ഉഭയജീവി
വിക്കിപീഡിയ, ഒരു സ്വതന്ത്ര വിജ്ഞാനകോശം.
ജലത്തില് ജീവിക്കാന് പാകത്തിലുള്ള ശാരീരിക പ്രത്യേകതകളുമായി ജനിച്ച്, പൂര്ണ്ണവളര്ച്ച പ്രാപിക്കുമ്പോഴേക്കും കരജീവികളുടെ പ്രത്യേകതകള് സ്വാംശീകരിക്കുന്ന പ്രത്യേക ജീവിവിഭാഗത്തിനെയാണ് ഉഭയജീവികള് എന്നു വിളിക്കുന്നത്. പലതരം തവളകളെക്കൂടാതെ ന്യൂട്ട്, സലമാണ്ടര് മുതലായ ജീവികളും ഉഭയജീവികളില് പെടുന്നു.
[തിരുത്തുക] പ്രത്യേകതകള്
ഉഭയജീവികള് ജലത്തിലോ ജലസാമീപ്യമുള്ള പ്രദേശങ്ങളിലോ ആയിരിക്കും മുട്ടകളിടുന്നത്. മുട്ടവിരിഞ്ഞുവരുന്ന കുഞ്ഞുങ്ങളെ നിംഫുകള് എന്നു വിളിക്കുന്നു. നിംഫുകള് ജലത്തില് ജീവിക്കാന് നിര്ബന്ധിതമാണ്. നിംഫ് ആയിരിക്കുമ്പോള് ഇവ മത്സ്യങ്ങളെ പോലെ ജലത്തില് ജീവിക്കുകയും, മത്സ്യങ്ങളെ പോലെ ശകുലങ്ങള് ഉപയോഗിച്ച് ജലത്തില് ലയിച്ചിരിക്കുന്ന വായു ശ്വസിക്കുകയും ചെയ്യുന്നു. പൂര്ണ്ണവളര്ച്ച പ്രാപിക്കുമ്പോഴേക്കും, ഈ ജീവികള്ക്ക് ശ്വാസകോശവും കാലുകളും വളര്ന്നുവരുന്നു. ശരീരത്തിന്റെ പിന്ഭാഗം വാലായി രൂപാന്തരം പ്രാപിക്കുകയോ പൂര്ണ്ണമായി ശരീരത്തിന്റെ ഭാഗത്തോടെ ചേരുകയോ ചെയ്യുന്നു. ജലത്തില് കഴിയുന്ന സമയത്തും ഉഭയജീവികള്ക്ക് അവയുടേതായ പ്രത്യേകതകളുണ്ട്. ഉഭയജീവികളുടെ തല മത്സ്യങ്ങളുടേതില് നിന്നും തികച്ചും വിഭിന്ന ആകൃതിയും ഘടനയുമുള്ളതായിരിക്കും. കണ്ണുകളോടനുബന്ധിച്ച് കണ്പോളകളും കണ്ണീര് ഗ്രന്ഥികളുമുണ്ടാകും. മത്സ്യത്തിന് ആന്തരകര്ണ്ണമാണുണ്ടാവാറ്. അന്തരീക്ഷത്തിലൂടെയുള്ള ശബ്ദം ഉഭയജീവികള്ക്ക് ശ്രവിക്കാനാവും.
ഉഭയജീവികള്ക്ക് കര്ണ്ണപുടം തലയുടെ പിന്ഭാഗത്താവും ഉണ്ടാവുക. ചില ന്യൂട്ടുകള്ക്ക് ശ്വാസകോശം ഉണ്ടാവാറില്ല. അവ തൊലിപ്പുറത്തുകൂടിയാവും ശ്വസിക്കുക. ശ്വാസകോശമുള്ള ഉഭയജീവികളുക്കും തൊലിപ്പുറത്തുകൂടി ശ്വസിക്കാനുള്ള കഴിവുണ്ട്.
[തിരുത്തുക] പരിണാമം
നട്ടെല്ലികളുടെ കൂട്ടത്തില് മത്സ്യങ്ങളുടേയും ഉരഗങ്ങളുടേയും കൂട്ടത്തിലാണ് ഉഭയജീവികളുടെ സ്ഥാനം. മത്സ്യങ്ങളില് നിന്നാണ് ഉഭയജീവികളുടെ പരിണാമം ആരംഭിക്കുന്നത്. 35 കോടി വര്ഷങ്ങള്ക്കു മുമ്പ് കരയിലേക്കുള്ള ജീവികളുടെ പ്രയാണശ്രമത്തിന്റെ ആദ്യപടിയായി ഉണ്ടായ ജീവികളാണ് ഉഭയജീവികള്. ഉഭയജീവികളില് നിന്നാണ് ഉരഗങ്ങള് പരിണമിച്ചുണ്ടായത്.