Вирус
Од Википедија, слободна енциклопедија
- Оваа статија се однесува на вирусот како биолошки објект. За поимот вирус поврзан со компјутери, видете „Компјутерски вирус“
Во биологијата вирус (од латински virus - токсин или отров) е подмикроскопска честичка што е неспособна да расте и да се размножува надвор од клетката домакин. Вирусните болести доведуваат до тешки заболувања и економски товар на човекот и животните и може да доведат до уништување на земјоделските семиња. Секоја вирусна честичка или вирион се состои од генетски материјал ДНК или РНК, исклучиво едното, со заштитна протеинска обвивка наречена капсид. Нивните форми варираат од многу прости овални, до многу сложени, како оние со опашка или во форма на плик. Вирусите ги загрозуваат сите форми на клеточен живот и се делат на животински, растителни и бактериски вируси. Некои ги сметаат за неживи затоа што не ги исполнуваат основните критериуми за живот. На пример, вирусите немаат клетки како сите живи организми. Како и да е, вирусите имаат гени и еволуираат по пат на природна селекција. Тие се опишани како организми на работ на животот. Вирусните инфекции најчесто резултираат со заболување кај човекот, а со имун одговор на животното домаќин. Во споредба со антибиотиците (кои немаат дејство врз вирусите), антивиралните лекови се поспецифични и поскапи. За некои посериозни вирусни заболувања се развиени вакцини кои можат да обезбедат доживотна заштита.
