Wëssenschaft
Vu Wikipedia, der fräier Enzyklopedie.
D’Wëssenschaft besteet aus Fuerschung a Léier. Wëssenschaftlech Fuerschung ass d’methodesch Sich no neien Erkenntnissen. D’Resultater ginn a wëssenschaftlechen Aarbechten systematesch duergestallt a verëffentlecht, soudatt se prinzipiell vu jiddferengem novollzunn an iwwerpréift kënne ginn. D’Léier ass déi organiséiert a systematesch Iwwerliwwerung vun de Grondlage vum wëssenschaftleche Fuerschen an d’Vermëttlung vun engem Iwwerbléck iwwer den aktuelle Fuerschungsstand.
Inhaltsverzeechnis |
[Änneren] Wëssenschaftsbetrib
Wëssenschaft fënnt traditionell an Universitéite statt. Awer och Akademien, privat finanzéiert Fuerschungsinstituter, Berodungsfirmen an d’Wirtschaft finanzéieren d’Tätegkeet vu ville Wëssenschaftler. A ville Länner gëtt et staatlech Hëllef.
Niewend de wëssenschaftleche Verëffentlechungen erfollegt den Austausch mat anere Fuerscher duerch Fachkonferenzen a bei Kongresser vun internationalen Daachverbänn. Och Aluedungen zu Seminaren, Institutsbesich, Aarbechtsgruppen oder Gaaschtprofessuren spillen eng Roll. Vu grousser Bedeitung sinn och Auslandsopenthalter an international Fuerschungsprojekter.
Fir déi interdisziplinär Fuerschung gouf an de leschte Jorzéngten eng Rei vun Instituten opgebaut, an deenen industriell an universitär Fuerschung zesumme schaffen. Vill Entreprisen besëtzen eege Fuerschungsarichtungen, an deene Grundlagefuerschung bedriwwe get.
[Änneren] Bedeitung
D’Resultater vun der Fuerschung sinn eng Grondlag vun der Technik an domat indirekt vu Bedeitung fir dat modernt gesellschaftlecht Liewen.
[Änneren] Wëssenschaftlech Wäerter
Grondwäert vun der Wëssenschaft ass d’Striewen no der Wourecht. E wichtegt Prinzip, fir dat ze realiséieren, ass déi kritesch Haltung géigeniwwer eegenen a frieme Resultater an Thesen. E weidert Prinzip ass déi méiglechst wäitgehend Neutralitéit vum Fuerscher. D’Fuerschung soll méiglechst net duerch aner Interesse wéi d’Wouregkeetssich geleet ginn. Entwéckelt d’Wëssenschaft Theorien, déi net intersubjektiv nopréifbar sinn, get si eng Pseudowëssenschaft. Léisst si sech zum Spillball politescher oder finanzieller Interesse maachen, schwätzt ee vun Junk Science.
[Änneren] Wëssenschaftsfuerschung
D’Wëssenschaftsfuerschung versicht am Géigesaz zu der Wëssenschaftstheorie d’wëssenschaftlech Praxis mat empiresche Methoden ze ënnersichen an ze beschreiwen. Dobäi kommen ënner anerem Methoden vun der Wëssenschaftssoziologie an der Scientometrie zum Asaz. D’Resultater vun der Wëssenschaftsfuerschung hunn an der Rumm vun der Evaluatioun och Afloss op wëssenschaftspolitesch Entscheedungen.
[Änneren] Wëssenschaftsberäicher
Et existéiere verschidden Systematiken zu der Andeelung vun de Wëssenschaften, z.B. Dewey Decimal Classification. Fréier Autoren hun geschwat vun engem Bam vun der Wëssenschaft souwéi d’Ënnerdeelung an Eenzelwëssenschaften an Universalwëssenschaft. Eng bekannten, graff Andeelung ënnerscheed d’Naturwëssenschaften, Humanwëssenschaften an Strukturwëssenschaften.
Doniewend get et beräichsiwwergräifend Disziplinnen, déi eng Mëschung verschiddener Fachgebidder sinn, z.B.: d’Wirtschaftsinformatik, déi niewen engem Kär eegen Inhalten ënner anerem och Deeler aus Informatik, Mathematik, Wirtschaftswëssenschaften a Kommunikatiounswëssenschaften huet.
