

Johr	Inwahners
1939	358
1946	741
2003	1065

[ännern] Politik

[ännern] Gemeenraat

Sitten in’n Gemeenraat

Johr	CDU	SPD	UWG	De Grönen	FDP	annere
2001	3	1	7	-	-	-
2006	4	-	7	-	-	-

Börgermeester is Gerd Allers.

[ännern] Wapen

Dat Wapen vun de Gemeen wiest enen Schild mit dree blaue Kielen, de na rechts wiest.

[ännern] Weertschop

[ännern] Verkehr

Dör Gothenborg löppt de Bundsstraat 73 dör, de na Hamborg un Cuxhoben geiht. Ok de 1881 boote Nedderelv-Bahn vun Cuxhoben na Horborg hett ’n Bahnhoff in Gothenborg.

[ännern] Infrastruktur

Stroom keem 1920 na Gothenborg.

[ännern] Kultur

[ännern] Scholen

Gothenborg hett siet 1977 en Speelkreis un vun 1990 af an en egen Kinnergoorn. De Grundschool, woneem de Gothenborger Kinner hengaht, is in Dollern. Op Haupt- un Realschool gaht de jung Lüüd na Hornborg, op Gymnasium an dat Athenaeum Stood.

De eerste School geev dat 1697 in Gothenborg. 1886 hebbt se noch wedder en nee Schoolhuus boot. Siet 1981 hett Gothenborg kene egene School mehr, de Gemeen hett dor en Schoolverband mit Dollern slaten.

[ännern] Verenen

1998 hebbt de Gothenbörger en olen Backaven wedder opboot. Dat weer ok Anlaat för dat Grünnen vun den Vereen Gothenbörger Backobenfrünn, de ünner annern blangen dat Backen vun Broot un Kokens Bruukdom un de plattdüütsche Spraak plegen will.

[ännern] Weblenken

• Websteed vun de Gemeen Gothenborg (hoochdüütsch)